7 - ئاينىڭ 24 - كۈنى چۈشتىن بۇرۇن، دۆلەت رەئىسى شى جىنپىڭ بېيجىڭ خەلق سارىيىدا 25 - قېتىملىق جۇڭگو − ياۋروپا ئىتتىپاقى رەھبەرلىرى ئۇچرىشىشىنى ئۆتكۈزۈش ئۈچۈن جۇڭگوغا كەلگەن ياۋروپا كېڭىشىنىڭ رەئىسى كوستا ۋە ياۋروپا ئىتتىپاقى كومىتېتىنىڭ رەئىسى ۋوندېرلېيىن بىلەن كۆرۈشتى. □شىنخۇا ئاگېنتلىقى مۇخبىرى شيې خۇەنچى فوتوسى
شىنخۇا ئاگېنتلىقى، بېيجىڭ، 7 - ئاينىڭ 24 - كۈنى تېلېگراممىسى (مۇخبىرلار ما جويەن، شۈ كې) 7 - ئاينىڭ 24 - كۈنى چۈشتىن بۇرۇن، دۆلەت رەئىسى شى جىنپىڭ بېيجىڭ خەلق سارىيىدا 25 - قېتىملىق جۇڭگو − ياۋروپا ئىتتىپاقى رەھبەرلىرى ئۇچرىشىشىنى ئۆتكۈزۈش ئۈچۈن جۇڭگوغا كەلگەن ياۋروپا كېڭىشىنىڭ رەئىسى كوستا ۋە ياۋروپا ئىتتىپاقى كومىتېتىنىڭ رەئىسى ۋوندېرلېيىن بىلەن كۆرۈشتى.
شى جىنپىڭ مۇنداق كۆرسەتتى: جۇڭگو بىلەن ياۋروپا ئىتتىپاقى دىپلوماتىك مۇناسىۋەت ئورناتقان 50 يىلدىن بۇيان، ئالماشتۇرۇش، ھەمكارلىشىش نەتىجىلىرى مول بولدى، بۇ، بىر - بىرىنى ئۇتۇق قازاندۇرۇپلا قالماي، يەنە دۇنياغا نەپ يەتكۈزدى، بۇنىڭ ئىچىدىكى مۇھىم تەجرىبە ۋە ئىلھام دەل ئۆزئارا ھۆرمەتلەش، ئوخشاشلىقلاردا بىرلىككە كېلىپ پەرقلەرنى ساقلاپ قېلىش، ئېچىۋېتىش، ھەمكارلىشىش، ئۆزئارا مەنپەئەت يەتكۈزۈش ئاساسىدا ئورتاق پايدا ئېلىشتىن ئىبارەت. بۇ شۇنداقلا جۇڭگو − ياۋروپا ئىتتىپاقى مۇناسىۋىتىنىڭ كەلگۈسى تەرەققىياتىدا چىڭ تۇرۇشقا تېگىشلىك مۇھىم پىرىنسىپ ۋە تىرىشىش يۆنىلىشى. بۇ يىل جۇڭگو بىلەن ياۋروپا ئىتتىپاقى دىپلوماتىك مۇناسىۋەت ئورناتقانلىقىنىڭ 50 يىللىقى ۋە بىرلەشكەن دۆلەتلەر تەشكىلاتى قۇرۇلغانلىقىنىڭ 80 يىللىقى بولۇپ، جۇڭگو − ياۋروپا ئىتتىپاقى مۇناسىۋىتى يەنە بىر ئاچقۇچلۇق تارىخىي تۈگۈن نۇقتىسىدا تۇرماقتا. جۇڭگو بىلەن ياۋروپا ئىتتىپاقى ئوخشاشلا كۆپ تەرەپچىلىكنى ياقلايدىغان، ئېچىۋېتىش، ھەمكارلىشىشنى تەشەببۇس قىلىدىغان ئىجابىي كۈچ، خەلقئارا ۋەزىيەت قانچە كەسكىن ۋە مۇرەككەپ بولغانسېرى، جۇڭگو بىلەن ياۋروپا ئىتتىپاقى ئالاقىنى شۇنچە كۈچەيتىپ، ئۆزئارا ئىشىنىشنى ئىلگىرى سۈرۈپ، ھەمكارلىقنى چوڭقۇرلاشتۇرۇشى كېرەك. دۇنيادا 100 يىللىق ئۆزگىرىش ۋەزىيىتى تېز سۈرئەتتە ئۆزگىرىۋاتقان، ئۆزگىرىش ۋە قالايمىقانچىلىق گىرەلىشىپ كەتكەن خەلقئارا ۋەزىيەتتە، جۇڭگو بىلەن ياۋروپا ئىتتىپاقى رەھبەرلىرى يىراقنى كۆرەرلىكى ۋە مەسئۇلىيەتچانلىقىنى يەنە بىر قېتىم نامايان قىلىپ، خەلقنىڭ ئارزۇسىغا ئۇيغۇن كېلىدىغان، تارىخنىڭ سىنىقىدىن ئۆتەلەيدىغان ئىستراتېگىيەلىك تاللاشنى ئوتتۇرىغا قويۇپ، جۇڭگو − ياۋروپا ئىتتىپاقى مۇناسىۋىتى تەرەققىياتىنىڭ توغرا يۆنىلىشىنى مەھكەم ئىگىلەپ، جۇڭگو − ياۋروپا ئىتتىپاقى مۇناسىۋىتىنىڭ تېخىمۇ پارلاق كېيىنكى 50 يىلىنى تىرىشىپ ئېچىپ، دۇنيانى تېخىمۇ كۆپ مۇقىملىق ۋە ئېنىقلىق بىلەن تەمىنلىشى كېرەك.
شى جىنپىڭ جۇڭگو − ياۋروپا ئىتتىپاقى مۇناسىۋىتىنىڭ كەلگۈسى تەرەققىياتى توغرىسىدا ئۈچ نۇقتىلىق تەشەببۇسنى ئوتتۇرىغا قويدى. بىرىنچى، ئۆزئارا ھۆرمەت قىلىشتا چىڭ تۇرۇپ، ھەمراھلىق مۇناسىۋىتىنىڭ ئورۇن بېكىتمىسىنى مۇستەھكەملەش كېرەك. جۇڭگو تىنچلىقنى قىزغىن سۆيىدىغان دۆلەت، ئىناق ئۆتۈش، سىغدۇرۇشچان بولۇش، ھەمكارلىشىش، ئورتاق پايدا ئېلىشنى تەشەببۇس قىلىدۇ. ئەگەر جۇڭگونى غەرب بېسىپ ئۆتكەن يول بىلەن ئۆلچىسە، جۇڭگوغا بولغان تونۇش بىر تەرەپلىمىلىك بولۇپ قالىدۇ. جۇڭگو بىلەن ياۋروپا ئىتتىپاقىنىڭ تارىخىي مەدەنىيىتى، يولى - تۈزۈمى، تەرەققىيات باسقۇچى ھەقىقەتەن ئوخشىمايدۇ، لېكىن بۇ خىل پەرق ئىلگىرى جۇڭگو بىلەن ياۋروپا ئىتتىپاقىنىڭ دىپلوماتىك مۇناسىۋەت ئورنىتىشى ۋە مۇناسىۋىتىنىڭ تەرەققىياتىغا توسالغۇ بولمىدى، بۇنىڭدىن كېيىنمۇ ئىككى تەرەپ مۇناسىۋىتىنىڭ تەرەققىياتىغا توسالغۇ بولماسلىقى كېرەك. ھازىر، ياۋروپا دۇچ كەلگەن خىرىس جۇڭگودىن كەلگەن ئەمەس. جۇڭگو بىلەن ياۋروپا ئىتتىپاقى ئارىسىدا تۈپ مەنپەئەت توقۇنۇشى ۋە جۇغراپىيەلىك سىياسىي زىددىيەت يوق، ھەمكارلىق رىقابەتتىن كۆپ، ئورتاق تونۇش ئىختىلاپتىن كۆپ بولۇش ئاساسىي ھالىتى ۋە ئاساسىي رىتىمى ئۆزگەرگىنى يوق. جۇڭگو تەرەپ جۇڭگو − ياۋروپا ئىتتىپاقى مۇناسىۋىتىگە باشتىن - ئاخىر ئىستراتېگىيەلىك يۈكسەكلىك ۋە يىراق كەلگۈسى نۇقتىدىن مۇئامىلە قىلىپ ۋە ئۇنى راۋاجلاندۇرۇپ، ياۋروپانى كۆپ قۇتۇپلۇق دۇنيادىكى مۇھىم بىر قۇتۇپ دەپ قاراپ، ياۋروپانىڭ بىر گەۋدىلىشىشى ۋە ياۋروپا ئىتتىپاقىنىڭ ئىستراتېگىيەلىك ئۆزىگە ئۆزى ئىگە بولۇشىنى ئىزچىل قوللاپ كەلدى. ياۋروپا ئىتتىپاقى تەرەپنىڭمۇ جۇڭگو خەلقى تاللىغان يول ۋە تۈزۈمگە ھۆرمەت قىلىشىنى، جۇڭگونىڭ يادرولۇق مەنپەئىتى ۋە كۆڭۈل بۆلىدىغان مۇھىم ئىشلىرىغا ھۆرمەت قىلىشىنى، جۇڭگونىڭ تەرەققىياتى ۋە گۈللىنىشىنى قوللىشىنى ئۈمىد قىلىمىز. جۇڭگو − ياۋروپا ئىتتىپاقى مۇناسىۋىتى 3 - تەرەپكە قارىتىلمىغان، 3 - تەرەپكە بېقىنمايدۇ، شۇنداقلا 3 - تەرەپنىڭ چەكلىمىسىگىمۇ ئۇچرىمايدۇ. ئىككى تەرەپ ئىستراتېگىيەلىك پىكىر ئالماشتۇرۇشنى چوڭقۇرلاشتۇرۇپ، چۈشىنىش ۋە ئۆزئارا ئىشىنىشنى ئىلگىرى سۈرۈپ، توغرا بولغان ئۆزئارا تونۇشنى تىكلىشى كېرەك.
ئىككىنچى، ئېچىۋېتىش، ھەمكارلىشىشتا چىڭ تۇرۇپ، ئىختىلاپ ۋە سۈركىلىشنى مۇۋاپىق بىر تەرەپ قىلىش كېرەك. تارىخ ۋە رېئاللىق شۇنى ئىسپاتلىدىكى، بىر - بىرىگە تايىنىش خەۋپ - خەتەر ئەمەس، مەنپەئەتنىڭ يۇغۇرۇلۇشى تەھدىت ئەمەس، رىقابەت كۈچىنى ئاشۇرۇشتا «تام قوپۇرۇپ قورغان سېلىش»قا تايىنىشقا بولمايدۇ، «ئىلمەكتىن ئاجرىتىپ زەنجىرنى ئۈزۈش» پەقەت ئۆزىنى يېتىم قالدۇرىدۇ. «تايىنىش دەرىجىسىنى تۆۋەنلىتىش» دەپ ھەمكارلىقنى ئازايتىشقا بولمايدۇ. جۇڭگو − ياۋروپا ئىتتىپاقى ئىقتىساد - سودا مۇناسىۋىتىنىڭ ماھىيىتى ئەۋزەللىكلەر ئارقىلىق بىر - بىرىنى تولۇقلاش، ئۆزئارا مەنپەئەت يەتكۈزۈش ئاساسىدا ئورتاق پايدا ئېلىش، تەرەققىيات داۋامىدا ھەرىكەت ھالىتىدىكى تەڭپۇڭلۇقنى ئىشقا ئاشۇرۇش كېرەك ھەم تامامەن ئىشقا ئاشۇرغىلى بولىدۇ. جۇڭگونىڭ يۇقىرى سۈپەتلىك تەرەققىياتى، يۇقىرى سەۋىيەلىك سىرتقا ئېچىۋېتىشى جۇڭگو − ياۋروپا ئىتتىپاقى ھەمكارلىقىنى يېڭى پۇرسەت بىلەن تەمىنلەيدۇ، يېڭى بوشلۇقنى كېڭەيتىدۇ. جۇڭگو بىلەن ياۋروپا ئىتتىپاقى يېشىل ۋە رەقەملىك ھەمراھلىق مۇناسىۋىتىنى چوڭقۇرلاشتۇرۇپ، ئۆزئارا مەبلەغ سېلىش ھەمكارلىقىنى ئىلگىرى سۈرۈشى كېرەك. ياۋروپا ئىتتىپاقى تەرەپنىڭ سودا ۋە مەبلەغ سېلىش بازىرىنى ئېچىۋېتىشنى ساقلاپ، چەكلىمىلىك ئىقتىساد - سودا قوراللىرىنى ئىشلىتىشتە ئۆزىنى تۇتۇۋېلىپ، جۇڭگو كارخانىلىرىنىڭ ياۋروپاغا بېرىپ مەبلەغ سېلىپ كەسىپلەرنى گۈللەندۈرۈشى ئۈچۈن ياخشى تىجارەت - سودا مۇھىتى يارىتىپ بېرىشىنى ئۈمىد قىلىمىز.
ئۈچىنچى، كۆپ تەرەپچىلىكنى ئەمەلدە كۆرسىتىپ، خەلقئارا قائىدە، تەرتىپنى قوغداش كېرەك. ئۇرۇش ۋە تىنچلىق، رىقابەت ۋە ھەمكارلىق، بېكىنمىچىلىك ۋە ئېچىۋېتىشتىن ئىبارەت مۇھىم تاللاش ئالدىدا، كۆپ تەرەپچىلىك، ئىتتىپاقلىشىپ ھەمكارلىشىشلا توغرا جاۋاب. جۇڭگو بىلەن ياۋروپا ئىتتىپاقى 2 - دۇنيا ئۇرۇشى ئاخىرلاشقاندىن كېيىن ئورنىتىلغان خەلقئارا قائىدە ۋە خەلقئارا تەرتىپنى ئورتاق قوغداپ، دەۋر بىلەن تەڭ ئىلگىرىلەپ، تېخىمۇ ئادىل، مۇۋاپىق بولغان دۇنياۋى ئىدارە قىلىش سىستېمىسى بەرپا قىلىشقا تۈرتكە بولۇپ، قول تۇتۇشۇپ كىلىمات ئۆزگىرىشى قاتارلىق دۇنياۋى خىرىسلارغا تاقابىل تۇرۇپ، كۆپ تەرەپچىلىك مەشئىلى ئارقىلىق ئىنسانلارنىڭ ئالغا ئىلگىرىلەش يولىنى يورۇتۇشى كېرەك. جۇڭگو بىلەن ياۋروپا ئىتتىپاقى خەلقئارا تالاش - تارتىشلارنى سىياسىي ۋاسىتە ئارقىلىق تىنچ ھەل قىلىشنى قوللىشى كېرەك. جۇڭگو تەرەپ ئىزچىل تۈردە ئىشنىڭ ھەق - ناھەق، توغرا - خاتالىقىنى چىقىش قىلىپ، ياراشتۇرۇپ سۆھبەتنى ئىلگىرى سۈرۈشنى ياقلاپ كەلدى، ھادىسىدىنمۇ، ماھىيەتتىنمۇ تۈزەشنى تەشەببۇس قىلىپ كەلدى. جۇڭگو تەرەپ ياۋروپا ئىتتىپاقى تەرەپ بىلەن ماسلىشىشنى كۈچەيتىپ، بۇ يىللىق بىرلەشكەن دۆلەتلەر تەشكىلاتى كىلىمات ئۆزگىرىشى بېيلۇن يىغىنىنىڭ مۇۋەپپەقىيەتلىك ئۆتكۈزۈلۈشىگە تۈرتكە بولۇپ، كىلىمات ئۆزگىرىشىگە تاقابىل تۇرۇش ۋە يەرشارىۋى يېشىل تىپ ئۆزگەرتىش ئۈچۈن تېخىمۇ زور تۆھپە قوشۇشنى خالايدۇ. جۇڭگو تەرەپ يەنە ياۋروپا ئىتتىپاقى تەرەپ بىلەن سۈنئىي ئەقلىي ئىقتىدار ساھەسىدە سىياسەت جەھەتتە پىكىر ئالماشتۇرۇش ۋە ئەمەلىي ھەمكارلىقنى قانات يايدۇرۇپ، باراۋەر، تەرتىپلىك بولغان دۇنيانىڭ كۆپ قۇتۇپلىشىشى، ئومۇمىي مەنپەئەتدار، سىغدۇرۇشچان بولغان ئىقتىسادنىڭ دۇنياۋىلىشىشىغا ئورتاق تۈرتكە بولۇشنى خالايدۇ.
ياۋروپا ئىتتىپاقى تەرەپ مۇنداق بىلدۈردى: رەئىس شى جىنپىڭنىڭ ياۋروپا ئىتتىپاقى − جۇڭگو مۇناسىۋىتىگە ئالاقىدار ئۈچ نۇقتىلىق تەشەببۇسى ئىنتايىن مۇھىم. دىپلوماتىك مۇناسىۋەت ئورناتقان 50 يىلدىن بۇيان، ياۋروپا ئىتتىپاقى بىلەن جۇڭگو كەڭ ساھەدە ھەمكارلىقنى قانات يايدۇرۇپ، كۆلەم ۋە چوڭقۇرلۇقنى ئۈزلۈكسىز كېڭەيتىپ، بىر - بىرىنىڭ مۇھىم ھەمكارلىق ۋە سودا ھەمراھىغا ئايلىنىپ، ھەرقايسىسى ئۆز ئىقتىسادىنىڭ گۈللىنىشى ۋە خەلقىنىڭ بەخت - سائادىتىنى ئاشۇرۇشقا كۈچ قوشتى. جۇڭگو ياسىمىچىلىق ۋە پەن - تېخنىكا چوڭ دۆلىتىگە ئايلىنىپ، نەچچە يۈز مىليون كىشىنى نامراتلىقتىن قۇتۇلدۇردى، جۇڭگونىڭ تەرەققىياتى پۈتۈن دۇنيانى زىلزىلىگە سېلىپ، دۇنياغا زور ئىلھام بېغىشلىدى، ياۋروپا ئىتتىپاقى تەرەپ جۇڭگونىڭ تېخىمۇ زور تەرەققىياتقا ئېرىشىدىغانلىقىغا ئىشىنىدۇ ھەم قوللايدۇ. ياۋروپا ئىتتىپاقى بىلەن جۇڭگو ئوخشاشلا دۇنيادىكى مۇھىم كۈچ، ياۋروپا ئىتتىپاقى − جۇڭگو مۇناسىۋىتى ئىككى تەرەپ ۋە دۇنيا ئۈچۈن ئوخشاشلا ئىنتايىن مۇھىم. ياۋروپا ئىتتىپاقى تەرەپ ياۋروپا ئىتتىپاقى − جۇڭگو مۇناسىۋىتىنى چوڭقۇرلاشتۇرۇشقا كۈچ چىقىرىپ، ئىختىلاپلارنى ئىجادىي بىر تەرەپ قىلىپ، ئىككى تەرەپ ھەمكارلىقىنىڭ تەڭپۇڭ، باراۋەر، ئۆزئارا مەنپەئەت يەتكۈزۈش ئاساسىدا سىجىل تۈردە تېخىمۇ كۆپ ئىجابىي نەتىجىلەرنى قولغا كەلتۈرۈشىگە تۈرتكە بولىدۇ. ياۋروپا ئىتتىپاقى تەرەپ جۇڭگو بىلەن «ئىلمەكتىن ئاجرىتىپ زەنجىرنى ئۈزۈش» ئۈستىدە ئىزدەنمەيدۇ، جۇڭگو كارخانىلىرىنىڭ ياۋروپاغا كېلىپ مەبلەغ سېلىپ كەسىپلەرنى گۈللەندۈرۈشىنى قارشى ئالىدۇ. داۋالغۇش ۋە ئەنسىزلىككە، ئېنىقسىزلىققا تولغان دۇنيا ئالدىدا، ياۋروپا ئىتتىپاقى بىلەن جۇڭگو مەسئۇلىيەتنى زىممىگە ئېلىپ، كۆپ تەرەپچىلىكتە ئورتاق چىڭ تۇرۇپ، بىرلەشكەن دۆلەتلەر تەشكىلاتى نىزامنامىسىنىڭ ئاساسىي مەقسىتى ۋە پىرىنسىپىنى قوغداپ، قول تۇتۇشۇپ كىلىمات ئۆزگىرىشى قاتارلىق دۇنياۋى خىرىسلارغا تاقابىل تۇرۇپ، رايون قىزىق نۇقتا مەسىلىلىرىنى ھەل قىلىشقا تۈرتكە بولۇپ، دۇنيانىڭ تىنچلىقى، مۇقىملىقىنى قوغدىشى كېرەك. ياۋروپا ئىتتىپاقى تەرەپ جۇڭگو تەرەپ بىلەن بىرلىكتە، ياۋروپا ئىتتىپاقى − جۇڭگو مۇناسىۋىتىنىڭ كېيىنكى 50 يىلدىكى تېخىمۇ قالتىس سەھىپىسىنى داۋاملىق پۈتۈشنى ئۈمىد قىلىدۇ.
ۋاڭ يى كۆرۈشۈشكە قاتناشتى.