مەركەز شەھەر خىزمىتى يىغىنى بېيجىڭدا ئۆتكۈزۈلدى

​شى جىنپىڭ مۇھىم سۆز قىلدى، لى چياڭ خۇلاسە سۆزى قىلدى، جاۋ لېجى، ۋاڭ خۇنىڭ، سەي چى، دىڭ شۆشياڭ، لى شى يىغىنغا قاتناشتى

7 - ئاينىڭ 14 - كۈنىدىن 15 - كۈنىگىچە، مەركەز شەھەر خىزمىتى يىغىنى بېيجىڭدا ئۆتكۈزۈلدى. جۇڭگو كوممۇنىستىك پارتىيەسى مەركىزىي كومىتېتىنىڭ باش شۇجىسى، دۆلەت رەئىسى، مەركىزىي ھەربىي كومىتېتنىڭ رەئىسى شى جىنپىڭ يىغىنغا قاتناشتى ھەم مۇھىم سۆز قىلدى. □شىنخۇا ئاگېنتلىقى مۇخبىرى شيې خۇەنچى فوتوسى

شىنخۇا ئاگېنتلىقى، بېيجىڭ، 7 - ئاينىڭ 15 - كۈنى تېلېگراممىسى مەركەز شەھەر خىزمىتى يىغىنى 7 - ئاينىڭ 14 - كۈنىدىن 15 - كۈنىگىچە بېيجىڭدا ئۆتكۈزۈلدى. جۇڭگو كوممۇنىستىك پارتىيەسى مەركىزىي كومىتېتىنىڭ باش شۇجىسى، دۆلەت رەئىسى، مەركىزىي ھەربىي كومىتېتنىڭ رەئىسى شى جىنپىڭ يىغىنغا قاتناشتى ھەم مۇھىم سۆز قىلدى. جۇڭگو كوممۇنىستىك پارتىيەسى مەركىزىي كومىتېتى سىياسىي بىيۇروسى دائىمىي كومىتېتىنىڭ ئەزاسى لى چياڭ، جاۋ لېجى، ۋاڭ خۇنىڭ، سەي چى، دىڭ شۆشياڭ، لى شى يىغىنغا قاتناشتى.

شى جىنپىڭ مۇھىم سۆزىدە يېڭى دەۋردىن بۇيانقى دۆلىتىمىزنىڭ شەھەر تەرەققىيات مۇۋەپپەقىيەتلىرىنى خۇلاسىلىدى، شەھەر خىزمىتى يۈزلەنگەن ۋەزىيەتنى تەھلىل قىلدى، شەھەر خىزمىتىنى ياخشى ئىشلەشنىڭ ئومۇمىي تەلىپى، مۇھىم پىرىنسىپى، نۇقتىلىق ۋەزىپىسىنى ئايدىڭلاشتۇردى. لى چياڭ خۇلاسە سۆزى قىلىپ، باش شۇجى شى جىنپىڭنىڭ مۇھىم سۆزىنىڭ روھىنى ئىزچىللاشتۇرۇش، ئەمەلىيلەشتۈرۈش، شەھەر خىزمىتىنى يەنىمۇ ياخشى ئىشلەش توغرىسىدا كونكرېت ئورۇنلاشتۇرما قىلدى.

يىغىندا مۇنداق كۆرسىتىلدى: پارتىيە 18 - قۇرۇلتىيىدىن بۇيان، پارتىيە مەركىزىي كومىتېتى يېڭى ۋەزىيەتتىكى دۆلىتىمىزنىڭ شەھەر تەرەققىيات قانۇنىيىتىنى چوڭقۇر ئىگىلەپ، پارتىيەنىڭ شەھەر خىزمىتىگە بولغان ئومۇميۈزلۈك رەھبەرلىكىدە چىڭ تۇرۇپ، خەلقنىڭ شەھىرىنى خەلق قۇرۇش، خەلقنىڭ شەھىرى خەلقنى كۆزلەشتە چىڭ تۇرۇپ، شەھەرنى ئورگانىك ھاياتلىق گەۋدىسى سۈپىتىدە سىستېمىلىق پىلانلاشتا چىڭ تۇرۇپ، شەھەر تەرەققىياتىدا تارىخىي مۇۋەپپەقىيەتلەرنى قولغا كەلتۈرۈشكە تۈرتكە بولدى، دۆلىتىمىزنىڭ يېڭىچە شەھەر - بازارلاشتۇرۇش سەۋىيەسى ۋە شەھەر تەرەققىياتى ئىقتىدار دەرىجىسى، پىلانلاش، قۇرۇش، ئىدارە قىلىش سەۋىيەسى، كەسىپ بىلەن شۇغۇللىنىشقا، ئولتۇراقلىشىشقا ماس كېلىش سەۋىيەسى، تارىخىي مەدەنىيەتنى قوغداش ۋە ئۇنىڭغا ۋارىسلىق قىلىش سەۋىيەسى، ئېكولوگىيە - مۇھىت سۈپىتى زور دەرىجىدە ئۆستى.

يىغىندا مۇنداق تەكىتلەندى: ھازىرقى ۋە بۇنىڭدىن كېيىنكى بىر مەزگىلدىكى شەھەر خىزمىتىنىڭ ئومۇمىي تەلىپى: شى جىنپىڭ يېڭى دەۋر جۇڭگوچە سوتسىيالىزم ئىدىيەسىنى يېتەكچى قىلىشتا چىڭ تۇرۇپ، پارتىيە 20 - قۇرۇلتىيى ۋە 20 - نۆۋەتلىك مەركىزىي كومىتېتى 2 -، 3 - ئومۇمىي يىغىنىنىڭ روھىنى چوڭقۇر ئىزچىللاشتۇرۇپ، باش شۇجى شى جىنپىڭنىڭ شەھەر خىزمىتى توغرىسىدىكى مۇھىم بايانلىرىنى ئومۇميۈزلۈك ئىزچىللاشتۇرۇپ، پارتىيەنىڭ ئومۇميۈزلۈك رەھبەرلىكىدە چىڭ تۇرۇپ ۋە ئۇنى كۈچەيتىپ، خەلقنىڭ شەھىرى ئىدىيەسىنى ئەستايىدىل ئەمەلدە كۆرسىتىپ، مۇقىملىق ئاساسىدا ئىلگىرىلەش خىزمەت باش رىتىمىدا چىڭ تۇرۇپ، شارائىتقا قاراپ ئىش كۆرۈش، تۈرگە ئايرىپ يېتەكچىلىك قىلىشتا چىڭ تۇرۇپ، يېڭىلىق يارىتىلغان، ئولتۇراقلىشىشقا ماس كېلىدىغان، گۈزەل، ئەۋرىشىم، مەدەنىي، ئاقىل زامانىۋىلاشقان خەلق شەھىرى قۇرۇشنى نىشان، شەھەرنىڭ يۇقىرى سۈپەتلىك تەرەققىياتىغا تۈرتكە بولۇشنى باش تېما، شەھەرنىڭ ئىچكى ئامىللىق تەرەققىياتىدا چىڭ تۇرۇشنى ئاساسىي لىنىيە، شەھەرنى يېڭىلاشنى ئالغا سىلجىتىشنى مۇھىم تۇتقا قىلىپ، شەھەر قۇرۇلمىسىنى سەرخىللاشتۇرۇش، قۇۋۋىتىنى ئۆزگەرتىش، سۈپىتىنى ئۆستۈرۈش، يېشىل تىپ ئۆزگەرتىش، مەدەنىيەت تومۇرىنى داۋاملاشتۇرۇش، ئىدارە قىلىش ئۈنۈمىنى ئاشۇرۇشقا زور كۈچ بىلەن تۈرتكە بولۇپ، شەھەر بىخەتەرلىكى تۆۋەن چېكىنى چىڭ ساقلاپ، جۇڭگوچە شەھەر زامانىۋىلاشتۇرۇش يېڭى يولىنى تېپىپ چىقىش.

يىغىندا مۇنداق كۆرسىتىلدى: دۆلىتىمىزنىڭ شەھەر - بازارلىشىشى تېز ئېشىش مەزگىلىدىن مۇقىم تەرەققىي قىلىش مەزگىلىگە ئۆتمەكتە، شەھەر تەرەققىياتى كەڭ كۆلەمدە ئاشۇرۇلما مىقدارنى كېڭەيتىش باسقۇچىدىن ساقلانما مىقدارنىڭ سۈپىتىنى ئۆستۈرۈپ ئۈنۈمىنى ئاشۇرۇشنى ئاساس قىلىش باسقۇچىغا ئۆتمەكتە. شەھەر خىزمىتىدە ۋەزىيەتنىڭ ئۆزگىرىشىنى چوڭقۇر ئىگىلەپ، ئۇنىڭغا تەشەببۇسكارلىق بىلەن ئۇيغۇنلىشىپ، شەھەر تەرەققىيات ئىدىيەسىنى ئۆزگەرتىپ، ئادەمنى ئاساس قىلىشقا تېخىمۇ ئەھمىيەت بېرىش كېرەك؛ شەھەرنىڭ تەرەققىيات شەكلىنى ئۆزگەرتىپ، تۈجۈپىلىك، يۇقىرى ئۈنۈملۈك بولۇشقا تېخىمۇ ئەھمىيەت بېرىش كېرەك؛ شەھەرنىڭ تەرەققىيات ھەرىكەتلەندۈرگۈچ كۈچىنى ئۆزگەرتىپ، ئۆزگىچە تەرەققىياتىغا تېخىمۇ ئەھمىيەت بېرىش كېرەك؛ شەھەر خىزمىتىنىڭ ئېغىرلىق مەركىزىنى ئۆزگەرتىپ، ئىدارە قىلىش سېلىنمىسىغا تېخىمۇ ئەھمىيەت بېرىش كېرەك؛ شەھەر خىزمىتى ئۇسۇلىنى ئۆزگەرتىپ، بىرتۇتاش پىلانلاپ ماسلاشتۇرۇشقا تېخىمۇ ئەھمىيەت بېرىش كېرەك.

يىغىندا شەھەر خىزمىتىگە دائىر يەتتە جەھەتتىكى نۇقتىلىق ۋەزىپە ئورۇنلاشتۇرما قىلىندى. بىرىنچى، زامانىۋىلاشقان شەھەر سىستېمىسىنى كۈچەپ ئەلالاشتۇرۇش. شەھەرلەرنىڭ نوپۇس ۋە ئىقتىساد، جەمئىيەت تەرەققىياتىغا بولغان ئۇنىۋېرسال كۆتۈرۈش ئىقتىدارىنى ئۆستۈرۈشنى كۆزدە تۇتۇپ، ئۆمەك تەشكىللەش شەكلىدىكى، تورلاشقان زامانىۋىلاشقان شەھەر توپى ۋە مەركىزىي شەھەر چەمبىرىكىنى تەرەققىي قىلدۇرۇپ، ناھىيە بازىرىنى مۇھىم ۋاسىتە قىلغان شەھەر - بازارلاشتۇرۇش قۇرۇلۇشىنى تۈرگە ئايرىپ ئالغا سىلجىتىپ، يېزا ئىگىلىك يۆتكەلمە ئاھالىسىنىڭ شەھەر ئاھالىسىگە ئايلىنىشىنى داۋاملىق ئالغا سىلجىتىپ، چوڭ، ئوتتۇرا، كىچىك شەھەرلەر ۋە كىچىك شەھەر - بازارلارنىڭ ماس تەرەققىياتىنى ئىلگىرى سۈرۈش، شەھەر - يېزىلارنىڭ يۇغۇرما تەرەققىياتىنى ئىلگىرى سۈرۈش. ئىككىنچى، ھاياتىي كۈچكە تولغان يېڭىلىق يارىتىش شەھىرىنى كۈچەپ بەرپا قىلىش. يېڭىلىق يارىتىش ئېكولوگىيەسىنى كۆڭۈل قويۇپ يېتىلدۈرۈپ، يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇشتا ئۈزلۈكسىز بۆسۈش ھاسىل قىلىش؛ ئىسلاھات - ئېچىۋېتىشكە تايىنىپ، شەھەر قۇۋۋىتىنى كۈچەيتىپ، شەھەر يېڭىلاشنى يۇقىرى سۈپەتلىك قانات يايدۇرۇپ، شەھەرنىڭ دۆلەت ئىچى، خەلقئارادىن ئىبارەت قوش ئايلىنىشتىكى تۈگۈنلۈك رولىنى تولۇق جارى قىلدۇرۇش. ئۈچىنچى، ئازادە، قولايلىق، ئولتۇراقلىشىشقا ماس كېلىدىغان شەھەرنى كۈچەپ بەرپا قىلىش. نوپۇس، كەسىپ، شەھەر - بازار، قاتناشنى بىر گەۋدىلەشتۈرۈپ پىلانلاشتا چىڭ تۇرۇپ، شەھەرنىڭ بوشلۇق قۇرۇلمىسىنى ئەلالاشتۇرۇش؛ ئۆي - زېمىن تەرەققىياتى يېڭى ئەندىزىسى بەرپا قىلىشنى تېزلىتىپ، شەھەر ئىچىدىكى كەنتلەر ۋە خەتەرلىك، كونا ئۆيلەرنى ئۆزگەرتىشنى پۇختا قەدەم بىلەن ئالغا سىلجىتىش؛ تۇرمۇش خاراكتېرلىك مۇلازىمەت كەسپىنى زور كۈچ بىلەن راۋاجلاندۇرۇپ، ئاممىۋى مۇلازىمەت سەۋىيەسىنى ئۆستۈرۈپ، خەلق تۇرمۇشى تۆۋەن چېكىنى مەھكەم ساقلاش. تۆتىنچى، يېشىل، تۆۋەن كاربونلۇق گۈزەل شەھەرنى كۈچەپ بەرپا قىلىش. ئېكولوگىيە - مۇھىتنى تۈزەش نەتىجىلىرىنى مۇستەھكەملەپ، تېخىمۇ ئۈنۈملۈك تەدبىر قوللىنىپ، شەھەر ئاتموسفېراسىنى تۈزەش، ئىچىدىغان سۇ مەنبەسىنى قوغداش، يېڭى بۇلغىمىلارنى تىزگىنلەش قاتارلىق جەھەتلەردىكى مەسىلىلەرنى ھەل قىلىپ، بۇلغىنىشنى ئازايتىش، كاربون قويۇپ بېرىشنى تۆۋەنلىتىش، يېشىللىق كۆلىمىنى كېڭەيتىشتە ماس ھالدا ئۈنۈمنى ئاشۇرۇشقا تۈرتكە بولۇپ، شەھەرلەردىكى جانلىقلارنىڭ كۆپ خىللىقىنى ئاشۇرۇش. بەشىنچى، بىخەتەر، ئىشەنچلىك بولغان ئەۋرىشىم شەھەرنى كۈچەپ بەرپا قىلىش. شەھەر ئۇل ئەسلىھەلىرىنىڭ جان تومۇر بىخەتەرلىك قۇرۇلۇشىنى ئالغا سىلجىتىپ، كونا تۇرۇبا لىنىيەلىرىنى ئۆزگەرتىش، دەرىجىسىنى ئۆستۈرۈشنى تېزلىتىش؛ دەرىجىدىن تاشقىرى ئېگىز ئىمارەتلەرگە قاتتىق چەك قويۇپ، ئۆي بىخەتەرلىكىگە كاپالەتلىك قىلىش سەۋىيەسىنى ئومۇميۈزلۈك ئۆستۈرۈش؛ شەھەرلەردە تەبىئىي ئاپەتنىڭ ئالدىنى ئېلىش - تىزگىنلەشنى كۈچەيتىپ، شەھەرلەردە كەلكۈندىن مۇداپىئەلىنىش سىستېمىسى ۋە ھۆلچىلىكنى تىزگىنلەشنى بىرتۇتاش پىلانلاش؛ جەمئىيەت ئامانلىقى بويىچە ئومۇميۈزلۈك ئالدىنى ئېلىش - تىزگىنلەشنى كۈچەيتىپ، شەھەرلەرنىڭ ئاممىۋى بىخەتەرلىكىنى ھەقىقىي قوغداش. ئالتىنچى، ئەخلاق - پەزىلەتنى ئۇلۇغلاپ، ياخشىلىققا ئىنتىلىدىغان مەدەنىي شەھەرنى كۈچەپ بەرپا قىلىش. تارىخىي مەدەنىيەتنى قوغداش ۋە ئۇنىڭغا ۋارىسلىق قىلىش سىستېمىسىنى مۇكەممەللەشتۈرۈپ، شەھەر قىياپىتىنى باشقۇرۇش تۈزۈمىنى مۇكەممەللەشتۈرۈپ، شەھەرنىڭ ئۆزگىچە تارىخىي مەدەنىيەت تومۇرى، ئادىمىيەت، جۇغراپىيەسى، تەبىئىي مەنزىرىسىنى قوغداش؛ شەھەرنىڭ مەدەنىيەت يۇمشاق ئەمەلىي كۈچى قۇرۇلۇشىنى كۈچەيتىپ، شەھەر ئاھالىسىنىڭ مەدەنىيلىك ساپاسىنى ئۆستۈرۈش. يەتتىنچى، قولايلىق، يۇقىرى ئۈنۈملۈك ئاقىل شەھەرنى كۈچەپ بەرپا قىلىش. پارتىيە قۇرۇلۇشى ئارقىلىق يېتەكلەشتە چىڭ تۇرۇپ، شەھەرنى قانۇن بويىچە ئىدارە قىلىشتا چىڭ تۇرۇپ، شەھەرنى ئىدارە قىلىش ئىدىيەسى، ئەندىزىسى، ۋاسىتىسىدە يېڭىلىق يارىتىپ، شەھەر ئاھالىسى مۇلازىمەت قىزىق لىنىيەسى قاتارلىق مېخانىزملاردىن ياخشى پايدىلىنىپ، ئامما ئالدىراۋاتقان، قىينىلىۋاتقان، غەم قىلىۋاتقان، ئارزۇ قىلىۋاتقان مەسىلىلەرنى يۇقىرى ئۈنۈملۈك ھەل قىلىش.

يىغىندا مۇنداق تەكىتلەندى: زامانىۋىلاشقان خەلقنىڭ شەھىرىنى قۇرۇشتا، جەزمەن پارتىيەنىڭ شەھەر خىزمىتىگە بولغان ئومۇميۈزلۈك رەھبەرلىكىنى كۈچەيتىش كېرەك. رەھبەرلىك تۈزۈلمىسى ۋە خىزمەت مېخانىزمىنى يەنىمۇ تاكامۇللاشتۇرۇپ، شەھەر سىياسىتىنىڭ ماسلىشىشچانلىقىنى ئاشۇرۇپ، ھەرقايسى تەرەپلەرنىڭ ئىجرا قىلىش كۈچىنى كۈچەيتىش كېرەك. توغرا سىياسىي نەتىجە قارىشىنى تۇرغۇزۇپ ۋە ئەمەلدە كۆرسىتىپ، ئىلمىي بولغان شەھەر تەرەققىياتىنى باھالاش سىستېمىسىنى ئورنىتىپ، تاكامۇللاشتۇرۇپ، شەھەر خىزمىتى قوشۇنىنىڭ ساپاسى ۋە ئىقتىدار قۇرۇلۇشىنى كۈچەيتىپ، كەڭ پارتىيە ئەزالىرى، كادىرلارنى ئىش قىلىپ نەتىجە يارىتىشقا، مەسئۇلىيەتنى زىممىگە ئېلىپ نەتىجە يارىتىشقا رىغبەتلەندۈرۈش كېرەك. ھەقىقەتنى ئەمەلىيەتتىن ئىزدەش، راستچىل - ئەمەلىيەتچىل بولۇشتا چىڭ تۇرۇپ، شەكىلۋازلىق، بىيۇروكراتلىققا قەتئىي قارشى تۇرۇش كېرەك.

يىغىندا مۇنداق كۆرسىتىلدى: باش شۇجى شى جىنپىڭنىڭ مۇھىم سۆزىدە شەھەرنىڭ تەرەققىياتى كىم ئۈچۈن بولۇش، كىمگە تايىنىش ھەمدە قانداق شەھەر قۇرۇش، شەھەرنى قانداق قۇرۇش قاتارلىق مۇھىم نەزەرىيە ۋە ئەمەلىيەت مەسىلىلىرىگە ئىلمىي جاۋاب بېرىلىپ، يېڭى دەۋر، يېڭى مۇساپىدىكى شەھەر خىزمىتىنى ياخشى ئىشلەشنى تۈپ قوللانما بىلەن تەمىنلىدى، ئەستايىدىل ئۆگىنىپ، ئۆزلەشتۈرۈپ، ئەمەلىيلەشتۈرۈشنى كەم - كوتسىز ياخشى تۇتۇش كېرەك. دۆلىتىمىزنىڭ شەھەر تەرەققىياتىنىڭ تۇرۇۋاتقان تارىخىي ئورنىنى چوڭقۇر ئىگىلەپ، شەھەر خىزمىتىنى تېخىمۇ كەڭ نەزەر دائىرە بىلەن ياخشى ئىشلەش كېرەك؛ زامانىۋىلاشقان خەلقنىڭ شەھىرىنى قۇرۇش نىشانى، ئورۇن بېكىتمىسىنى چوڭقۇر ئىگىلەپ، خەلقنى مەركەز قىلغان تەرەققىيات ئىدىيەسىنى ئاڭلىق ئەمەلدە كۆرسىتىش كېرەك؛ شەھەرنىڭ ئىچكى ئامىللىق تەرەققىياتىنىڭ ئىستراتېگىيەلىك يۆنىلىشىنى چوڭقۇر ئىگىلەپ، شەھەرنىڭ تەرەققىيات سۈپىتىنى تېخىمۇ قاراتمىلىق ئۆستۈرۈش كېرەك؛ شەھەر تەرەققىياتىنىڭ ھەرىكەتلەندۈرگۈچ كۈچى، ھاياتىي كۈچىنى ئاشۇرۇشنىڭ ئىچكى تەلىپىنى چوڭقۇر ئىگىلەپ، ئىسلاھ قىلىش، يېڭىلىق يارىتىش چوڭ ئىشىنى ياخشى ئىشلەش كېرەك؛ شەھەر خىزمىتىنىڭ سىستېمىلىقلىقى، مۇرەككەپلىكىنى چوڭقۇر ئىگىلەپ، تۈرلۈك ۋەزىپە، ئورۇنلاشتۇرمىلارنى ئەمەلىيلەشتۈرۈش ئىقتىدارىنى كۈچەپ ئۆستۈرۈش كېرەك.

جۇڭگو كوممۇنىستىك پارتىيەسى مەركىزىي كومىتېتى سىياسىي بىيۇروسىنىڭ ئەزالىرى، مەركىزىي كومىتېت شۇجىچۇسىنىڭ شۇجىلىرى، مەملىكەتلىك خەلق قۇرۇلتىيى دائىمىي كومىتېتىدىكى ئالاقىدار رەھبىرىي يولداشلار، دۆلەت ئىشلىرى كومىسسارلىرى، ئالىي خەلق سوت مەھكىمىسىنىڭ باشلىقى، ئالىي خەلق تەپتىش مەھكىمىسىنىڭ باش تەپتىشى، مەملىكەتلىك سىياسىي كېڭەشتىكى ئالاقىدار رەھبىرىي يولداشلار قاتارلىقلار يىغىنغا قاتناشتى.

ھەرقايسى ئۆلكە، ئاپتونوم رايون، بىۋاسىتە قاراشلىق شەھەرلەر ۋە شىنجاڭ ئىشلەپچىقىرىش - قۇرۇلۇش بىڭتۇەنى پارتىيە كومىتېتى، ھۆكۈمەتتىكى ئاساسلىق مەسئۇل يولداشلار ۋە شەھەر خىزمىتىنى باشقۇرىدىغان مەسئۇل يولداشلار، پىلانى ئايرىم تۈزۈلىدىغان شەھەرلەر، ئۆلكە مەركىزى شەھەرلىرى، ئالاقىدار ۋىلايەت دەرىجىلىك شەھەرلەر پارتىيە كومىتېتلىرىدىكى ئاساسلىق مەسئۇل يولداشلار، مەركەز ۋە دۆلەت ئورگانلىرىنىڭ ئالاقىدار تارماقلىرى، ئالاقىدار خەلق تەشكىلاتلىرى، مەركەز باشقۇرۇشىدىكى قىسمەن پۇل مۇئامىلە ئاپپاراتلىرى، كارخانىلار ۋە ئالىي مەكتەپلەر، مەركىزىي ھەربىي كومىتېت ئورگىنىنىڭ ئالاقىدار تارماقلىرىدىكى ئاساسلىق مەسئۇل يولداشلار قاتارلىقلار يىغىنغا قاتناشتى.