7 - ئاينىڭ 25 - كۈنى چۈشتىن بۇرۇن، دۆلەت رەئىسى شى جىنپىڭ بېيجىڭ خەلق سارىيىدا جۇڭگودا تۇرۇشلۇق 16 باش ئەلچى تاپشۇرغان دۆلەت خېتىنى قوبۇل قىلدى. سۈرەتتە: مۇراسىم ئاياغلاشقاندىن كېيىن، شى جىنپىڭ بېيجىڭ زالىدا ئەلچىلەرگە سۆز قىلماقتا. □شىنخۇا ئاگېنتلىقى مۇخبىرى شيې خۇەنچى فوتوسى
شىنخۇا ئاگېنتلىقى، بېيجىڭ، 7 - ئاينىڭ 25 - كۈنى تېلېگراممىسى (مۇخبىرلار شاۋ يىبو، ساۋ جيايۆ) 7 - ئاينىڭ 25 - كۈنى چۈشتىن بۇرۇن، دۆلەت رەئىسى شى جىنپىڭ بېيجىڭ خەلق سارىيىدا جۇڭگودا تۇرۇشلۇق 16 باش ئەلچى تاپشۇرغان دۆلەت خېتىنى قوبۇل قىلدى.
خەلق سارىيىنىڭ شىمالىي دەرۋازىسى سىرتىدا، مۇراسىم ئەسكەرلىرى ھەيۋەتلىك سەپ تۈزۈپ تۇردى، مېھمان كۈتۈش بۇرغىسى چېلىندى. ئەلچىلەر ئارقا - ئارقىدىن يېتىپ كېلىپ، بايراق سېپىدىن ئۆتۈپ، ئاق مەرمەر پەلەمپەينى بويلاپ يۇقىرىغا چىقتى.
«تاغ - دەريالار شۇنچە گۈزەل» ناملىق غايەت زور تام رەسىمى ئالدىدا، شى جىنپىڭ ئايرىم - ئايرىم ھالدا ئەلچىلەر تاپشۇرغان دۆلەت خېتىنى قوبۇل قىلدى ھەم ئۇلار بىلەن بىر - بىرلەپ سۈرەتكە چۈشتى.
ئۇلار: ۋيېتنامنىڭ جۇڭگودا تۇرۇشلۇق باش ئەلچىسى فەن چىڭپىڭ، پانامانىڭ جۇڭگودا تۇرۇشلۇق باش ئەلچىسى لېي مىڭ، دومىنىكانىڭ جۇڭگودا تۇرۇشلۇق باش ئەلچىسى گومېز، ئالبانىيەنىڭ جۇڭگودا تۇرۇشلۇق باش ئەلچىسى بوردا، يېڭى زېللاندىيەنىڭ جۇڭگودا تۇرۇشلۇق باش ئەلچىسى چياۋ ۋېنبو، پاپۇئا يېڭى گىۋىنېيەسىنىڭ جۇڭگودا تۇرۇشلۇق باش ئەلچىسى كامبانېي، ئانگولانىڭ جۇڭگودا تۇرۇشلۇق باش ئەلچىسى ئاللېن، مىسىرنىڭ جۇڭگودا تۇرۇشلۇق باش ئەلچىسى نازمى، نىكاراگۇئانىڭ جۇڭگودا تۇرۇشلۇق باش ئەلچىسى كۇڭ لېرەن، ئىراننىڭ جۇڭگودا تۇرۇشلۇق باش ئەلچىسى فازلى، چىلىنىڭ جۇڭگودا تۇرۇشلۇق باش ئەلچىسى ئارىياران، ئۇكرائىنانىڭ جۇڭگودا تۇرۇشلۇق باش ئەلچىسى نېچتايلو، بېنىننىڭ جۇڭگودا تۇرۇشلۇق باش ئەلچىسى ئاجابا، ئامېرىكىنىڭ جۇڭگودا تۇرۇشلۇق باش ئەلچىسى پاڭ دېۋېي، ئىسرائىلىيەنىڭ جۇڭگودا تۇرۇشلۇق باش ئەلچىسى بېي يىلى، جەنۇبىي سۇداننىڭ جۇڭگودا تۇرۇشلۇق باش ئەلچىسى موررىس. شى جىنپىڭ يەنە شاڭخەي ھەمكارلىق تەشكىلاتىنىڭ باش كاتىپى يېرمەكبايېف بىلەن كۆرۈشتى.
مۇراسىم ئاخىرلاشقاندىن كېيىن، شى جىنپىڭ بېيجىڭ زالىدا ئەلچىلەرگە سۆز قىلدى.
شى جىنپىڭ ئەلچىلەرنىڭ جۇڭگوغا كېلىپ يېڭى ۋەزىپىنى ئادا قىلىشىنى قارشى ئالدى، ئۇلارغا ئۆز دۆلەتلىرىنىڭ رەھبەرلىرى ۋە خەلقىگە بولغان ياخشى تىلىكىنى يەتكۈزۈپ قويۇشنى ئېيتتى، باش ئەلچىلەرنىڭ جۇڭگونى ئومۇميۈزلۈك، چوڭقۇر چۈشىنىپ، جۇڭگو بىلەن ھەرقايسى دۆلەتلەرنىڭ دوستلۇقىنى چوڭقۇرلاشتۇرۇش، جۇڭگو بىلەن دۇنيانىڭ ئارىلىشىشىنى ئىلگىرى سۈرۈش ئۈچۈن پائال تۆھپە قوشۇشىنى ئۈمىد قىلدى.
شى جىنپىڭ مۇنداق كۆرسەتتى: جۇڭگو دۇنيادىكى ھەرقايسى دۆلەت خەلقى بىلەن بولغان دوستلۇق مېھرىنى باشتىن - ئاخىر قەدىرلەيدۇ، ئۆزئارا ھۆرمەت قىلىش، باراۋەر مۇئامىلىدە بولۇش، ئۆزئارا مەنپەئەت يەتكۈزۈش ئاساسىدا ئورتاق پايدا ئېلىش ئاساسىدا ھەرقايسى دۆلەتلەر بىلەن ھەر تەرەپلىمە ھەمكارلىقنى قانات يايدۇرۇپ، ھەرقايسى ساھەلەردىكى ئالماشتۇرۇشنى كۈچەيتىشنى خالايدۇ. ھازىر، جۇڭگو قۇدرەتلىك دۆلەت قۇرۇش، مىللەتنى گۈللەندۈرۈش ئۇلۇغ ئىشلىرىنى جۇڭگوچە زامانىۋىلاشتۇرۇش ئارقىلىق ئومۇميۈزلۈك ئالغا سىلجىتىۋاتىدۇ، ئىقتىساد سىجىل تۈردە مۇقىم بولۇش ئاساسىدا يۈكسىلىۋاتىدۇ. جۇڭگو يۇقىرى سەۋىيەلىك سىرتقا ئېچىۋېتىشنى قەتئىي تەۋرەنمەي كېڭەيتىپ، دەرىجىدىن تاشقىرى چوڭ كۆلەمدە بازار پايدىسىنى جانلاندۇرۇپ، جۇڭگونىڭ يېڭى تەرەققىياتىنى ھەرقايسى دۆلەتلەرنىڭ يېڭى پۇرسىتىگە ئايلاندۇرۇپ، دۇنيا ئىقتىسادىنىڭ ئېشىشىغا تېخىمۇ كۆپ ئېنىقلىق قوشىدۇ.
شى جىنپىڭ مۇنداق تەكىتلىدى: دۇنيادا يۈز يىللىق ئۆزگىرىش ۋەزىيىتى تېز سۈرئەتتە ئۆزگىرىۋاتقان، ئۆزگىرىش ۋە قالايمىقانچىلىق گىرەلىشىپ كەتكەن خەلقئارا ۋەزىيەتتە، ھەرقايسى دۆلەتلەرنىڭ ئىتتىپاقلىشىپ ۋە ھەمكارلىشىپ، ئارازلىق ۋە توقۇنۇشتىن كەڭ قورساقلىق بىلەن ھالقىپ ئۆتۈشىگە، ئىنسانىيەت تەقدىرىگە چوڭقۇر مېھىر - مۇھەببەت بىلەن كۆڭۈل بۆلۈشىگە ئىلگىرىكى ھەرقانداق ۋاقىتتىكىدىنمۇ بەكرەك ئېھتىياجلىق. بۇ يىل جۇڭگو خەلقىنىڭ ياپون تاجاۋۇزچىلىرىغا قارشى تۇرۇش ئۇرۇشى ھەم دۇنيا فاشىزمغا قارشى تۇرۇش ئۇرۇشى غەلىبىسىنىڭ 80 يىللىقى، شۇنداقلا بىرلەشكەن دۆلەتلەر تەشكىلاتى قۇرۇلغانلىقىنىڭ 80 يىللىقى. جۇڭگو ھەرقايسى دۆلەتلەر بىلەن بىرلىكتە، بىرلەشكەن دۆلەتلەر تەشكىلاتىنى يادرو قىلغان خەلقئارا سىستېما ۋە خەلقئارا قانۇننى ئاساس قىلغان خەلقئارا تەرتىپنى قەتئىي قوغداپ، دوستانە ھەمكارلىقنى ئەمەلدە كۆرسەتكۈچى، مەدەنىيلىك جەھەتتە ئۆزئارا ئۆرنەك ئېلىشقا تۈرتكە بولغۇچى، ئىنسانىيەت تەقدىرى ئورتاق گەۋدىسىنى بەرپا قىلغۇچىلاردىن بولۇپ، قول تۇتۇشۇپ بۇ پىلانېتانىڭ تېخىمۇ گۈزەل كەلگۈسىنى يارىتىشنى خالايدۇ.
ۋاڭ يى يۇقىرىقى پائالىيەتلەرگە قاتناشتى.