شىنجاڭ گېزىتى، ئۈرۈمچى، 8 - ئاينىڭ 26 - كۈنى خەۋىرى ئانار بۇلۇت\شىنجاڭ گېزىتى مۇخبىرى سۈي يۈنيەن خەۋەر قىلىدۇ: 8 - ئاينىڭ 26 - كۈنى، 3 - نۆۋەتلىك تېررورلۇققا قارشى تۇرۇش خەلقئارا مۇھاكىمە يىغىنى ئۈرۈمچىدە ئۆتكۈزۈلدى، جۇڭگولۇق ۋە چەت ئەللىك ئەزىز مېھمانلار بىر يەرگە جەم بولۇپ، دۇنيانىڭ تېررورىزم تەھدىتىگە تاقابىل تۇرۇش ۋەزىيىتى ۋە ئۇنى ھەل قىلىش يوللىرى ئۈستىدە مۇھاكىمە ئېلىپ باردى، ھەرقايسى دۆلەتلەرنىڭ تېررورلۇققا قارشى تۇرۇش ۋە ئەسەبىيلىكنى تۈگىتىش ساھەسىدىكى پىشىپ يېتىلگەن ئۇسۇلىدىن ئۆگىنىپ، ئۆرنەك ئېلىپ، تېررورلۇققا قارشى تۇرۇش ئىقتىدارى، سەۋىيەسىنى ئورتاق ئۆستۈرۈپ، تېررورلۇققا قارشى تۇرۇش خەۋپسىزلىك ھەمكارلىقىنىڭ يېڭى سەھىپىسىنى ئاچتى.
بۇ قېتىمقى مۇھاكىمە يىغىنىنى ئاپتونوم رايونلۇق خەلق ھۆكۈمىتى تاشقى ئىشلار ئىشخانىسى، جۇڭگو خەلقئارا مەسىلىلەر تەتقىقات ئورنى ۋە دۇنيا مۇسۇلمانلار رايونى كېڭىشى بىرلىكتە ئۆتكۈزدى ھەم جۇڭگو دىپلوماتىيە مىنىستىرلىقى ۋە ئاپتونوم رايونلۇق خەلق ھۆكۈمىتىنىڭ قوللىشىغا ئېرىشتى.
جۇڭگو دىپلوماتىيە مىنىستىرلىقى، گۇڭئەن مىنىستىرلىقى، شىنجاڭ ئۇيغۇر ئاپتونوم رايونى ۋە جۇڭگو تەرەپنىڭ ئالاقىدار ئاقىللار ئامبىرى ئالىي مەكتەپلىرىنىڭ ۋەكىللىرى ھەمدە ئەرەب بىرلەشمە خەلىپىلىكى، مىسىر، رۇسىيە، ئافرىقا ئىتتىپاقى قاتارلىق 20 نەچچە دۆلەت ۋە رايون تەشكىلاتلىرىدىن كەلگەن 100گە يېقىن ئەزىز مېھمان قاتناشتى.
تېررورىزم پۈتكۈل ئىنسانىيەتنىڭ ئورتاق دۈشمىنى، تېررورىزمغا زەربە بېرىش خەلقئارا جەمئىيەتنىڭ ئورتاق مەسئۇلىيىتى. پەقەت ئىستراتېگىيەلىك ئورتاق تونۇشنى تولۇق مۇجەسسەملەپ، ئالماشتۇرۇش، ھەمكارلىشىشنى ئىلگىرى سۈرگەندىلا، ئاندىن تېخىمۇ ئۈنۈملۈك ھالدا تېررورىزم، ئەسەبىزمنى توسۇپ ۋە ئۇنىڭغا زەربە بېرىپ، دۇنيانىڭ تىنچلىقى ۋە خاتىرجەملىكىنى قوغدىغىلى بولىدۇ.
ئاپتونوم رايونلۇق خەلق ھۆكۈمىتى تاشقى ئىشلار ئىشخانىسى پارتىيە گۇرۇپپىسىنىڭ شۇجىسى شۈ گۇيشياڭ مۇنداق بىلدۈردى: شىنجاڭ جۇڭگونىڭ تېررورلۇققا قارشى تۇرۇشتىكى ئالدىنقى سەپ بازىسى، رايون بىخەتەرلىكىنى قوغداشتىكى مۇھىم توسۇق، تېررورىزم تەھدىتى ئالدىدا، شىنجاڭ كەسكىن تەدبىر قوللىنىپ، تېررورلۇققا قارشى تۇرۇش، ئەسەبىيلىكنى تۈگىتىش كۈرىشىنى قانۇن بويىچە قانات يايدۇرۇپ، كۆرۈنەرلىك ئۈنۈمگە ئېرىشتى، پايدىلىق تەجرىبىلەرنى توپلىدى، شىنجاڭدا تېررورلۇققا قارشى تۇرۇش خەلقئارا مۇھاكىمە يىغىنى ئۆتكۈزۈش ئالاھىدە ئەھمىيەتكە ئىگە.
دىپلوماتىيە مىنىستىرلىقى خەۋپسىزلىك مەھكىمىسىنىڭ باشلىقى ۋاڭ لىشىن مۇنداق بىلدۈردى: جۇڭگو ئىزچىل تۈردە خەلقئارا تېررورلۇققا قارشى تۇرۇش ھەمكارلىقىغا قەتئىي قاتناشقۇچى ۋە پائال تۆھپە قوشقۇچى بولۇپ كەلدى، ھەرقايسى دۆلەتلەر بىلەن بىرلىكتە دۇنياۋى تەرەققىيات تەشەببۇسى، دۇنياۋى خەۋپسىزلىك تەشەببۇسى، دۇنياۋى مەدەنىيلىك تەشەببۇسىنى ئەمەلدە كۆرسىتىپ، تېررورلۇققا قارشى تۇرۇش ئورتاق تونۇشى، بىرىكمە كۈچىنى ئۈزلۈكسىز مۇجەسسەملەپ، خەلقئارا تېررورلۇققا قارشى تۇرۇش كۈرىشىدىكى گەۋدىلىك مەسىلىلەر ۋە يېڭى باش كۆتۈرگەن خىرىسلارغا قول تۇتۇشۇپ تاقابىل تۇرۇپ، ئۇزاققىچە تىنچ، ئومۇميۈزلۈك بىخەتەر دۇنيا قۇرۇش ئۈچۈن تېخىمۇ زور كۈچ قوشۇشنى خالايدۇ.
جۇڭگو خەلقئارا مەسىلىلەر تەتقىقات ئورنىنىڭ باشلىقى چېن بو مۇنداق بىلدۈردى: جۇڭگو ھادىسىدىنمۇ، ماھىيەتتىنمۇ تۈزەشنى تەشەببۇس قىلىپ، تېررورىزمغا قاتتىق زەربە بېرىش يۇقىرى بېسىم ھالىتىنى ساقلاپلا قالماي، تېخىمۇ مۇھىمى تەرەققىيات ۋە ھەمكارلىق، مەدەنىيلىكتە ئۆزئارا ئۆرنەك ئېلىش ئارقىلىق ئەسەبىزم پەيدا بولىدىغان مۇھىتنى تۈگىتىدۇ. بۇ قېتىمقى مۇھاكىمە يىغىنى ئارقىلىق تېررورلۇققا قارشى تۇرۇش ھەمكارلىق ئاساسىنى يەنىمۇ پۇختىلاپ، دۇنياۋى خەۋپسىزلىك تەشەببۇسىنى ئەمەلىيلەشتۈرۈش، ئىنسانىيەت خەۋپسىزلىكى ئورتاق گەۋدىسى بەرپا قىلىش ئۈچۈن تېخىمۇ كۆپ ئەقىل - پاراسەت ۋە كۈچ قوشۇشنى ئۈمىد قىلىمىز.
«جۇڭگو ھۆكۈمىتى ئۈنۈملۈك تەدبىر قوللىنىپ، تېررورىزم تەھدىتىگە مۇۋەپپەقىيەتلىك تاقابىل تۇردى، بولۇپمۇ تېررورىزمنىڭ مەنبەسىنى يوقىتىش ئۇسۇلى باشقا دۆلەتلەرنىڭ ئۆرنەك قىلىشىغا ئەرزىيدۇ» دەپ بىلدۈردى دۇنيا مۇسۇلمانلار رايونى كېڭىشىنىڭ رەئىسى، ئەرەب بىرلەشمە خەلىپىلىكى فېدېراتسىيە خەلق پارلامېنتى دۆلەت مۇداپىئەسى، ئىچكى ئىشلار ۋە دىپلوماتىيە ئىشلىرى كومىتېتىنىڭ رەئىسى ئەلى رەشىد نۇرئەمىر.
«بۈگۈنكى شىنجاڭ بىخەتەر، ئىناق، ئېچىۋېتىلگەن بولۇپ، تېخىمۇ كۆپ دوستلارنىڭ شىنجاڭغا كېلىپ، شىنجاڭنىڭ چوڭلۇقىنى چۈشىنىشىنى، شىنجاڭنىڭ گۈزەللىكىنى ھېس قىلىشىنى، شىنجاڭنىڭ مۇقىملىقى ۋە تەرەققىياتىنىڭ رايون خەۋپسىزلىكى ۋە دۇنياۋى خەۋپسىزلىككە قوشقان تىنچلىق كۈچىدىن ئورتاق بەھرىلىنىشىنى قارشى ئالىمىز» دەپ بىلدۈردى ئاپتونوم رايوننىڭ مۇئاۋىن رەئىسى، گۇڭئەن نازارىتىنىڭ نازىرى پەن شى.
«ئۈرۈمچىگە كېلىپ، مەن كۆپ خىل دىن ۋە مەدەنىيەت ئىناق، بىللە مەۋجۇت بولۇپ تۇرىدىغان زامانىۋى شەھەرنى كۆردۈم، جۇڭگونىڭ تېررورىزمغا زەربە بېرىش ۋە ئۇنىڭ ئالدىنى ئېلىش نەتىجىلىرىنى ھېس قىلدىم.» رۇسىيە فېدېراتسىيەسى پۇل مۇئامىلە كۆزىتىش - ئۆلچەش ئىدارىسىنىڭ مەسلىھەتچىسى توروپوف مۇنداق بىلدۈردى: بۇ قېتىمقى مۇھاكىمە يىغىنىدا جۇڭگو شىنجاڭنىڭ ئۈنۈملۈك ئۇسۇلى ۋە تەجرىبىلىرىنى ئىگىلەيمىز ھەم قوبۇل قىلىمىز، بۇ، رۇسىيە ئۈچۈن مۇھىم ئۆرنەكلىك ئەھمىيەتكە ئىگە.