زۇمرەت ئوبۇل قاتناشتى
شىنجاڭ گېزىتى، ئۈرۈمچى، 8 - ئاينىڭ 5 - كۈنى خەۋىرى ئانار بۇلۇت \ شىنجاڭ گېزىتى مۇخبىرى ۋاڭ شىڭرۇي خەۋەر قىلىدۇ: ئاپتونوم رايونلۇق پارتىيە كومىتېتىنىڭ شۇجىسى چېن شياۋجياڭ، ئاپتونوم رايوننىڭ رەئىسى ئەركىن تۇنىياز 8 - ئاينىڭ 4 - كۈنى ئۈرۈمچىدە شياڭگاڭدىكى مەملىكەتلىك خەلق قۇرۇلتىيى ۋەكىللىرى كۆزدىن كەچۈرۈش گۇرۇپپىسىدىكىلەر بىلەن كۆرۈشتى.
ئاپتونوم رايونلۇق خەلق قۇرۇلتىيى دائىمىي كومىتېتىنىڭ مۇدىرى زۇمرەت ئوبۇل كۆرۈشۈشكە قاتناشتى.
چېن شياۋجياڭ ئاپتونوم رايونغا ۋاكالىتەن كۆزدىن كەچۈرۈش گۇرۇپپىسىدىكىلەرنىڭ كەلگەنلىكىنى قارشى ئالدى. ئۇ مۇنداق دېدى: پارتىيە 18 - قۇرۇلتىيىدىن بۇيان، باش شۇجى شى جىنپىڭ شىنجاڭ خىزمىتىگە يۈكسەك ئەھمىيەت بېرىپ، شىنجاڭدىكى ھەر مىللەت خەلققە رىشتە باغلاپ، يېڭى دەۋردىكى پارتىيەنىڭ شىنجاڭنى ئىدارە قىلىش تەدبىرىنى بېكىتىپ، شىنجاڭنىڭ دۆلەت ئومۇملۇقىدىكى «بەش چوڭ ئىستراتېگىيەلىك ئورۇن بېكىتمىسى»نى بېكىتىپ، شىنجاڭنىڭ ئىقتىساد، جەمئىيەت تەرەققىياتى ۋە خەلق تۇرمۇشىنى ياخشىلاشتا تارىخىي مۇۋەپپەقىيەتلەرنى قولغا كەلتۈرۈشىگە يېتەكچىلىك قىلدى، ھەر مىللەت ئاممىنىڭ ئېرىشىش تۇيغۇسى، بەخت تۇيغۇسى، بىخەتەرلىك تۇيغۇسى ئۈزلۈكسىز كۈچەيدى. ۋەكىللەرنىڭ كۆزدىن كەچۈرۈشى خەلق ۋەكىللىرىنىڭ ۋەكىللىك مەسئۇلىيىتىنى قانۇن بويىچە ئادا قىلىشىدىكى مۇھىم ئۇسۇل. ھەرقايسى ۋەكىللەرنىڭ شىنجاڭنىڭ جەمئىيەت مۇقىملىقى ۋە ئەبەدىي ئەمىنلىكنى ئالغا سىلجىتىشىغا قىممەتلىك پىكىرلەرنى كۆپرەك بېرىپ، شىنجاڭ بىلەن شياڭگاڭنىڭ ئالماشتۇرۇش، ھەمكارلىقنى چوڭقۇرلاشتۇرۇشىنى پائال ئىلگىرى سۈرۈپ، جۇڭگوچە زامانىۋىلاشتۇرۇشنىڭ شىنجاڭ ئەمەلىيىتىنى ئالغا سىلجىتىشقا كۈچ قوشۇشىنى ئۈمىد قىلىمەن. شىنجاڭ ياخشى جاي، ھەرقايسى ۋەكىللەرنىڭ كۆپرەك ئايلىنىپ، كۆپرەك كۆرۈپ، كۆرگەن - ئاڭلىغانلىرى، ھېس قىلغانلىرىنى شياڭگاڭدىكى ھەر ساھە دوستلارغا ھەمبەھرىلەپ، شياڭگاڭلىق قېرىنداشلارنى شىنجاڭنى تېخىمۇ چوڭقۇر چۈشىنىش ئىمكانىيىتىگە ئىگە قىلىشىنى قارشى ئالىمەن.
كۆزدىن كەچۈرۈش گۇرۇپپىسىنىڭ باشلىقى، شياڭگاڭ 7 - نۆۋەتلىك قانۇن چىقىرىش كېڭىشىنىڭ ئەزاسى ما فېڭگو مۇنداق بىلدۈردى: شىنجاڭنىڭ يېرى كەڭ، تارىخىي مەدەنىيىتى چوڭقۇر. شياڭگاڭدىكى مەملىكەتلىك خەلق قۇرۇلتىيى ۋەكىللىرى كۆزدىن كەچۈرۈش گۇرۇپپىسىنىڭ بۇ قېتىمقى سەپىرىدە ئاساسلىقى شىنجاڭنىڭ ئىقتىساد، جەمئىيەت تەرەققىياتى ئەھۋالى ۋە مىللەتلەر ئىتتىپاقلىقى مۇۋەپپەقىيەتلىرىنى چوڭقۇر ئىگىلەپ، شىنجاڭ تەرەپ بىلەن ئۆزئارا ئۆگىنىپ، قويۇق پىكىر ئالماشتۇرۇپ، يەنىمۇ ئىلگىرىلىگەن ھالدا تونۇشنى چوڭقۇرلاشتۇرۇپ، ھېسسىياتنى كۈچەيتىپ، شياڭگاڭ بىلەن شىنجاڭنىڭ ھەرقايسى ساھەلەردىكى ئەمەلىي ھەمكارلىقنى چوڭقۇرلاشتۇرۇشىنى ئىلگىرى سۈرۈشنى ئۈمىد قىلىمەن.
مەملىكەتلىك خەلق قۇرۇلتىيى دائىمىي كومىتېتى ۋەكىللەر خىزمىتى كومىتېتىنىڭ مۇدىرى گو جېنخۇا بۇ قېتىمقى كۆزدىن كەچۈرۈش پائالىيىتىگە ئالاقىدار ئەھۋاللارنى تونۇشتۇردى. مەركىزىي ھۆكۈمەتنىڭ شياڭگاڭدىكى ئالاقە ئىشخانىسىدىكى مۇناسىۋەتلىك يولداش سۆز قىلدى.
چېن ۋېيجۈن، قادېن كەبىن، لى نىڭپىڭ كۆرۈشۈشكە قاتناشتى.