چېن مىڭگو، ۋاڭ چۇنفا سۆز قىلدى
شىنجاڭ گېزىتى، ئۈرۈمچى، 8 - ئاينىڭ 20 - كۈنى خەۋىرى ئانار بۇلۇت\شىنجاڭ گېزىتى مۇخبىرى شيې خۇيبيەن خەۋەر قىلىدۇ: 8 - ئاينىڭ 20 - كۈنى، جۇڭگو پەن - تېخنىكا جەمئىيىتى مەسئۇل بولۇپ ئۆتكۈزگەن، شىنجاڭ پەن - تېخنىكا جەمئىيىتى ئۆتكۈزۈشنى ئۈستىگە ئالغان 2025 - يىللىق جۇڭگو − ئوتتۇرا ئاسىيا پەن - تېخنىكا، ئادىمىيەت جەھەتتىكى ئالماشتۇرۇش پائالىيىتى ئۈرۈمچىدە باشلاندى. ئاپتونوم رايونلۇق پارتىيە كومىتېتىنىڭ مۇئاۋىن شۇجىسى چېن مىڭگو يىغىنغا قاتناشتى ھەم سۆز قىلدى، مەملىكەتلىك خەلق قۇرۇلتىيى مائارىپ - پەن - مەدەنىيەت - سەھىيە كومىتېتىنىڭ ئەزاسى، جۇڭگو پەننى ئومۇملاشتۇرۇش يازغۇچىلار جەمئىيىتى پارتىيە كومىتېتىنىڭ شۇجىسى ۋاڭ چۇنفا سۆز قىلدى.
چېن مىڭگو مۇنداق كۆرسەتتى: جۇڭگو − ئوتتۇرا ئاسىيا پەن - تېخنىكا، ئادىمىيەت جەھەتتىكى ئالماشتۇرۇش پائالىيىتى باش شۇجى شى جىنپىڭنىڭ جۇڭگو − ئوتتۇرا ئاسىيا باشلىقلار يىغىنىدا تۈزگەن تەرەققىيات ئۇلۇغۋار پىلانىنى ئەمەلدە كۆرسىتىش، رايونلار ھەمكارلىقىنى چوڭقۇرلاشتۇرۇش، پۇختا ئەمەلىيلەشتۈرۈشكە تۈرتكە بولۇشتىكى مۇھىم تەدبىر. بۇ قېتىمقى پائالىيەت ئىناق قوشنىدارچىلىق، تىنچ قوشنىدارچىلىق، باي قوشنىدارچىلىق، يېقىن ئۆتۈش، سەمىمىي بولۇش، مەنپەئەت يەتكۈزۈش، سىغدۇرۇشچان بولۇش ئىدىيەسىنى يېتەكچى قىلىپ، دىققەتنى «يېڭىلىق يارىتىش كۈچىنى مۇجەسسەملەش، يىپەك يولىنىڭ كەلگۈسىنى ئورتاق كۈتۈۋېلىش»قا مەركەزلەشتۈرۈپ، ياش ئىنژېنېرلار ئالماشتۇرۇشى، ئاممىنىڭ ئىلىم - پەن ساپاسى قۇرۇلۇشى ئالماشتۇرۇشى، ئوتتۇرا ئاسىيادىكى ياش ئالىملار سۆھبىتى، 9 - نۆۋەتلىك «بىر بەلباغ، بىر يول» ئىجادكارلار لاگېرى ۋە ئوقۇتقۇچىلار تەتقىقات - مۇھاكىمە ئېلىپ بېرىش قاتارلىق پائالىيەتلەرنى يادرولۇق ۋاسىتە قىلىپ، ساھە ھالقىغان، دۆلەت ھالقىغان خەلق ئىچى پەن - تېخنىكىسى، ئادىمىيەت جەھەتتىكى يۇغۇرۇلۇش يېڭى سۇپىسى بەرپا قىلىپ، بەلگە خاراكتېرلىك تېخىمۇ كۆپ نەتىجىلەرنى شەكىللەندۈرۈشكە تۈرتكە بولۇپ، رايون تەقدىر ئورتاق گەۋدىسى بەرپا قىلىشقا كۈچلۈك ھەرىكەتلەندۈرگۈچى كۈچ قوشتى. پائالىيەتنى پۇرسەت بىلىپ، جۇڭگو − ئوتتۇرا ئاسىيا روھىنى داۋاملىق ئەۋج ئالدۇرۇپ، دۇنياۋى تەرەققىيات، خەۋپسىزلىك ۋە مەدەنىيلىك تەشەببۇسىنى ئورتاق ئەمەلىيلەشتۈرۈپ، پەن - تېخنىكا ساھەسىدىكى ئەمەلىي ھەمكارلىقنى چوڭقۇرلاشتۇرۇپ، قول تۇتۇشۇپ دۇنياۋى خىرىسقا تاقابىل تۇرۇپ، جۇڭگو − ئوتتۇرا ئاسىيا پەن - تېخنىكا، ئادىمىيەت جەھەتتىكى ئالماشتۇرۇش يېڭى ۋەزىيىتىنى ئورتاق يارىتىشنى ئۈمىد قىلىمەن.
ۋاڭ چۇنفا مۇنداق كۆرسەتتى: جۇڭگو بىلەن ئوتتۇرا ئاسىيانىڭ تاغ - دەريالىرى تۇتاش، ئادىمىيەت جەھەتتە يېقىن، يىپەك يولى ئىككى تەرەپنىڭ پەن - تېخنىكا، مەدەنىيەت جەھەتتىكى دوستلۇقىغا، ئۆزئارا ئۆرنەك ئېلىشىغا گۇۋاھ بولدى. «بىر بەلباغ، بىر يول»نى ئورتاق بەرپا قىلىش تەشەببۇسى ئارقا كۆرۈنۈشىدە، پەن - تېخنىكا، ئادىمىيەت جەھەتتىكى ئالماشتۇرۇش خەلق قەلبىنى تۇتاشتۇرىدىغان، ئىجادىيلىقنى قوزغىتىدىغان مۇھىم ۋاسىتە. بۇ قېتىمقى پائالىيەتتە پۇقرالارنىڭ ئىلىم - پەن ساپاسى قۇرۇلۇشى ئالماشتۇرۇشى مەخسۇس تېمىدا لايىھەلىنىپ، دىققەت پەننى ئومۇملاشتۇرۇش بايلىقىنى ئېچىش ۋە ئۇنىڭدىن ھەمبەھرىلىنىشكە مەركەزلەشتۈرۈلۈپ، ھەمكارلىقنى چوڭقۇرلاشتۇرۇش، خەلق قەلبىنى تۇتاشتۇرۇشنى ئىلگىرى سۈرۈش ئۈچۈن ئەقىل - پاراسەت قوشۇلىدۇ. ئىلىم - پەن ساپاسىنى ئۆستۈرۈش ئارقىلىق ئورتاق تەرەققىياتنى ئىلگىرى سۈرۈپ، يېڭىلىق يارىتىشنىڭ پايدىسىدىن خەلق ئاممىسىغا ئومۇميۈزلۈك نەپ يەتكۈزۈش؛ مەدەنىيلىك جەھەتتە ئۆزئارا ئۆرنەك ئېلىشقا تۈرتكە بولۇپ، كۆپ خىل مەدەنىيەتنى ئالماشتۇرۇش داۋامىدا ئورتاق گۈللىنىش ئىمكانىيىتىگە ئىگە قىلىش؛ ئېچىۋېتىش، ھەمكارلىشىشنى چوڭقۇرلاشتۇرۇپ، رايونلار ماسلىشىپ يېڭىلىق يارىتىشنى تېخىمۇ ھاياتىي كۈچكە ئىگە قىلىش كېرەك.
پائالىيەت نەق مەيدانىدا، جۇڭگو پەن - تېخنىكا جەمئىيىتىنىڭ ئالاقىدار مەسئۇللىرى ھەم قازاقىستان، قىرغىزىستان، تاجىكىستان، ئۆزبېكىستاندىن كەلگەن چەت ئەللىك مېھمانلار ۋەكىللىرى ئايرىم - ئايرىم سۆز قىلدى. شۇنىڭ بىلەن بىللە «جۇڭگو ئىنژېنېرلار بىرلەشمە گەۋدىسى ئوتتۇرا ئاسىيا دۆلەتلىرى قۇرۇلۇش تەشكىلاتىغا سىجىل كەسپىي تەرەققىيات بايلىقىنى ئېچىۋېتىش» تەشەببۇسى ئېلان قىلىندى. جۇڭگو پەننى ئومۇملاشتۇرۇش يازغۇچىلىرى جەمئىيىتى ئايرىم - ئايرىم خەلقئارا پەن - تېخنىكا ھەمكارلىق مەركىزى (قازاقىستان)، قىرغىزىستان دۆلەت تېخنىكا داشۆسى بىلەن ھەمكارلىق ئەسلەتمىسى ئىمزالىدى، جۇڭگو ئىنژېنېرلار بىرلەشمە گەۋدىسى قازاقىستان ئوتتۇرا ئاسىيا مائارىپ گۇۋاھلىق جەمئىيىتى بىلەن ھەمكارلىق ئەسلەتمىسى ئىمزالىدى. جۇڭگو − ئوتتۇرا ئاسىيا ياش - ئۆسمۈرلەر ئىجادكارلار لاگېرى پائالىيىتىنىڭ ۋەكىللىرىمۇ باشلىنىش مۇراسىمىغا قاتناشتى.