ئىشقا ئورۇنلىشىشنى مۇقىملاشتۇرۇش سىياسىتىنى ئەمەلىيلەشتۈرۈش خىزمىتىنى ياخشى ئىشلەش قاتارلىقلار مۇھاكىمە قىلىندى
شىنجاڭ گېزىتى، ئۈرۈمچى، 8 - ئاينىڭ 14 - كۈنى خەۋىرى ئانار بۇلۇت\شىنجاڭ گېزىتى مۇخبىرى جاڭ يەنفاڭ خەۋەر قىلىدۇ: 8 - ئاينىڭ 14 - كۈنى، ئاپتونوم رايوننىڭ رەئىسى ئەركىن تۇنىياز ئاپتونوم رايونلۇق ھۆكۈمەتنىڭ دائىمىي يىغىنىنى رىياسەتچىلىك قىلىپ ئاچتى، يىغىندا باش شۇجى شى جىنپىڭنىڭ يېقىنقى مەزگىلدىكى مۇھىم سۆزى، مۇھىم يوليورۇقىنىڭ روھى قاتارلىقلار يەتكۈزۈلدى، ئۆگىنىلدى، ئاپتونوم رايونلۇق پارتىيە كومىتېتىنىڭ ئورۇنلاشتۇرۇشى بويىچە، ئىشقا ئورۇنلىشىشنى مۇقىملاشتۇرۇش سىياسىتىنى كۈچەپ ئەمەلىيلەشتۈرۈش، پەن - تېخنىكا ساھەسىدە مۇكاپاتقا ئېرىشكەنلەرنى قارار قىلىش، پەن - تېخنىكىدا يېڭىلىق يارىتىشقا تۈرتكە بولۇش، ئۇرۇقچىلىق سەۋىيەسىنى ئۆستۈرۈش قاتارلىق خىزمەتلەر مۇھاكىمە قىلىندى.
يىغىندا «ئاپتونوم رايوننىڭ ئىشقا ئورۇنلىشىشنى مۇقىملاشتۇرۇش سىياسىتىنى كۈچەپ ئەمەلىيلەشتۈرۈش توغرىسىدىكى 12 تۈرلۈك تەدبىرى» مۇھاكىمە قىلىندى ھەم مۇنداق تەكىتلەندى: پارتىيە مەركىزىي كومىتېتى، گوۋۇيۈەننىڭ ئىشقا ئورۇنلاشتۇرۇش خىزمىتىنى ياخشى تۇتۇش توغرىسىدىكى بىر قاتار مۇھىم ئورۇنلاشتۇرمىلىرىنى قەتئىي ئەمەلىيلەشتۈرۈپ، تەرەققىيات نەتىجىلىرى ئارقىلىق خەلق تۇرمۇشىغا تېخىمۇ ياخشى نەپ يەتكۈزۈش، قەلبلەرنى مۇجەسسەملەشنى چىقىش قىلىپ، ئاپتونوم رايونىمىزنىڭ ئىشقا ئورۇنلاشتۇرۇشقا دائىر تۈرلۈك خىزمەتلىرىنى قەتئىي، كەسكىن ياخشى تۇتۇش كېرەك. تۆۋەن چەك تەپەككۇرىنى مۇستەھكەم تۇرغۇزۇپ، ئىشقا ئورۇنلاشتۇرۇش ساھەسىدىكى يوشۇرۇن خەۋپ - خەتەرنى پائال تۈگىتىپ، ئىشقا ئورۇنلىشىشنى مۇقىملاشتۇرۇش ئۆتكىلىگە ھۇجۇم قىلىش جېڭىنى پۈتۈن كۈچ بىلەن ياخشى قىلىش كېرەك. ساقلانما ۋە كۆپەيمە سىياسەتلەرنى ئەمەلىيلەشتۈرۈشنى ئۇزاققىچە بوشاشماي ياخشى تۇتۇپ، كارخانىلارنىڭ ئىش ئورنىنى مۇقىملاشتۇرۇش، ئىش ئورنىنى كېڭەيتىشىنى سىجىل قوللاپ، نۇقتىلىق كىشىلەر توپىنىڭ ئىشقا ئورۇنلىشىشىغا يار - يۆلەك بولۇشنى كۈچەيتىپ، تۈرلۈك چارە - ئاماللار بىلەن ئىشقا ئورۇنلىشىشنى مۇقىملاشتۇرۇش، كىرىمنى ئاشۇرۇش كېرەك. ئالاقىدار تارماقلار سىياسەت ئۈنۈمىگە ۋاقتىدا ئەگىشىپ، سىياسەت ياردەم پۇل مەبلىغىنى نازارەت قىلىش - باشقۇرۇشنى كۈچەيتىپ، مەبلەغنىڭ ئۈنۈمىنى ھەقىقىي جارى قىلدۇرۇشقا ھەقىقىي كاپالەتلىك قىلىشى كېرەك.
يىغىندا «2024 - يىللىق ئاپتونوم رايوننىڭ پەن - تېخنىكا مۇكاپاتىغا ئېرىشكەن پەن - تېخنىكا نەتىجىلىرى ۋە گەۋدىلىك تۆھپە قوشۇش مۇكاپاتىغا ئېرىشكەن خادىملارنى تەقدىرلەش توغرىسىدىكى قارار» مۇھاكىمە قىلىندى ھەم مۇنداق تەكىتلەندى: يېڭىلىق يارىتىش ئارقىلىق تەرەققىياتقا تۈرتكە بولۇش ئىستراتېگىيەسىنى چوڭقۇر يولغا قويۇپ، دىققەتنى كەمتۈكلۈكلەر، ئاجىز تۈرلەرگە مەركەزلەشتۈرۈپ سىجىل كۈچەپ، ئىشلەپچىقىرىش - ئوقۇتۇش - تەتقىقات چوڭقۇر يۇغۇرۇلغان پەن - تېخنىكىدا يېڭىلىق يارىتىش سىستېمىسى بەرپا قىلىش كېرەك. «تۆت تەرەپ ھەمكارلىقى» قاتارلىق مېخانىزملاردىن ياخشى پايدىلىنىپ، پەن - تېخنىكىدا يېڭىلىق يارىتىش مۇلازىمەت سىستېمىسىنى مۇكەممەللەشتۈرۈپ، نەتىجىلەرنى ئايلاندۇرۇشنى تېزلىتىش كېرەك. ئالىملار روھىنى ئەۋج ئالدۇرۇپ، پەن تەتقىقات نەتىجىلىرىنى كەسىپ تەرەققىياتى، خەلق تۇرمۇشى ئېھتىياجى بىلەن دەل جايىدا ئۇدۇللاشتۇرۇشقا تۈرتكە بولۇپ، ئىقتىساد، جەمئىيەتنىڭ يۇقىرى سۈپەتلىك تەرەققىياتىغا تېخىمۇ ياخشى مۇلازىمەت قىلىش كېرەك.
يىغىندا «شىنجاڭ ئۇيغۇر ئاپتونوم رايونىنىڭ پەن - تېخنىكىدا يېڭىلىق يارىتىش نىزامى (لايىھە)» مۇزاكىرە قىلىنىپ ھەم پىرىنسىپ جەھەتتىن ماقۇللىنىپ، لايىھەنى ئاپتونوم رايونلۇق خەلق قۇرۇلتىيى دائىمىي كومىتېتىنىڭ قاراپ چىقىشىغا سۇنۇش قارار قىلىندى. يىغىندا مۇنداق تەكىتلەندى: بۇ قېتىم يەرلىك نىزام شەكلىدە بۇ نىزامنى تۈزۈپ يولغا قويۇش قانۇنچىللىق يولىدا ئاپتونوم رايوننىڭ پەن - تېخنىكىنى ئىدارە قىلىش سىستېمىسى ۋە ئىدارە قىلىش ئىقتىدارىنىڭ زامانىۋىلىشىشىنى ئالغا سىلجىتىشنىڭ كۈچلۈك كاپالىتى. پەن - تېخنىكا كۈچلۈك دۆلىتى قۇرۇلۇشى نىشان - ۋەزىپىسىنى چوڭقۇر ئىگىلەپ، دىققەتنى «بەش چوڭ ئىستراتېگىيەلىك ئورۇن بېكىتمىسى»گە مەركەزلەشتۈرۈپ پەن - تېخنىكىدا يېڭىلىق يارىتىشنى ئالغا سىلجىتىپ، پۈتۈن ئاپتونوم رايوننىڭ يۇقىرى سۈپەتلىك تەرەققىياتىغا كۈچلۈك ھەرىكەتلەندۈرگۈچى كۈچ قوشۇش كېرەك. نۇقتىلىق كەسىپ زەنجىرىنى چىڭ كۆزلەپ، پەن - تېخنىكىدا يېڭىلىق يارىتىش سېلىنمىسىنى زورايتىپ، ئاچقۇچلۇق تېخنىكىلاردا ئۆتكەلگە ھۇجۇم قىلىشنى كۈچەيتىپ، دىققەتنى كەسىپ يېتىلدۈرۈپ نەتىجىلەرنى ئايلاندۇرۇشنى كۈچەيتىشكە مەركەزلەشتۈرۈپ، پەن - تېخنىكىدا يېڭىلىق يارىتىش بىلەن كەسىپتە يېڭىلىق يارىتىشنىڭ چوڭقۇر يۇغۇرۇلۇشىغا تېز تۈرتكە بولۇش كېرەك.
يىغىندا «شىنجاڭ ئۇيغۇر ئاپتونوم رايونىنىڭ <جۇڭخۇا خەلق جۇمھۇرىيىتىنىڭ ئۇرۇقچىلىق قانۇنى>نى يولغا قويۇش چارىسى (ئۆزگەرتىلگەن لايىھە)» مۇزاكىرە قىلىنىپ ھەم پىرىنسىپ جەھەتتىن ماقۇللىنىپ، ئۆزگەرتىلگەن لايىھەنى ئاپتونوم رايونلۇق خەلق قۇرۇلتىيى دائىمىي كومىتېتىنىڭ قاراپ چىقىشىغا سۇنۇش قارار قىلىندى. يىغىندا مۇنداق تەكىتلەندى: يېزا ئىگىلىكىنى زامانىۋىلاشتۇرۇشتا، ئۇرۇقلۇق ئاساس. ھەرقايسى جايلار ئۇرۇقچىلىقنىڭ تەرەققىياتىغا ياردەم بېرىش تەدبىرلىرىنى تۈزۈپ ۋە مۇكەممەللەشتۈرۈپ، مۇھىم مەسىلىلەرنى بىرتۇتاش پىلانلاپ ھەل قىلىپ، ئۇرۇقچىلىقنىڭ يۇقىرى سۈپەتلىك تەرەققىياتىنى ئىلگىرى سۈرۈشى كېرەك. مۇلازىمەت يېتەكچىلىكىنى كۈچەيتىپ، ئۇرۇقلۇق ئىشلەپچىقىرىش - تىجارەت پائالىيىتىنى قېلىپلاشتۇرۇپ، سۈپەتلىك ئۇرۇقنى يېتىشتۈرۈش، ئىشلەپچىقىرىش ۋە كېڭەيتىشنى ئالغا سىلجىتىشى كېرەك. ئالاقىدار تارماقلار ئالاقىلىشىش، ماسلاشتۇرۇشنى كۈچەيتىپ، نازارەت قىلىش ۋە ھەمكارلىشىپ قانۇن ئىجرا قىلىش مېخانىزمىنى ئورنىتىپ، قانۇن بولغان ئىكەن جەزمەن ئاساسلىنىش، قانۇن ئىجرا قىلىشتا جەزمەن قاتتىق بولۇشنى ئىشقا ئاشۇرۇشى كېرەك. تەشۋىقات سالمىقىنى زورايتىپ، ئۇرۇقچىلىقنىڭ تەرەققىياتىغا مەدەت بېرىدىغان ياخشى كەيپىيات يارىتىشى كېرەك.
يىغىندا يەنە باشقا ئىشلار مۇھاكىمە قىلىندى.