چېن شياۋجياڭ مانېۋىرنى كۆردى ھەم سۆز قىلدى، ئەركىن تۇنىياز، خې جۇڭيوۋ، چېن مىڭگو كۆرۈشكە قاتناشتى
شىنجاڭ گېزىتى، ئۈرۈمچى، 8 - ئاينىڭ 26 - كۈنى خەۋىرى ئانار بۇلۇت\شىنجاڭ گېزىتى مۇخبىرى ۋاڭ شىڭرۇي خەۋەر قىلىدۇ: 8 - ئاينىڭ 26 - كۈنى، شىنجاڭ مەلۇم چېگرا رايوندا «تېررورلۇققا قارشى تۇرۇش ۋە چۆچۈتۈش − 2025» ئارمىيە، ساقچى، بىڭتۇەن، خەلق تېررورلۇققا قارشى تۇرۇش، تېررورلۇقنىڭ ئالدىنى ئېلىش بىرلەشمە قوراللىق مانېۋىرى ئۆتكۈزۈپ، كىرىش خاراكتېرلىك تېررورلۇق ھۇجۇمى خەۋپ - خەتىرىنى باشقۇرۇش - تىزگىنلەش تەدبىرلىرىنى يەنىمۇ مۇكەممەللەشتۈرۈپ، ئەمەلىي جەڭگە تەشكىللەش، قوماندانلىق قىلىش ئۈنۈمىنى تەكشۈرۈپ، پارتىيە، ھۆكۈمەت، ئارمىيە، ساقچى، بىڭتۇەن، خەلقنىڭ بىرىكمە كۈچى ئارقىلىق چېگرا مۇداپىئەسىنى كۈچەيتىش، مۇستەھكەملەشتىكى قەتئىي ئىرادىسى ۋە زوراۋانلىق، تېررورلۇق ھەرىكەتلىرىگە قانۇن بويىچە قاتتىق زەربە بېرىش ئىقتىدارى، سەۋىيەسىنى نامايان قىلدى. ئاپتونوم رايونلۇق پارتىيە كومىتېتىنىڭ شۇجىسى، بىڭتۇەن پارتىيە كومىتېتىنىڭ 1 - شۇجىسى، 1 - جېڭۋېي چېن شياۋجياڭ مانېۋىرنى يىراق مۇساپىلىك كۆردى ھەم سۆز قىلدى.
ئاپتونوم رايونلۇق پارتىيە كومىتېتىنىڭ مۇئاۋىن شۇجىسى، ئاپتونوم رايوننىڭ رەئىسى ئەركىن تۇنىياز، ئاپتونوم رايونلۇق پارتىيە كومىتېتىنىڭ مۇئاۋىن شۇجىسى، بىڭتۇەننىڭ جېڭۋېيسى خې جۇڭيوۋ، ئاپتونوم رايونلۇق پارتىيە كومىتېتىنىڭ مۇئاۋىن شۇجىسى، سىياسىي - قانۇن كومىتېتىنىڭ شۇجىسى چېن مىڭگو كۆرۈشكە قاتناشتى.
جەڭ مەيدانىدا ئەسكەرلەرنى تاۋلاپ، قۇدرەتلىك كۈچنى نامايان قىلىش. شىنجاڭ قوراللىق ساقچى قىسىم، چېگرا تەكشۈرۈش، گۇڭئەن، شىنجاڭ ئىشلەپچىقىرىش - قۇرۇلۇش بىڭتۇەنى قاتارلىق ھەرقايسى تەرەپلەردىكى كۈچلەردىن بولغان 1700دىن ئارتۇق كىشىدىن تەشكىللەنگەن مانېۋىر قوشۇنى قوماندانلىق ئاپتوموبىلى، زەربىدار ئاپتوموبىل، ئەسكەر توشۇش ئاپتوموبىلى، قورال - جابدۇق ئاپتوموبىلى، يامىشىپ چىقىش ئاپتوموبىلى قاتارلىق تۈرلۈك جابدۇقلارنى ئىشقا سېلىپ، كۆپ يولغا بۆلۈنۈپ، تولۇق قوراللىنىپ ئاتلىنىپ، «ئەمەلىي مەيدان، ئەمەلىي كۆرۈنۈش، ئەمەلىي ئەسكەر، ئەمەلىي قورال - جابدۇق، ئەمەلىي جەڭ» بىرلەشمە قوراللىق مانېۋىرىنى قانات يايدۇردى، ئايرىم - ئايرىم ھالدا چېگرا لىنىيەسىدە تۇيۇقسىز ھۇجۇم قىلىپ پاراكەندە قىلىشقا قايتۇرما زەربە بېرىش، چېگرا پورتلىرىدا سىڭىپ كىرىشكە تاقابىل تۇرۇش، ئېگىزلىك تاغلىق رايونلىرىدا تازىلاش ئېلىپ بېرىش، زەربە بېرىش، چېگرادىكى نۇقتىلىق نىشانلارغا تۇيۇقسىز ھۇجۇم قىلىشتىن مۇداپىئەلىنىش - بىر تەرەپ قىلىش قاتارلىق تۈرلەرنى يولغا قويدى. پۈتۈن مەيدان پائالىيەتنىڭ ئەمەلىي جەڭ يېتەكچىلىكى گەۋدىلىك بولدى، مانېۋىرغا قاتناشقان ئوفىتسېر - ئەسكەرلەر زىچ ھەمكارلىشىپ، يۇقىرى ئۈنۈملۈك ماسلىشىپ، بەلگىلەنگەن ۋەزىپىلەرنى مۇۋەپپەقىيەتلىك تاماملاپ، كۆزلىگەن ئۈنۈمگە ئېرىشتى.
چېن شياۋجياڭ مانېۋىرنىڭ ئۈنۈمىنى مۇئەييەنلەشتۈردى، ئۇ مۇنداق تەكىتلىدى: يېڭى دەۋردىكى پارتىيەنىڭ شىنجاڭنى ئىدارە قىلىش تەدبىرىنى تولۇق، دەل جايىدا، ئومۇميۈزلۈك ئىزچىللاشتۇرۇپ، شىنجاڭ خىزمىتى باش نىشانىنى مەھكەم ئىگىلەپ، جەمئىيەت مۇقىملىقىنى قوغداشنى باشتىن - ئاخىر باش ئورۇنغا قويۇپ، بىرىكمە كۈچ شەكىللەندۈرۈپ چېگرا مۇداپىئەسىنى كۈچەيتىش ۋە مۇستەھكەملەش مېخانىزمىنى مۇكەممەللەشتۈرۈپ، چېگرا پورتلىرىدا ئادەم ئارقىلىق مۇداپىئەلىنىش، ماددىي بۇيۇم ئارقىلىق مۇداپىئەلىنىش، تېخنىكا ئارقىلىق مۇداپىئەلىنىشكە دائىر تۈرلۈك تەدبىرلەرنى ئەمەلىيلەشتۈرۈپ، مۇداپىئە كۆرۈش، باشقۇرۇش - تىزگىنلەشنى زامانىۋىلاشتۇرۇش ئىقتىدارى ۋە سەۋىيەسىنى ئۆستۈرۈپ، بىخەتەرلىك، مۇقىملىقنىڭ مۇستەھكەم مۇداپىئە لىنىيەسىنى ھەقىقىي پۇختىلاش كېرەك. چېگرا مۇداپىئە قۇرۇلۇشى ۋە چېگرا رايونلارنىڭ ئىقتىساد، جەمئىيەت تەرەققىياتىنى بىرتۇتاش پىلانلاپ ئالغا سىلجىتىپ، چېگرا رايوننى گۈللەندۈرۈپ خەلقنى بېيىتىش قۇرۇلۇشىنى زور كۈچ بىلەن يولغا قويۇپ، تەرەققىيات نەتىجىلىرىدىن ھەر مىللەت ئاممىنى مەنپەئەتلەندۈرۈشكە تۈرتكە بولۇش كېرەك. تەڭ تۇتۇپ ئورتاق باشقۇرۇشتا چىڭ تۇرۇپ، ھەر دەرىجىلىك پارتىيە كومىتېتلىرىنىڭ ئاساسىي گەۋدىلىك مەسئۇلىيىتى ۋە پارتىيە كومىتېتلىرىدىكى ئاساسلىق مەسئۇل يولداشلارنىڭ 1 - جاۋابكارلىق مەسئۇلىيىتىنى چىڭىتىپ، ھەرقايسى تەرەپلەرنىڭ ماسلىشىشى، ھەمكارلىشىشى ۋە ئومۇميۈزلۈك ھەمتۈرتكە بولۇشىنى كۈچەيتىپ، چېگرا مۇداپىئەسىنى كۈچەيتىش ۋە مۇستەھكەملەش قۇدرەتلىك بىرىكمە كۈچنى مۇجەسسەملەپ، چېگرا مۇداپىئە بىخەتەرلىكى، چېگرانىڭ تىنچلىقى، چېگرا رايوننىڭ مۇقىملىقىغا ھەقىقىي كاپالەتلىك قىلىش كېرەك.
چېن ۋېيجۈن، قادېن كەبىن، ئاپتونوم رايوننىڭ ئالاقىدار رەھبەرلىرى ۋە ئالاقىدار تارماقلاردىكى مەسئۇل يولداشلار قاتارلىقلار كۆرۈشكە قاتناشتى.