خاس كەسىپلەرنى يېتىلدۈرۈپ ۋە زورايتىپ، ئاممىنىڭ كىرىمىنى ئاشۇرۇپ بېيىشىنى ئىلگىرى سۈرۈش كېرەك

ئەركىن تۇنىياز قەشقەر ۋىلايىتىدە تەكشۈرۈپ تەتقىق قىلغاندا مۇنداق تەكىتلىدى

خاس كەسىپلەرنى يېتىلدۈرۈپ ۋە زورايتىپ، ئاممىنىڭ كىرىمىنى ئاشۇرۇپ بېيىشىنى ئىلگىرى سۈرۈش كېرەك

شىنجاڭ گېزىتى، يەكەن، 8 - ئاينىڭ 6 - كۈنى خەۋىرى ئانار بۇلۇت\شىنجاڭ گېزىتى مۇخبىرى لى ياڭ خەۋەر قىلىدۇ: 8 - ئاينىڭ 5 - كۈنى، ئاپتونوم رايونلۇق پارتىيە كومىتېتىنىڭ مۇئاۋىن شۇجىسى، ئاپتونوم رايوننىڭ رەئىسى ئەركىن تۇنىياز قەشقەر ۋىلايىتىنىڭ قەشقەر شەھىرى، يەكەن ناھىيەسىگە كېلىپ، ئالىي مائارىپ، جەمئىيەت مۇقىملىقى، چوڭ - چوڭ تۈرلەر، خەلق تۇرمۇشىدىكى ئەمەلىي ئىشلار قاتارلىق خىزمەتلەرنى تەكشۈرۈپ تەتقىق قىلدى. ئۇ مۇنداق تەكىتلىدى: يېڭى دەۋردىكى پارتىيەنىڭ شىنجاڭنى ئىدارە قىلىش تەدبىرىنى تولۇق، دەل جايىدا، ئومۇميۈزلۈك ئىزچىللاشتۇرۇپ، جۇڭخۇا مىللىتى ئورتاق گەۋدىسى ئېڭىنى مۇستەھكەملەشنى ئاساسىي لىنىيە قىلىپ، جەمئىيەت مۇقىملىقى ۋە ئەبەدىي ئەمىنلىك باش نىشانىنى مەھكەم ئىگىلەپ، ئالىي مائارىپنى كۈچەيتىپ، سېلىشتۇرما ئەۋزەللىكنى تولۇق جارى قىلدۇرۇپ، خاس كەسىپلەرنى يېتىلدۈرۈپ ۋە زورايتىپ، ئاممىنىڭ ئىشقا ئورۇنلىشىپ كىرىمىنى ئاشۇرۇشىنى ئىلگىرى سۈرۈش كېرەك.

ئەركىن تۇنىياز بېيجىڭ داشۆ شىنجاڭ «بىر بەلباغ، بىر يول» تەتقىقات ئورنىغا كېلىپ، قۇرۇلۇش ئەھۋالى توغرىسىدىكى دوكلاتنى ئاڭلىدى. ئۇ مۇنداق دېدى: يىرىك پىلاننى ئالدىن يولغا قويۇش، قەدەم - باسقۇچ بويىچە ئالغا سىلجىتىشتا چىڭ تۇرۇپ، بۇ سۇپىنى يۇقىرى باشلىنىش نۇقتىسى، يۇقىرى ئۆلچەم، يۇقىرى سۈپەتلىك ياخشى قۇرۇش كېرەك. پەن - تېخنىكىدا يېڭىلىق يارىتىش ۋە ئىختىساسلىقلار ئەقلىي كۈچى ئەۋزەللىكىنى تولۇق جارى قىلدۇرۇپ، شىنجاڭنىڭ «بەش چوڭ ئىستراتېگىيەلىك ئورۇن بېكىتمىسى» بولۇپمۇ جەنۇبىي شىنجاڭنىڭ تەرەققىياتىدىكى جىددىي ھەل قىلىشقا تېگىشلىك قىيىن مەسىلىلەرنى چۆرىدەپ، تۈرلۈك پەن تەتقىقات نەتىجىلىرىنى شىنجاڭدا ئايلاندۇرۇپ ئەمەلىي قوللىنىشنى تېزلىتىش كېرەك.

شىنجاڭ داشۆ قەشقەر مەكتەپ رايونىدا، ئەركىن تۇنىياز مۇنداق دېدى: مەكتەپ قۇرۇلۇشى، پەنلەرنى تەسىس قىلىش قاتارلىق جەھەتلەردە كۈچ سەرپ قىلىپ، ئىچكى ئامىللىق تەرەققىياتنى گەۋدىلەندۈرۈپ، مەۋقەنى جەنۇبىي شىنجاڭغا قويۇپ، ئوتتۇرا ئاسىياغا يۈزلىنىپ، زامانىۋى يېزا ئىگىلىكى، چېگرا ھالقىغان سودا، رەقەملىك ئىقتىساد قاتارلىق پەنلەرنى كۈچەيتىش كېرەك. تېخىمۇ ياخشى مۇھىت يارىتىپ، كۆپ خىل تەدبىرنى تەڭ قوللىنىپ، ئوقۇتقۇچىلار قوشۇنى قۇرۇلۇشىنى كۈچەيتىپ، «جەلپ قىلىش، ئېلىپ قېلىش، ياخشى ئىشلىتىش»كە ھەقىقىي كاپالەتلىك قىلىش كېرەك.

ئەركىن تۇنىياز يەكەن ناھىيەلىك ئۇنىۋېرسال پاراۋانلىق مەركىزىگە كېلىپ، دەرسخانا، ياتاقلارغا كىرىپ بالىلار ۋە ياشانغانلارنى يوقلىدى. ئۇ مۇنداق دېدى: دىققەتنى ياشانغانلار، بالىلار ۋە ئالاھىدە قىيىنچىلىقى بار كىشىلەر توپىغا مەركەزلەشتۈرۈپ، كۆڭۈل بۆلۈش، يار - يۆلەك بولۇش مېخانىزمىنى مۇكەممەللەشتۈرۈپ، پارتىيەنىڭ خەلققە نەپ يەتكۈزۈش تۈرلۈك سىياسىتىنى ياخشى ئەمەلىيلەشتۈرۈپ، ئاممىغا «نەپنىڭ قەيەردىن كەلگەنلىكى، كىمدىن مىننەتدار بولۇپ جاۋاب قايتۇرۇش كېرەكلىكى»نى ئېنىق چۈشەندۈرۈش كېرەك.

شىنجاڭ رۇيخاۋ توقۇمىچىلىق چەكلىك شىركىتىدە، ئەركىن تۇنىياز مۇنداق بىلدۈردى: تۈر قۇرۇلۇشىنى تېزلىتىپ، ئىشلەپچىقىرىش ئىقتىدارىنى تولۇق قوزغىتىپ، تېخىمۇ كۆپ ئاممىنى يېقىن ئەتراپتا ئىشقا ئورۇنلىشىشقا قوبۇل قىلىپ، ئاممىنىڭ كىرىمىنى ئاشۇرۇشنى ئىلگىرى سۈرۈش كېرەك؛ تەنسو شىنسەي (شىنجاڭ) پەن - تېخنىكا چەكلىك شىركىتىدە مۇنداق كۆرسەتتى: دۆلەت ئىچى ۋە خەلقئارادىن ئىبارەت ئىككى بازاردىن ياخشى پايدىلىنىپ، پەن - تېخنىكىنى تەتقىق قىلىش - ئېچىش سالمىقىنى زورايتىپ، بىرىليانت كەسپىنى يېتىلدۈرۈشنى كەسىپ نام كارتىسىغا ئايلاندۇرۇش كېرەك؛ يەكەن ناھىيەسىنىڭ بەيجېنجۇ يېزا ئىگىلىك تەرەققىيات چەكلىك شىركىتىدە مۇنداق تەكىتلىدى: يەرلىكنىڭ ئەلا سۈپەتلىك خاس يېزا ئىگىلىك مەھسۇلاتلىرى يوشۇرۇن كۈچىنى چوڭقۇر قېزىپ، بازاردا ئالقىشقا ئېرىشىدىغان تېخىمۇ كۆپ مەھسۇلاتنى بازارغا سېلىش كېرەك.

يەكەن ناھىيەلىك جەمئىيەت ئامانلىقىنى ھەر تەرەپلىمە تۈزەش مەركىزىدە، ئەركىن تۇنىياز كۆزنەكتە ئىش بېجىرگۈچى خادىملار بىلەن پىكىر ئالماشتۇردى، مۇرەسسە قىلىش ئىشخانىسىغا كىرىپ زىددىيەتلەرنى مۇرەسسە قىلىپ بىر تەرەپ قىلىش قاتارلىق ئەھۋاللارنى ئىگىلەپ مۇنداق تەكىتلىدى: قانۇنچىللىق تەپەككۇرى ۋە قانۇنچىللىق ئۇسۇلى ئارقىلىق زور خەۋپ - خەتەرنىڭ ئالدىنى ئېلىپ ۋە ئۇنى تۈگىتىپ، ئامما ئاڭلاپ چۈشىنەلەيدىغان سۆزلەر ئارقىلىق قانۇننى چۈشەندۈرۈپ، قانۇننى ئومۇملاشتۇرۇپ، ماجىرالارنى ھەل قىلىپ، كۆڭلىدىكى تۈگۈننى يېشىش كېرەك.

تەكشۈرۈپ تەتقىق قىلىش جەريانىدا، ئەركىن تۇنىياز مۇنداق تەكىتلىدى: تەرەققىيات بىلەن بىخەتەرلىكنى بىرتۇتاش ياخشى پىلانلاپ، تېررورلۇققا قارشى تۇرۇش، مۇقىملىقنى قوغداشنى قانۇنچىللاشتۇرۇش، دائىملاشتۇرۇشقا دائىر تۈرلۈك تەدبىرلەرنى ھەقىقىي، ئەمەلىي تۇتۇپ، جەمئىيەت ئومۇمىيىتىنىڭ سىجىل مۇقىم بولۇشى، ئۇزاققىچە مۇقىم بولۇشىنى قەتئىي قوغداش كېرەك. مەركەز ۋە ئاپتونوم رايوننىڭ جەنۇبىي شىنجاڭنىڭ تەرەققىياتىنى قوللاشقا دائىر تۈرلۈك سىياسەتلىرىدىن ياخشى پايدىلىنىپ، تۈر قۇرۇلۇشىنىڭ ئاچقۇچلۇق مەزگىلىنى ياخشى تۇتۇپ، ئامىل كاپالىتىنى كۈچەيتىپ، بالدۇر قۇرۇلۇش قىلىش، قۇرۇلۇشنى بالدۇر تاماملاش، بالدۇر ئۈنۈم ھاسىل قىلىشقا تۈرتكە بولۇش كېرەك. سىجىل تۈردە ئىستىلنى ياخشىلاپ، ئىقتىدارنى ئاشۇرۇپ، توغرا سىياسىي نەتىجە قارىشىنى مۇستەھكەم تۇرغۇزۇپ، ئەمەلىي ئىشلەش، ئەمەلىي ئۈنۈمنى كۆزلەشتە چىڭ تۇرۇش كېرەك.

نيې جۇاڭ تەكشۈرۈپ تەتقىق قىلىشقا قاتناشتى.