ئېكولوگىيە - مۇھىتنى ياخشىلاشنىڭ پايدىسىدىن ھەر مىللەت ئاممىنى نەپكە ئېرىشتۈرۈش كېرەك

ئەركىن تۇنىياز مەركەز ئېكولوگىيە - مۇھىتنى قوغداش بويىچە نازارەت قىلىشتا قايتما ئىنكاس قىلىنغان مەسىلىلەرنى تۈزىتىش خىزمىتىنى تەكشۈرۈپ تەتقىق قىلدى ۋە ئۇنىڭغا ھەيدەكچىلىك قىلدى

ئېكولوگىيە - مۇھىتنى ياخشىلاشنىڭ پايدىسىدىن ھەر مىللەت ئاممىنى نەپكە ئېرىشتۈرۈش كېرەك

شىنجاڭ گېزىتى، فۇكاڭ، 8 - ئاينىڭ 17 - كۈنى خەۋىرى ئانار بۇلۇت\شىنجاڭ گېزىتى مۇخبىرى لى ياڭ خەۋەر قىلىدۇ: 8 - ئاينىڭ 15 - كۈنى، 17 - كۈنى، ئاپتونوم رايونلۇق پارتىيە كومىتېتىنىڭ مۇئاۋىن شۇجىسى، ئاپتونوم رايوننىڭ رەئىسى ئەركىن تۇنىياز ئىلگىرى - كېيىن بولۇپ، سانجى شەھىرى، فۇكاڭ شەھىرىگە كېلىپ، مەركەز ئېكولوگىيە - مۇھىتنى قوغداش بويىچە نازارەت قىلىشتا قايتما ئىنكاس قىلىنغان مەسىلىلەرنى تۈزىتىش خىزمىتىنى تەكشۈرۈپ تەتقىق قىلدى ۋە ئۇنىڭغا ھەيدەكچىلىك قىلدى. ئۇ مۇنداق كۆرسەتتى: ياخشى ئېكولوگىيە - مۇھىت ئەڭ ئومۇمىي مەنپەئەتدار بولغان خەلق تۇرمۇشى بەخت - سائادىتى، شى جىنپىڭ ئېكولوگىيە مەدەنىيلىكى ئىدىيەسىنى ئەمەلدە كۆرسىتىپ، يۈكسەك سىياسىي مەسئۇلىيەت تۇيغۇسى بىلەن، مەركەز ئېكولوگىيە - مۇھىتنى قوغداش بويىچە نازارەت قىلىشتا قايتما ئىنكاس قىلىنغان مەسىلىلەرنى تۈزىتىشنى قاتتىق، ئەمەلىي، كەم - كوتسىز ياخشى تۇتۇپ، ئېكولوگىيە - مۇھىتنى سىجىل ياخشىلاشنىڭ پايدىسىدىن ھەر مىللەت ئاممىنى تېخىمۇ كەڭ دائىرىدە نەپكە ئېرىشتۈرۈش كېرەك.

جيۇجوۋ خېڭچاڭ ئەشيا ئوبوروتى پاي چەكلىك شىركىتى يېڭى ئېنېرگىيەلىك ئېغىر تىپتىكى يۈك ئاپتوموبىلىنى يېڭىلاش ئارقىلىق، ئېنېرگىيە تېجەپ بۇلغىما ئازايتىشنى ئىشقا ئاشۇردى، كاربونسىز ئەقلىي ئىقتىدارلىق ئەشيا ئوبوروت باغچىسى قۇرماقتا. ئەركىن تۇنىياز كارخانىنىڭ تۈزىتىشتە قولغا كەلتۈرگەن نەتىجىلىرىنى تولۇق مۇئەييەنلەشتۈردى، كارخانىنىڭ يېڭى ئېنېرگىيەلىك ئەشيا ئوبوروتى كەسىپ زەنجىرىنى داۋاملىق ئۇزارتىپ، يېشىل تەرەققىيات جەھەتتە ئۈلگە كۆرسىتىشىنى ئۈمىد قىلدى.

يوۋپەي ئېنېرگىيەسى (فۇكاڭ) كۆمۈر كوكسلاش چەكلىك شىركىتىدە، ئەركىن تۇنىياز كارخانىنىڭ «بىر كارخانىغا بىر تەدبىر» بويىچە ئاتموسفېرا بۇلغىنىشىنى تۈزەش لايىھەسىنى ئەمەلىيلەشتۈرۈشتە قولغا كەلتۈرگەن نەتىجىلىرىنى ئىگىلىدى، قىيىنچىلىق، ئىلتىماس - تەلەپلەرنى ئاڭلىدى، ئالاقىدار ئىشلارنى نەق مەيداندا بېجىرىشكە تاپشۇردى. ئۇ مۇنداق دېدى: تۈزىتىش خىزمىتى جەزمەن ئەمەلىيلەشتۈرۈشكە تېگىشلىك قاتتىق ۋەزىپە. سىياسىي يۈكسەكلىكنى ئۆستۈرۈپ، ۋاقىت جەدۋىلى تۈزۈپ، ئىش مۇددىتىنى تەتۈر ساناق بويىچە تىزىپ، قاتتىق ئالغا سىلجىتىپ، يىل ئاخىرىدىن بۇرۇن تۈزىتىش ۋەزىپىسىنى ۋاقتىدا تاماملاشقا ھەقىقىي كاپالەتلىك قىلىش كېرەك.

شىنجاڭ تيەنلۇڭ كانچىلىق پاي چەكلىك شىركىتىدە، ئەركىن تۇنىياز كارخانىنىڭ مەۋقەنى «بەش چوڭ ئىستراتېگىيەلىك ئورۇن بېكىتمىسى»گە قويۇپ، ئەۋزەللىكىنى داۋاملىق جارى قىلدۇرۇپ، تەرەققىي قىلىپ زورىيىشىنى ئۈمىد قىلدى. ئۇ مۇنداق بىلدۈردى: تېخنىكا ئۆزگەرتىش، ئېنېرگىيە تېجەش بويىچە ئۆزگەرتىشكە بولغان مەبلەغ سېلىنمىسىنى زورايتىپ، بۇلغىما ئازايتىش نەتىجىلىرىنى سىجىل مۇستەھكەملەپ، تىرىشىپ نۇقتىلىق كەسىپلەر بويىچە مۇھىت قوغداش ئۈنۈمى A دەرىجىلىك كارخانا ئۆلچىمىگە بالدۇرراق يېتىپ، تەننەرخنى يەنىمۇ تېجەپ، ئۈنۈمنى ئاشۇرۇش كېرەك.

فۇكاڭ گۇاڭياۋ ئەينەك چەكلىك شىركىتىدە، ئەركىن تۇنىياز كارخانىنى مەسىلىلەرنى تۈزىتىش، ئىشلەپچىقىرىش تىجارىتى ۋە بىخەتەر ئىشلەپچىقىرىشنى بىرتۇتاش پىلانلاپ ياخشى تۇتۇپ، ئىرادە ۋە ئىشەنچنى چىڭىتىپ، پاكىز ئېنېرگىيەنىڭ ئورنىغا دەسسىتىشنى قەرەلىدە تاماملاپ، مۇھىت قوغداش بىلەن كەسىپ دەرىجىسىنى ئۆستۈرۈشنى ماس ئىلگىرى سۈرۈشنى ئىشقا ئاشۇرۇشقا ئىلھاملاندۇردى. ئۇ مۇنداق كۆرسەتتى: ھەر دەرىجىلىك ھۆكۈمەت ۋە ئالاقىدار تارماقلار تۈرلۈك سىياسەتلەرنى تولۇق ئىگىلەپ ۋە ئۇلاردىن ياخشى پايدىلىنىپ، كارخانىلارنى «بىرگە بىر» مۇھىت باھالاش يېتەكچىلىكى ۋە سىياسەت مەدىتى بىلەن تەمىنلىشى كېرەك.

فۇكاڭ شەھەرلىك ئېكولوگىيە - مۇھىتنى كۆزىتىش - ئۆلچەش پونكىتىدا، ئەركىن تۇنىياز دائىرىلەشتۈرۈپ ئىنچىكە كۆزىتىش - ئۆلچەش سۇپىسى ئارقىلىق، ھاۋا سۈپىتىنى توردا كۆزىتىش - ئۆلچەش ئەمەلىي سانلىق مەلۇماتلىرىنى كۆردى. ئۇ مۇنداق دېدى: كۆزىتىش - ئۆلچەشنى ئۇچۇرلاشتۇرۇش، ئەقلىي ئىقتىدارلاشتۇرۇش سەۋىيەسىنى ئۈزلۈكسىز ئۆستۈرۈپ، نىشاننى چىڭ كۆزلەپ، نۇقتىلىق ئۆتكەلگە ھۇجۇم قىلىپ، تىيانشاننىڭ شىمالىي ئېتىكىدىكى شەھەرلەر توپىنىڭ ئاتموسفېرا مۇھىتىنى تۈزەش ئۈچۈن تۆھپە قوشۇش كېرەك.

تەكشۈرۈپ تەتقىق قىلىش جەريانىدا، ئەركىن تۇنىياز مۇنداق تەكىتلىدى: «ئىككىنى تىكلەش»نى قەتئىي ھىمايە قىلىش، «ئىككىنى قوغداش»نى قەتئىي ئىشقا ئاشۇرۇش يۈكسەكلىكىدە تۇرۇپ، مەركەز ئېكولوگىيە - مۇھىتنى قوغداش بويىچە نازارەت قىلىشتا قايتما ئىنكاس قىلىنغان مەسىلىلەرنى تۈزىتىش سىياسىي مەسئۇلىيىتىنى پۇختا زىممىگە ئېلىش كېرەك. «ئېكولوگىيە - مۇھىتنى قوغداشنى نازارەت قىلىش خىزمىتى نىزامى»نى چوڭقۇر ئىزچىللاشتۇرۇش بىلەن نازارەت قىلىش، تۈزىتىشنى ياخشى تۇتۇشنى بىرلەشتۈرۈپ، تەدبىرلەرنى يەنىمۇ ئىنچىكىلەشتۈرۈپ، ئەمەلىيلەشتۈرۈپ، ئەمەلىيلەشتۈرۈشنى كەم - كوتسىز چىڭ تۇتۇش كېرەك. بىرتۇتاش پىلانلاپ ئورۇنلاشتۇرۇش ۋە ھەيدەكچىلىك - يېتەكچىلىك قىلىشنى كۈچەيتىپ، «بىر كارخانىغا بىر تەدبىر» بويىچە تۈزىتىش لايىھەسىنى ئىنچىكىلەشتۈرۈپ، ئامىل كاپالىتىنى ياخشى ئىشلەش كېرەك. تەۋەلىك مەسئۇلىيىتى، تارماقلار مەسئۇلىيىتى، كارخانىلار مەسئۇلىيىتىنى چىڭىتىپ، تاماملانغان تۈزىتىش ئىش تۈرلىرىنى ۋاقتىدا «قايتا تەكشۈرۈپ»، تۈزىتىش نەتىجىلىرىنى يەنىمۇ مۇستەھكەملەش، ئۆستۈرۈش كېرەك.