گېزىتىمىز، ئۈرۈمچى، 8 - ئاينىڭ 22 - كۈنى خەۋىرى ئانار بۇلۇت\شىنجاڭ گېزىتى مۇخبىرى لى ياڭ خەۋەر قىلىدۇ: 8 - ئاينىڭ 21 - كۈنى چۈشتىن كېيىن، ئاپتونوم رايونلۇق پارتىيە كومىتېتىنىڭ مۇئاۋىن شۇجىسى، ئاپتونوم رايوننىڭ رەئىسى ئەركىن تۇنىياز ئۈرۈمچىدە قازاقىستان سودا ۋە بىر گەۋدىلەشتۈرۈش مىنىستىرلىقىنىڭ مىنىستىرى شاققالىيېف بىلەن كۆرۈشۈپ، جۇڭگو شىنجاڭ بىلەن قازاقىستاننىڭ يەرلىكلەر ئارا ئالماشتۇرۇش - ھەمكارلىقىنى كېڭەيتىش توغرىسىدا چوڭقۇر پىكىر ئالماشتۇردى.
ئەركىن تۇنىياز مۇنداق بىلدۈردى: ئىككى دۆلەت دۆلەت باشلىقلىرىنىڭ ئىستراتېگىيەلىك يېتەكچىلىكىدە، جۇڭگو - قازاقىستان ئەمەلىي ھەمكارلىقىنىڭ ئاساسى پۇختا، ھەرىكەتلەندۈرگۈچ كۈچى يېتەرلىك بولدى. ئۇزاقتىن بۇيان، جۇڭگو شىنجاڭ بىلەن قازاقىستاننىڭ يەرلىكلەر ئارا ئالاقىسى قويۇقلىشىپ، يېزا ئىگىلىكى، قاتناش، ئادىمىيەت قاتارلىق ساھەلەردىكى ئەمەلىي ھەمكارلىقى تېخىمۇ يۇقىرى ئۈنۈملۈك بولدى. ئىككى تەرەپنىڭ جۇڭگو - قازاقىستان پورتىنىڭ ئۇل ئەسلىھە شارائىتىنى ئورتاق ياخشىلاپ، تاموژنىدىن ئۆتكۈزۈش ئۈنۈمىنى ئۆستۈرۈشىنى؛ جۇڭگو - قازاقىستان قورغاس خەلقئارا چېگرا ھەمكارلىق مەركىزى مىنىستىر دەرىجىلىكلەر ماسلاشتۇرۇش مېخانىزمىنى ئورنىتىپ، تېخىمۇ ئومۇميۈزلۈك ۋە ئالدىن كۆرەرلىككە ئىگە تەرەققىيات يىرىك پىلانىنى تۈزۈپ، ھەمكارلىق مەركىزىنى زورايتىشىنى ۋە كۈچەيتىشىنى ئۈمىد قىلىمەن. شۇنىڭ بىلەن بىللە، قازاقىستان تەرەپ بىلەن ھاسىل قىلىنغان مۇھىم ھەمكارلىق ئىش تۈرلىرىنىڭ ئەمەلىيلىشىپ ئۈنۈم ھاسىل قىلىشىغا ئورتاق تۈرتكە بولۇپ، سودا، مەبلەغ سېلىش، مەدەنىيەت - تەنتەربىيە - ساياھەت، پەن - تېخنىكا - مائارىپ، ئۇل ئەسلىھە، زامانىۋى يېزا ئىگىلىكى، دوستانە شەھەر قاتارلىق ساھەلەردىكى ھەمكارلىقنى ئۈزلۈكسىز چوڭقۇرلاشتۇرۇشنى ئۈمىد قىلىمەن.
شاققالىيېف مۇنداق بىلدۈردى: قازاقىستان - جۇڭگو دۆلەت باشلىقلىرى ئىككى دۆلەت مۇناسىۋىتى ئۈچۈن يېڭى ئۇلۇغۋار پىلان تۈزدى، بولۇپمۇ بۇ يىل 6 - ئايدا، رەئىس شى جىنپىڭ قازاقىستاننىڭ ئاستانىغا بېرىپ 2 - نۆۋەتلىك جۇڭگو − ئوتتۇرا ئاسىيا باشلىقلار يىغىنىغا قاتنىشىپ، ئىككى دۆلەتنىڭ كۆپ ساھەلىك ئەمەلىي ھەمكارلىقىغا كۈچلۈك ھەرىكەتلەندۈرگۈچى كۈچ قوشتى. جۇڭگو شىنجاڭ بىلەن بولغان ھەمتۈرتكىلىك پىكىر ئالماشتۇرۇشنى يەنىمۇ كۈچەيتىپ، چېگرا ھالقىغان سودا، يېشىل ئېنېرگىيە، قاتناش تىرانسپورت قاتارلىق جەھەتلەرنى چۆرىدەپ ھەمكارلىقنى چوڭقۇرلاشتۇرۇپ، تېخىمۇ يۇقىرى سەۋىيەدە ئۆزئارا مەنپەئەت يەتكۈزۈش ئاساسىدا ئورتاق پايدا ئېلىشنى تىرىشىپ ئىشقا ئاشۇرۇشنى خالايمىز.
چېن ۋېيجۈن، يۈسۈپجان مەمەت، ئاپتونوم رايوننىڭ ئالاقىدار تارماقلىرى ھەم ئاپتونوم رايونغا قاراشلىق دۆلەت كارخانىلىرى، مەركەزنىڭ شىنجاڭدىكى ئالاقىدار ئورۇنلىرى ھەم كارخانىلارنىڭ مەسئۇللىرى كۆرۈشۈشكە قاتناشتى.