− يولداش شى جىنپىڭ يادرولۇقىدىكى پارتىيە مەركىزىي كومىتېتىنىڭ «14 - بەش يىل»لىق ئىقتىساد، جەمئىيەت تەرەققىياتىغا يېتەكچىلىك قىلغانلىقى توغرىسىدا خاتىرە
□ شىنخۇا ئاگېنتلىقى مۇخبىرلىرى
2021 - يىلىدىن 2025 - يىلىغىچە، ۋاقىت قەدىمى يەنە بىر بەش يىلنى بېسىپ ئۆتتى، خەلق ئىگىلىكى ۋە ئىجتىمائىي تەرەققىياتنىڭ 14 - بەش يىللىق يىرىك پىلانى پات ئارىدا تاماملىنىدۇ.
«14 - بەش يىل» مەزگىلىدە، يولداش شى جىنپىڭ يادرولۇقىدىكى پارتىيە مەركىزىي كومىتېتى پۈتۈن پارتىيە، پۈتۈن مەملىكەتتىكى ھەر مىللەت خەلقنى ئىتتىپاقلاشتۇرۇپ، يېتەكلەپ، بىر مەقسەتتە كۈچ چىقىرىپ، غەيرەت - شىجائەتكە تولۇپ، قۇدرەتلىك دۆلەت قۇرۇش، مىللەتنى گۈللەندۈرۈش ئۇلۇغ ئىشلىرىنى جۇڭگوچە زامانىۋىلاشتۇرۇش ئارقىلىق ئومۇميۈزلۈك ئالغا سىلجىتىش ھەيۋەتلىك مۇساپىسىدە، يېڭى ئۇلۇغ كۈرەش ئارقىلىق يېڭى تارىخىي ئۇلۇغ ئىشلارنى ياراتتى.
بەش يىل جەريانىدا، بىرىنچى 100 يىللىق كۈرەش نىشانىنى ئىشقا ئاشۇرۇشتىن ئىككىنچى 100 يىللىق كۈرەش نىشانىنى ئىشقا ئاشۇرۇش يېڭى مۇساپىسىنى باشلاشقىچە، ئومۇميۈزلۈك ھاللىق جەمئىيەت قۇرۇپ چىقىشتىن پۈتكۈل خەلقنىڭ ئورتاق بېيىشىنى ئىلگىرى سۈرۈشكىچە، دۆلىتىمىزنىڭ ئىقتىساد، جەمئىيەت تەرەققىياتىدا يېڭى ئىجادىي ئىلگىرىلەش، بۆسۈش خاراكتېرلىك ئۆزگىرىش، تارىخىي مۇۋەپپەقىيەتلەر قولغا كەلتۈرۈلدى، جۇڭگونىڭ جاۋاب قەغىزى دۇنيانىڭ دىققىتىنى تارتتى، جۇڭگو يولى تېخىمۇ كېڭەيدى، جۇڭگو كۈچىنى توسۇپ قالغىلى بولمايدۇ.
دولقۇن يېرىپ ئىلگىرىلەش، يول باشلاپ ئالغا ئىلگىرىلەش
− «قۇدرەتلىك دۆلەت قۇرۇش، مىللەتنى گۈللەندۈرۈشنى ئالغا سىلجىتىش ئۈچۈن بىز بۇ بىر ئەۋلاد كىشىلەر تېگىشلىك تۆھپە قوشۇشىمىز كېرەك»
بۇ يىل 7 - ئاينىڭ 19 - كۈنى، شىزاڭ لىنجىدا ئومۇمىي سېلىنما تەخمىنەن 1 تىرىليون 200 مىليارد يۈەن بولغان يالۇزاڭبۇ دەرياسىنىڭ تۆۋەن ئېقىنىدىكى سۇ ئېلېكتىر قۇرۇلۇشى باشلاندى.
بۇ چاغدا، دۇنيانىڭ ئۆگزىسىدە قۇرۇلۇۋاتقان «پولات - تۆمۈر تومۇرى» سىچۇەن - شىزاڭ تۆمۈريولى ھەيۋەتلىك قىياپەت بىلەن تاغ - داۋانلاردىن ئېشىپ لىنجىغا قاراپ ئىلگىرىلەۋاتاتتى.
2021 - يىلى، «14 - بەش يىل»لىق يىرىك پىلاننىڭ باشلىنىش يىلىدا، باش شۇجى شى جىنپىڭ شىزاڭدا تەكشۈرۈشتە بولغاندا سىچۇەن - شىزاڭ تۆمۈريولىنىڭ مۇھىم تۈگۈن بېكىتى بولغان لىنجى ۋوگزالىغا كېلىپ، يائەندىن لىنجى بۆلىكىگىچە بولغان قۇرۇلۇشنىڭ ئالغا سىلجىتىلىش ئەھۋالى توغرىسىدىكى دوكلاتنى ئاڭلاپ مۇنداق كۆرسەتتى: «ئىككىنچى 100 يىللىق كۈرەش نىشانىنى ئىشقا ئاشۇرۇش مۇساپىسىدىكى بۇ بەلگە خاراكتېرلىك قۇرۇلۇشنى ياخشى قىلىش كېرەك».
«14 - بەش يىل»لىق يىرىك پىلان تاماملىنىدىغان يىلدا، سەددىچىن سېپىلىنىڭ ئىچى - سىرتى، چاڭجياڭ دەرياسىنىڭ جەنۇبى - شىمالىغا نەزەر سالساق، جۇڭخۇا زېمىنىدا رەڭدار نۇرلار جۇلالىنىپ تۇراتتى، ھاياتىي كۈچ ئۇرغۇغانىدى −
بۇ، شەرەپ قۇچقان شانلىق جۇڭگو: جۇڭگو كوممۇنىستىك پارتىيەسى قۇرۇلغانلىقىنىڭ 100 يىللىقى داغدۇغىلىق تەبرىكلەندى، پارتىيە 20 - قۇرۇلتىيى غەلىبىلىك ئېچىلدى، يېڭى جۇڭگو قۇرۇلغانلىقىنىڭ 75 يىللىقى قىزغىن تەبرىكلەندى، پات ئارىدا جۇڭگو خەلقىنىڭ ياپون تاجاۋۇزچىلىرىغا قارشى تۇرۇش ئۇرۇشى ھەم دۇنيا فاشىزمغا قارشى تۇرۇش ئۇرۇشى غەلىبىسىنىڭ 80 يىللىقى داغدۇغىلىق خاتىرىلىنىدۇ.
بۇ، گۈللەپ ياشناپ جاسارەت بىلەن ئالغا ئىلگىرىلەۋاتقان جۇڭگو: 102 تۈرلۈك چوڭ - چوڭ قۇرۇلۇش ئوڭۇشلۇق ئالغا سىلجىتىلدى، سەككىز تۈرلۈك كۆرسەتكۈچنىڭ ئىلگىرىلەش ئەھۋالى كۆزلىمىدىن ئاشتى، ئىقتىسادنىڭ ئېشىش مىقدارىنىڭ 35 تىرىليون يۈەندىن ئېشىشى مۆلچەرلەندى، ئالدىنقى تۆت يىلدا ئىقتىسادنىڭ ئېشىش سۈرئىتى ئوتتۇرىچە ％5.5كە يەتتى، دۇنيا ئىقتىسادىنىڭ ئېشىشىغا تۆھپە قوشۇش نىسبىتى ％30 ئەتراپىدا بولۇشنى ساقلىدى؛ بۇ، ھاياتىي كۈچى تولۇپ تاشقان يېڭىلىق يارىتىشچان جۇڭگو: دۆلىتىمىزدە ئىشلەنگەن تۇنجى ئېلېكتىر ماگنىت پۇرژىنىلىق ئاۋىياماتكا − فۇجيەن ناملىق ئاۋىياماتكا سۇغا چۈشۈرۈلدى، تۇنجى قېتىم خەلقئارا قاتناشقا ماس كېلىش ئۆلچىمى بويىچە تەتقىق قىلىپ ياسالغان دۆلىتىمىزدە ئىشلەنگەن چوڭ تىپتىكى ئايروپىلان C919 سودا خاراكتېرلىك ئۇچۇشنى ئىشقا ئاشۇردى، جۇڭگونىڭ تۇنجى ئالەم بوشلۇقى پونكىتى «تيەنگۇڭ» قۇرۇلۇشى ئومۇميۈزلۈك پۈتتى؛
بۇ، خەلق تۇرمۇشىنى ھەممىدىن ئۈستۈن ئورۇنغا قويىدىغان بەختلىك جۇڭگو: ھەر يىلى شەھەر - بازارلاردا 12 مىليوندىن كۆپرەك كىشى يېڭىدىن ئىشقا ئورۇنلاشتى، يېڭىدىن كۆپەيگەن ئەمگەك كۈچلىرىنىڭ مائارىپنى قوبۇل قىلىش ئوتتۇرىچە يىل چېكى 14 يىلدىن ئاشتى، كىشىلەرنىڭ ئوتتۇرىچە كۆزلىمە ئۆمرى 79 ياشقا يەتتى، مەملىكەت بويىچە ئۆلكە ھالقىپ باشقا جايدا داۋالىنىش خىراجىتىنى بىۋاسىتە راسچوت قىلىش ئارقىلىق 560 مىليون ئادەم قېتىمغا نەپ يەتكۈزۈلدى...
باش شۇجى شى جىنپىڭ مۇنداق كۆرسەتتى: «جۇڭگوچە زامانىۋىلاشتۇرۇش قۇرۇلۇشىنى تېز ئالغا سىلجىتىپ، ئىتتىپاقلىشىپ كۈرەش قىلىپ، يول ئېچىپ يېڭىلىق يارىتىپ، يېڭى مۇساپىدە دەۋرگە يۈز كېلەلەيدىغان، تارىخقا يۈز كېلەلەيدىغان، خەلققە يۈز كېلەلەيدىغان نەتىجىلەرنى يارىتىپ، قۇدرەتلىك دۆلەت قۇرۇش، مىللەتنى گۈللەندۈرۈشنى ئالغا سىلجىتىش ئۈچۈن بىز بۇ بىر ئەۋلاد كىشىلەرنىڭ تېگىشلىك تۆھپىسىنى قوشۇشىمىز كېرەك».
بەش يىلدا، يولداش شى جىنپىڭ يادرولۇقىدىكى پارتىيە مەركىزىي كومىتېتى ئومۇملۇقنى بىرتۇتاش ئىگىلەپ، يۆنىلىشكە يېتەكچىلىك قىلىپ، ۋەزىيەتنى دەل جايىدا تەھلىل قىلىپ، ئىستراتېگىيەلىك ئىرادىنى ساقلاپ، ئۇلۇغۋار پىلاننى ئاخىرغىچە داۋاملاشتۇرۇشتا چىڭ تۇردى −
«14 - بەش يىل» مەزگىلى دۆلىتىمىز ئومۇميۈزلۈك ھاللىق جەمئىيەت قۇرۇپ چىققاندىن كېيىن، ۋەزىيەتكە تايىنىپ ئالغا ئىلگىرىلەپ ئىككىنچى 100 يىللىق كۈرەش نىشانىنى ئىشقا ئاشۇرۇش ئۈچۈن كۈرەش قىلىدىغان بىرىنچى بەش يىل، دۆلىتىمىز تېپىلغۇسىز پۇرسەتنى چىڭ تۇتۇپ، ھەرخىل خىرىسلارغا تاقابىل تۇرۇپ، تەرەققىيات يېڭى بوشلۇقىنى كېڭەيتىدىغان ئاچقۇچلۇق مەزگىل.
2020 - يىلى 10 - ئاينىڭ 29 - كۈنى، پارتىيە 19 - نۆۋەتلىك مەركىزىي كومىتېتى 5 - ئومۇمىي يىغىنىدا «14 - بەش يىل»لىق يىرىك پىلان توغرىسىدىكى تەكلىپ قاراپ چىقىپ ماقۇللاندى. تولۇق تېكىستتە يېڭى تەرەققىيات باسقۇچىنى چوڭقۇر تونۇش، يېڭى تەرەققىيات ئىدىيەسىنى ئومۇميۈزلۈك ئىزچىللاشتۇرۇش، يېڭى تەرەققىيات ئەندىزىسىنى كۈچەپ بەرپا قىلىش لوگىكىلىق ئاساسىي لىنىيە قىلىنىپ، باش شۇجى شى جىنپىڭنىڭ جۇڭگونىڭ كەلگۈسى تەرەققىياتىغا بولغان چوڭقۇر ئويلىنىشى نامايان قىلىندى.
تومۇز كۈنلىرىدە، جياڭسۇ نەنتۇڭ ۋۇشەن رايونىنىڭ بىنجياڭ تەۋەلىك رايونىدىكى سۇ ئۈستى ئاسما يولىدا، گۈزەل تەبىئىي مەنزىرىلەر ساياھەتچىلەرنى قەدىمىنى توختىتىپ كۆرۈشكە جەلپ قىلدى.
2020 - يىلى 11 - ئايدا، پارتىيە 19 - نۆۋەتلىك مەركىزىي كومىتېتى 5 - ئومۇمىي يىغىنىدىن كېيىن تۇنجى قېتىم جايلاردا تەكشۈرۈشتە بولغاندا، باش شۇجى شى جىنپىڭ بۇ يەرگە كېلىپ چاڭجياڭ دەرياسى قىرغىقى لىنىيەسىنىڭ ئېكولوگىيەسىنى كۆزدىن كەچۈردى، ئارقىدىن ياڭجوۋغا بېرىپ چوڭ قانال بويىنىڭ مۇھىتىنى تۈزەش ئەھۋالىنى كۆردى، «ئېكولوگىيەنى ئالدىنقى ئورۇنغا قويۇش، يېشىل تەرەققىي قىلىش»تىن ئىبارەت باش تېما بۇنىڭغا سىڭدۈرۈلگەنىدى.
تەكشۈرۈش ئاخىرلاشقاندىن كېيىن ئېچىلغان چاڭجياڭ ئىقتىساد بەلبېغىنىڭ تەرەققىياتىغا ئومۇميۈزلۈك تۈرتكە بولۇش سۆھبەت يىغىنىدا، باش شۇجى شى جىنپىڭ مۇنداق كۆرسەتتى: «تارىخىي سەۋرچانلىق ۋە ئىستراتېگىيەلىك ئىرادىنى ساقلاپ، بىر ئۇلۇغۋار پىلاننى ئاخىرغىچە داۋاملاشتۇرۇپ، ئىشنى ئىشقا ئۇلاپ ئىشلەپ، سۈزۈك دەريا سۈيىنىڭ ئەۋلادمۇئەۋلاد ئېقىپ، خەلققە نەپ يەتكۈزۈشىگە ھەقىقىي كاپالەتلىك قىلىش كېرەك».
بەش يىلدىن بۇيان، رايون تەرەققىيات ئىستراتېگىيەسىنى ئەمەلىيلەشتۈرۈشكە تۈرتكە بولۇش سۆھبەت يىغىنىنى كۆپ قېتىم رىياسەتچىلىك قىلىپ ئېچىشتىن ئۇدا بەش يىل مەملىكەتلىك ئىككى يىغىندا يېڭىلىق يارىتىش توغرىسىدا توختىلىشقىچە، يەنە ئىرادىدىن قايتماي مەدەنىيەت كۈچلۈك دۆلىتى، مائارىپ كۈچلۈك دۆلىتى، ئىختىساسلىقلار كۈچلۈك دۆلىتى، تەنتەربىيە كۈچلۈك دۆلىتى، ساغلام جۇڭگو قۇرۇلۇشىغا تۈرتكە بولۇشقىچە، باش شۇجى شى جىنپىڭ «ئۇزاققىچە بوشاشماي تىرىشىپ، قەدەممۇقەدەم چوڭقۇرلاشتۇرۇپ، جەزمەن نەتىجە يارىتىش»نى قايتا - قايتا تەكىتلىدى.
بەش يىلدا، يولداش شى جىنپىڭ يادرولۇقىدىكى پارتىيە مەركىزىي كومىتېتى قانۇنىيەت ئۈستىدە ئىزدىنىپ، تەشەببۇسكارلىقنى ئىگىلەپ، بىر قاتار يېڭى قاراش، يېڭى ئىدىيە، يېڭى ئىستراتېگىيەلەرنى ئوتتۇرىغا قويۇپ، نەزەرىيەدە يېڭىلىق يارىتىش ئارقىلىق ئەمەلىيەتتە يېڭىلىق يارىتىشقا يېتەكچىلىك قىلدى −
«پەن - تېخنىكىدا يېڭىلىق يارىتىش بىلەن كەسىپتە يېڭىلىق يارىتىش يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇشنىڭ تۈپ يولى.» بۇ يىلقى مەملىكەتلىك ئىككى يىغىندا، باش شۇجى شى جىنپىڭ ئۆزى تۇرۇشلۇق 14 - نۆۋەتلىك مەملىكەتلىك خەلق قۇرۇلتىيى 3 - يىغىنى جياڭسۇ ۋەكىللەر ئۆمىكىنىڭ قاراپ چىقىشىغا قاتناشقاندا، يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇش توغرىسىدا يەنە بىر قېتىم يېڭى ھۆكۈمنى ئوتتۇرىغا قويدى.
جايلاردا تەكشۈرۈشتە بولغاندا تۇنجى قېتىم ئوتتۇرىغا قويۇشتىن سىستېمىلىق ئىزاھلاشقىچە، باش شۇجى شى جىنپىڭ يېڭى سۈپەتلىك ئىشلەپچىقىرىش كۈچلىرى دېگەن نېمە، نېمە ئۈچۈن يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇش كېرەك، يېڭى سۈپەتلىك ئىشلەپچىقىرىش كۈچلىرىنى قانداق راۋاجلاندۇرۇش كېرەك، دېگەن مۇھىم نەزەرىيە ۋە ئەمەلىيەت مەسىلىلىرىگە چوڭقۇر جاۋاب بېرىپ، ئىقتىساد، جەمئىيەت تەرەققىياتىنى مۇھىم قوللانما بىلەن تەمىنلىدى.
نەزەرىيە جەھەتتە تەرەققىياتنى بېيىتتى، ئەمەلىيەت جەھەتتە كۈندىن - كۈنگە يېڭى ئۆزگىرىشلەرنى بارلىققا كەلتۈردى.
2023 - يىلى 10 - ئايدا، مەملىكەتلىك تەشۋىقات، ئىدىيە، مەدەنىيەت خىزمىتى يىغىنى ئېچىلدى، يىغىندا شى جىنپىڭ مەدەنىيەت ئىدىيەسى رەسمىي ئوتتۇرىغا قويۇلدى.
«14 - بەش يىل» مەزگىلىدە، «ئىككىنچى بىرلەشتۈرۈش»نى ئوتتۇرىغا قويۇشتىن مەدەنىيەتكە ۋارىسلىق قىلىش ۋە ئۇنى راۋاجلاندۇرۇش سۆھبەت يىغىنىغا قاتنىشىش ھەم مۇھىم سۆز قىلىشقىچە، باش شۇجى شى جىنپىڭ مەدەنىيەت قۇرۇلۇشىنى دۆلەتنى ئىدارە قىلىشتا گەۋدىلىك ئورۇنغا قويدى.
«ئادىمىيەت ئىقتىسادشۇناسلىقى»دىن ئىبارەت مۇھىم تېمىنى ئوتتۇرىغا قويۇشتىن «مەدەنىيەت ئارقىلىق ئىقتىساد، جەمئىيەت تەرەققىياتىغا كۈچ قوشۇش»نى تەكىتلەشكىچە، باش شۇجى شى جىنپىڭ مەدەنىيەت بىلەن ئىقتىسادنىڭ يۇغۇرۇلۇشى، ھەمتۈرتكە بولۇشىغا يۈكسەك ئەھمىيەت بەردى.
شى جىنپىڭ مەدەنىيەت ئىدىيەسى مەدەنىيەت ئىشەنچىنىڭ ئەڭ نېگىزلىك، ئەڭ چوڭقۇر، ئەڭ ئۇزاق داۋاملىشىدىغان كۈچىنى ئويغاتتى، بۇنىڭ بىلەن پۈتكۈل جەمئىيەتنىڭ روھىي قىياپىتى جانلاندى، جۇڭگولۇقلارنىڭ ئىرادىسى، شىجائىتى، ئىشەنچى مىسلىسىز ئاشتى، پۈتكۈل مىللەتنىڭ يېڭىلىق يارىتىش، ئىجاد قىلىش ھاياتىي كۈچى تولۇق ئۇرغۇدى.
بەش يىلدا، يولداش شى جىنپىڭ يادرولۇقىدىكى پارتىيە مەركىزىي كومىتېتى ئىستراتېگىيەلىك پىلان تۈزۈپ، سالماقلىق بىلەن ۋەزىيەتكە ماسلىشىپ، ۋاقىت ۋە ۋەزىيەتنى ئىگىلەپ، خەۋپ - خەتەر ۋە پۇرسەتنى كۆزىتىپ، ئاچقۇچلۇق مەزگىلدە ئاچقۇچلۇق تاللاش چىقاردى −
ھازىر ۋە بۇنىڭدىن كېيىنكى بىر مەزگىل قۇدرەتلىك دۆلەت قۇرۇش، مىللەتنى گۈللەندۈرۈش ئۇلۇغ ئىشلىرىنى جۇڭگوچە زامانىۋىلاشتۇرۇش ئارقىلىق ئومۇميۈزلۈك ئالغا سىلجىتىشتىكى ئاچقۇچلۇق مەزگىل.
ئالغا ئىلگىرىلەش يولى ھەرگىزمۇ تۈپتۈز بولمايدۇ.
2024 - يىلى 9 - ئاينىڭ 26 - كۈنى، بېيجىڭ جۇڭنەنخەي، باش شۇجى شى جىنپىڭ جۇڭگو كوممۇنىستىك پارتىيەسى مەركىزىي كومىتېتى سىياسىي بىيۇروسى يىغىنىنى رىياسەتچىلىك قىلىپ ئاچتى.
شۇ يىلى 2 - پەسىلدىن بۇيان، بولۇپمۇ 3 - پەسىلگە قەدەم قويغاندا، دۆلىتىمىزنىڭ ئاساسلىق ئىقتىسادىي كۆرسەتكۈچلىرىنىڭ ئېشىش سۈرئىتى ئاستىلىدى، پاي بازىرى، ئۆي بازىرى بېسىمغا دۇچ كەلدى، بازار كۆزلىمىسى ئاجىزلىشىشقا يۈزلەندى، مەملىكەت ئىچى - سىرتىدا ئەندىشە كەيپىياتى سەل كېڭەيدى.
ئاچقۇچلۇق پەيت، مۇھىم تۈگۈندە، بۇ قېتىمقى يىغىندا بىر قاتار كۆپەيمە سىياسەتلەر كەسكىن ئورۇنلاشتۇرما قىلىنىپ، جەمئىيەت ئىشەنچىنى ئۈنۈملۈك ئۇرغۇتتى، ئىقتىساد كۆرۈنەرلىك قايتا ئۆرلىدى، پۈتۈن يىللىق ئىقتىساد، جەمئىيەت تەرەققىياتى ئاساسلىق نىشان - ۋەزىپىلىرى ئوڭۇشلۇق تاماملاندى.
بوران - چاپقۇن قانچە كۈچلۈك بولغانسېرى، رول تۇتۇپ يول باشلىغۇچىنىڭ قەتئىيلىكى، كەسكىنلىكى شۇنچە نامايان بولىدۇ.
2022 - يىلى 11 - ئايدا، ۋاقىتقا، ۋەزىيەتكە ئاساسەن ئىلمىي تەدبىر بەلگىلەپ، يېڭى تىپتىكى تاجسىمان ۋىرۇس يۇقۇمىنىڭ ئۆزگىرىشىنى دەل جايىدا ئىگىلەپ، ئالدىنى ئېلىش - تىزگىنلەش خىزمىتىنى يەنىمۇ ئەلالاشتۇرۇشتىكى 20 ماددىلىق تەدبىرنى مۇھاكىمە قىلدى، ئورۇنلاشتۇرما قىلدى؛
2025 - يىلى 2 - ئايدا، مەسىلىنى دەل جايىدا كۆزلەپ، دىققەتنى كۆڭۈل بۆلىدىغان نۇقتىلارغا مەركەزلەشتۈرۈپ، پۇقراۋى كارخانىلار سۆھبەت يىغىنىغا قاتنىشىپ ھەم مۇھىم سۆز قىلىپ، پۇقراۋى كارخانىلار ۋە پۇقراۋى ئىگىلىككە بولغان غەمخورلۇقى ۋە كۆڭۈل بۆلۈشىنى چوڭقۇر نامايان قىلدى؛
…
«14 - بەش يىل»دىكى ئىنتايىن پەۋقۇلئاددە تەرەققىيات مۇساپىسىدە، باش شۇجى شى جىنپىڭ غايەت زور سىياسىي جاسارىتى ۋە ئەقىل - پاراسىتى، قورقماس غەيرىتى ۋە شىجائىتى ئارقىلىق، ھەر قېتىمدا ئاچقۇچلۇق تاللاش چىقىرىپ، پۈتكۈل خەلقنى يېتەكلەپ، بىر - بىرلەپ جەڭ قىلىپ، ئۆتكەللەردىن بىر - بىرلەپ بۆسۈپ ئۆتۈپ، خىرىسقا ئۈنۈملۈك تاقابىل تۇرۇپ، ئالغا ئىلگىرىلەش يۆنىلىشىنى ئېنىق كۆرسىتىپ بەردى.
ئوتتۇرا ئېقىندا شىددەتلىك دولقۇن بىلەن ئېلىشىپ، يەلكەن چىقىرىپ جاسارەت بىلەن ئىلگىرىلىدى.
بۇ بەش يىلدا، دۆلىتىمىزنىڭ ئىقتىساد، جەمئىيەت تەرەققىياتى دۇچ كەلگەن قىيىنچىلىق ۋە مەسىلىلەر مۆلچەردىكىدىن كۆپ بولدى، قولغا كەلتۈرۈلگەن نەتىجە - ئۈنۈم مۆلچەردىكىدىن ياخشى بولدى، بىزنىڭ تۈزۈم ئەۋزەللىكىمىز تېخىمۇ مۇستەھكەملەندى، يېڭىلىق يارىتىش ھاياتىي كۈچىمىز تېخىمۇ كۈچەيدى، ماددىي ئاساسىمىز تېخىمۇ مول بولدى، تەرەققىيات ئاساسىمىز تېخىمۇ مۇستەھكەملەندى، مۇقەررەر ھالدا جۇڭگونىڭ تەرەققىيات تارىخىدا ئىنتايىن پەۋقۇلئاددە بىر سەھىپە پۈتۈپ چىقىمىز.
باتۇرلۇق بىلەن دەۋرنىڭ ئالدىدا تۇرۇش، قەتئىي ئىرادە، پۈتۈن ۋۇجۇدى بىلەن ئىش قىلىش
− «مەيلى خەلقئارا ۋەزىيەتتە قانداق ئۆزگىرىش بولۇشىدىن قەتئىينەزەر، بىز ئۆزىمىزنىڭ ئىشىنى قەتئىي تەۋرەنمەي ياخشى قىلىشىمىز كېرەك»
دۇنيا بويىچە ياسىمىچىلىق كەسپىدىكى 1 - چوڭ دۆلەتلىك ئورۇندا مۇقىم تۇرۇش، 200 خىلدىن ئارتۇق ئاساسلىق سانائەت مەھسۇلاتلىرىنى ئىشلەپچىقىرىش مىقدارى جەھەتتە دۇنيا بويىچە 1 - ئورۇندا تۇرۇش، دۇنيا بويىچە سانى ئەڭ كۆپ 5G ئاساسىي پونكىتى قۇرۇش، دۇنيا بويىچە كۆلىمى ئەڭ چوڭ تەتقىقات - ئېچىش خادىملىرى قوشۇنىغا ئىگە بولۇش...
«14 - بەش يىل» مەزگىلىدە، نۇرغۇن «بىرىنچى» «ئەڭ كۆپ» «ئەڭ زور»لار جۇڭگونىڭ ئىقتىساد، جەمئىيەت تەرەققىياتىنىڭ سان ئۆزگىرىشىدىن سۈپەت ئۆزگىرىشىگە ئۆتۈش، ئوتتۇرا، تۆۋەن دەرىجىدىن ئوتتۇرا، يۇقىرى دەرىجىگە ئۆتۈش، قوغلاپ يېتىشىۋالغۇچىدىن يېتەكلەپ يۈگۈرگۈچى بولۇشقا ئۆتۈشتەك غايەت زور ئۆزگىرىشىنى نامايان قىلدى.
تەرەققىيات دۆلىتىمىزدىكى بارلىق مەسىلىلەرنى ھەل قىلىشنىڭ ئاساسى ۋە ئاچقۇچى.
«يۇقىرى سۈپەتلىك تەرەققىيات <14 - بەش يىل>، ھەتتا تېخىمۇ ئۇزاق مەزگىلدىكى دۆلىتىمىز ئىقتىساد، جەمئىيەت تەرەققىياتىنىڭ باش تېمىسى، دۆلىتىمىزنىڭ سوتسىيالىستىك زامانىۋىلاشتۇرۇش قۇرۇلۇشى ئومۇملۇقىغا مۇناسىۋەتلىك» «يۇقىرى سۈپەتلىك تەرەققىيات سوتسىيالىستىك زامانىۋىلاشقان دۆلەتنى ئومۇميۈزلۈك قۇرۇشتىكى باش ۋەزىپە» «جەزمەن يۇقىرى سۈپەتلىك تەرەققىياتتا چىڭ تۇرۇشنى يېڭى دەۋردىكى چىڭ داۋلى قىلىش كېرەك»...
«باش تېما»دىن «باش ۋەزىپە»گىچە، يەنە «چىڭ داۋلى»غىچە، يۇقىرى سۈپەتلىك تەرەققىيات «14 - بەش يىل» مەزگىلىنىڭ پۈتكۈل جەريانىغا سىڭدۈرۈلدى.
باش شۇجى شى جىنپىڭ مۇنداق تەكىتلىدى: «مەيلى خەلقئارا ۋەزىيەتتە قانداق ئۆزگىرىش بولۇشىدىن قەتئىينەزەر، بىز ئۆزىمىزنىڭ ئىشىنى قەتئىي تەۋرەنمەي ياخشى قىلىپ، ئۈزلۈكسىز تۈردە ئىقتىسادىي ئاساسنى كۈچەيتىپ، پەن - تېخنىكىدا يېڭىلىق يارىتىش ئىقتىدارىنى ئاشۇرۇپ، ئۇنىۋېرسال دۆلەت كۈچىنى ئۆستۈرۈشىمىز كېرەك».
يېڭىلىق يارىتىشنىڭ دۆلىتىمىزنىڭ زامانىۋىلاشتۇرۇش قۇرۇلۇشى ئومۇملۇقىدىكى يادرولۇق ئورنىدا چىڭ تۇرۇپ، پەن - تېخنىكىدا ئۆزىگە تايىنىش، ئۆزىنى قۇدرەت تاپتۇرۇشنى دۆلەت تەرەققىياتىنىڭ ئىستراتېگىيەلىك تىرىكى قىلدى −
بۇ يىل 7 - ئاينىڭ 7 - كۈنى، باش شۇجى شى جىنپىڭ سەنشى ياڭچۈەن كىلاپان پاي چەكلىك شىركىتىگە كېلىپ تەكشۈرۈشتە بولدى، تەكشۈرۈپ تەتقىق قىلدى.
ئىشلەپچىقىرىش سېخىدا، باش شۇجى پات - پات قەدىمىنى توختىتىپ كۆزدىن كەچۈرۈپ، مەھسۇلات ئىشلەپچىقىرىش ۋە سېتىش ئەھۋالىنى تەپسىلىي ئىگىلىدى، ئۇ مۇنداق كۆرسەتتى: «ئەمەلىي ئىقتىسادنى يوقىتىپ قويۇشقا بولمايدۇ، ئەمەلىي ئىقتىسادتىكى ئەنئەنىۋى كەسىپلەرنى يوقىتىپ قويۇشقا بولمايدۇ، پەن - تېخنىكىدا يېڭىلىق يارىتىش ئارقىلىق تىپنى ئۆزگەرتىپ دەرىجىسىنى ئۆستۈرۈشنى ئىشقا ئاشۇرۇش كېرەك».
بەش يىلدا، تەجرىبىخانا، تەتقىقات ئورۇنلىرىدىن ياسىمىچىلىق كارخانىلىرى، سانائەت باغچە رايونلىرىغىچە، باش شۇجى شى جىنپىڭ پەن - تېخنىكىدا يېڭىلىق يارىتىش ئەڭ جانلانغان جايلارغا كۆپ قېتىم چوڭقۇر چۆكۈپ، شارائىتقا قاراپ ئىش كۆرۈپ يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇش توغرىسىدا مۇھىم يوليورۇق بەردى، پەن - تېخنىكا تۈزۈلمە ئىسلاھاتىنى چوڭقۇرلاشتۇرۇش توغرىسىدا يەنىمۇ ئىلگىرىلىگەن ھالدا ئورۇنلاشتۇرما قىلدى.
بەش يىلدا، جۇڭگو ئارقا - ئارقىدىن «چوڭ دۆلەت مۇھىم جابدۇقلىرى» يېڭىلىق يارىتىش ئېگىزلىكىدە تۇردى، ئۆز ئالدىغا تەتقىق قىلىپ ياسىغان يۇقىرى ئىقتىدارلىق ئۆزەك ۋە مەشغۇلات سىستېمىسىغا ئىگە بولدى، يېڭى ئېنېرگىيەلىك ئاپتوموبىلنى يىللىق ئىشلەپچىقىرىش مىقدارى 10 مىليوندىن ئاشتى، دۇنيا بويىچە دۆلەت ئىچىدىكى ئۈنۈملۈك كەشپىيات پاتېنتى سانى 4 مىليوندىن ئاشقان تۇنجى دۆلەتكە ئايلاندى...
ئىسلاھاتنى تېخىمۇ گەۋدىلىك ئورۇنغا قويۇپ، يەنىمۇ ئىلگىرىلىگەن ھالدا ئىسلاھاتنى ئومۇميۈزلۈك چوڭقۇرلاشتۇرۇش ئارقىلىق جۇڭگوچە زامانىۋىلاشتۇرۇشنى ئالغا سىلجىتتى −
2025 - يىلى 5 - ئاينىڭ 20 - كۈنى، پۇقراۋى ئىگىلىكنى ئىلگىرى سۈرۈش قانۇنى رەسمىي يولغا قويۇلدى.
پارتىيە 20 - نۆۋەتلىك مەركىزىي كومىتېتى 3 - ئومۇمىي يىغىنىدا پۇقراۋى ئىگىلىكنى ئىلگىرى سۈرۈش قانۇنىنى تۈزۈش ئېنىق ئوتتۇرىغا قويۇلۇشتىن پۇقراۋى ئىگىلىكنىڭ تەرەققىياتىغا مۇناسىۋەتلىك بۇ ئۇللۇق قانۇننىڭ ئېلان قىلىنىپ يولغا قويۇلۇشىغىچە پەقەت ئون ئايلا ۋاقىت كەتتى، مەملىكەت سىرتىدىكى تاراتقۇلار بۇنىڭغا «ئابىدىلىك ئەھمىيەتكە ئىگە» دەپ باھا بەردى.
تەرەققىيات تېما چىقاردى، ئىسلاھات جاۋاب قەغىزىنى پۈتتى. بەش يىلدا، يېڭى دەۋر ۋەزىيىتى ۋە تېمىسىغا يۈزلىنىپ، يولداش شى جىنپىڭ يادرولۇقىدىكى پارتىيە مەركىزىي كومىتېتى نۇقتىلىق ۋەزىپىلەرنى چىڭ كۆزلەپ، ئاچقۇچلۇق ھالقىلارنى تۇتۇپ، بىر تۈركۈم ئىستراتېگىيەلىك، ئىجادىي، يېتەكلەش خاراكتېرلىك ئىسلاھاتنى پىلانلىدى ۋە ئۇنىڭغا تۈرتكە بولدى.
يۇقىرى سەۋىيەلىك سوتسىيالىستىك بازار ئىگىلىكى تۈزۈلمىسىنى تېز بەرپا قىلىپ، «ئىككىدە قىلچە تەۋرەنمەسلىك»تە چىڭ تۇرۇپ ۋە ئۇنى ئەمەلىيلەشتۈرۈپ، دۆلەت مۈلكى، دۆلەت كارخانىلىرى ئىسلاھاتىنى چوڭقۇرلاشتۇرۇپ، ئومۇمىي مۈلۈكچىلىكتىن باشقا ئىگىلىكنىڭ تەرەققىياتى ئۈچۈن ياخشى مۇھىت يارىتىشقا كۈچ چىقاردى؛ مەملىكەت بويىچە بىرلىككە كەلگەن چوڭ بازار قۇرۇلۇشىنى چوڭقۇر ئالغا سىلجىتىپ، ئامىللارنى بازارلاشتۇرۇش ئىسلاھاتىنى چوڭقۇرلاشتۇرۇپ، مۈلۈك ھوقۇقىنى قوغداش، بازار ئىجازىتى، ئادىل رىقابەت، ئىجتىمائىي ئىناۋەت قاتارلىق بازار ئىگىلىكى ئاساسىي تۈزۈملىرىنى تەدرىجىي تاكامۇللاشتۇردى ۋە مۇكەممەللەشتۈردى...
2024 - يىلى 7 - ئاينىڭ 18 - كۈنى، پارتىيە ۋە دۆلەت يەنە بىر تارىخىي پەيتنى كۈتۈۋالدى: پارتىيە 20 - نۆۋەتلىك مەركىزىي كومىتېتى 3 - ئومۇمىي يىغىنىدا «جۇڭگو كوممۇنىستىك پارتىيەسى مەركىزىي كومىتېتىنىڭ يەنىمۇ ئىلگىرىلىگەن ھالدا ئىسلاھاتنى ئومۇميۈزلۈك چوڭقۇرلاشتۇرۇپ، جۇڭگوچە زامانىۋىلاشتۇرۇشنى ئىلگىرى سۈرۈش توغرىسىدىكى قارارى» قاراپ چىقىپ ماقۇللاندى، يېڭى دەۋر، يېڭى مۇساپىدە يەنىمۇ ئىلگىرىلىگەن ھالدا ئىسلاھاتنى ئومۇميۈزلۈك چوڭقۇرلاشتۇرۇشنىڭ ئاتاكىغا ئۆتۈش بۇرغىسى مۇقەددەس جۇڭگو زېمىنىدا ياڭرىدى.
ئىقتىسادىي تۈزۈلمە ئىسلاھاتىنى باشلامچى قىلىپ، پارتىيە 20 - نۆۋەتلىك مەركىزىي كومىتېتى 3 - ئومۇمىي يىغىنىدا ئورۇنلاشتۇرما قىلىنغان 300دىن ئارتۇق ئىسلاھات تەدبىرىنى تەدرىجىي يولغا قويۇپ، ئەمەلىيەتتىن ئۆتكۈزۈش، بىلىش، يەنە ئەمەلىيەتتىن ئۆتكۈزۈش، يەنە بىلىش داۋامىدا، يەنىمۇ ئىلگىرىلىگەن ھالدا ئىسلاھاتنى ئومۇميۈزلۈك چوڭقۇرلاشتۇرۇشتا كەڭلىك ۋە چوڭقۇرلۇققا قاراپ ئۈزلۈكسىز يۈرۈش قىلدى.
ئېچىۋېتىش ئارقىلىق ئىسلاھاتنى ئىلگىرى سۈرۈپ، تەرەققىياتنى ئىلگىرى سۈرۈپ، قەتئىي تەۋرەنمەي يۇقىرى سەۋىيەلىك سىرتقا ئېچىۋېتىشنى ئالغا سىلجىتتى −
يېقىندا، خەينەن ئەركىن سودا پورتىنىڭ پۈتۈن ئارالدا تاموژنىنى يېپىق ئورۇنلاشتۇرۇشى ھەم سىياسەت - تەدبىرلىرى دۆلەت ئىچى - سىرتىغا ئېلان قىلىندى: 2025 - يىلى 12 - ئاينىڭ 18 - كۈنى رەسمىي يولغا قويۇلىدۇ.
ئىسلاھات قانچە چوڭقۇرلاشقانسېرى، ئېچىۋېتىش سەۋىيەسىگە قويۇلىدىغان تەلەپ شۇنچە يۇقىرى بولىدۇ؛ ئېچىۋېتىش سەۋىيەسى قانچە يۇقىرى بولغانسېرى، ئىسلاھاتنى ئىلگىرى سۈرۈش رولى شۇنچە چوڭ بولىدۇ.
بەش يىلدا، باش شۇجى شى جىنپىڭ تۇنجى نۆۋەتلىك جۇڭگو − ئوتتۇرا ئاسىيا باشلىقلار يىغىنى، 3 - نۆۋەتلىك «بىر بەلباغ، بىر يول» خەلقئارا ھەمكارلىق باشلىقلار مۇنبىرى، جۇڭگو − ئافرىقا ھەمكارلىق مۇنبىرى بېيجىڭ باشلىقلار يىغىنى قاتارلىق ئاساسىي مەيدان دىپلوماتىيە پائالىيەتلىرىگە رىياسەتچىلىك قىلىپ ياكى قاتنىشىپ، دۇنياغا جۇڭگونىڭ قەتئىي تەۋرەنمەي يۇقىرى سەۋىيەلىك سىرتقا ئېچىۋېتىشنى ئالغا سىلجىتىش كۈچلۈك ساداسىنى يەتكۈزدى؛ جۇڭگو ئۇدا كۆپ يىل ئىمپورت كۆرگەزمىسى، گۇاڭجوۋ سودا يەرمەنكىسى، مۇلازىمەت سودا يەرمەنكىسى، ئىستېمال بۇيۇملىرى كۆرگەزمىسى ئۆتكۈزۈپ، «ئېچىۋېتىلگەن دەرۋازىنى بارغانسېرى كەڭ ئېچىۋېتىش» قەتئىي ۋەدىسىنى ئەمەلدە كۆرسەتتى.
«جۇڭگو بىلەن ھەمسەپەر بولغانلىق دەل پۇرسەت بىلەن ھەمسەپەر بولغانلىق، جۇڭگوغا ئىشەنگەنلىك دەل ئەتىگە ئىشەنگەنلىك، جۇڭگوغا مەبلەغ سالغانلىق دەل كەلگۈسىگە مەبلەغ سالغانلىق.» بۇ يىل 3 - ئايدا، باش شۇجى شى جىنپىڭنىڭ خەلقئارا سودا - سانائەت ساھەسىدىكى ۋەكىللەر بىلەن كۆرۈشكەن چاغدىكى سەمىمىي تەكلىپى جۇڭگونىڭ قەتئىي تەۋرەنمەي ئىسلاھاتنى چوڭقۇرلاشتۇرۇش، ئېچىۋېتىشنى كېڭەيتىش ئىرادىسىنى جاكارلاپ، جۇڭگو بىلەن دۇنيانىڭ ھەمكارلىشىپ ئورتاق پايدا ئېلىشى ئۈچۈن قۇدرەتلىك ئىشەنچ ۋە كۈچ بېغىشلىدى.
تەرەققىيات بىلەن بىخەتەرلىكنى بىرتۇتاش پىلانلاپ، يۇقىرى سۈپەتلىك تەرەققىيات بىلەن يۇقىرى سەۋىيەلىك بىخەتەرلىكنىڭ ياخشى ھەمتۈرتكە بولۇشىنى ئىشقا ئاشۇردى −
بوران - چاپقۇن، ھەتتا دەھشەتلىك بوران - چاپقۇن ئالدىدا، باش شۇجى شى جىنپىڭ چوڭقۇر كۈلپەت ئېڭى ۋە چوڭقۇر ئىستراتېگىيەلىك نەزەر بىلەن، ۋەزىيەتكە قاراپ پىلان تۈزۈش، ۋەزىيەتكە قاراپ ھەرىكەتكە كېلىش، ۋەزىيەتكە قاراپ ئىش كۆرۈش داۋامىدا تۆۋەن چەك تەپەككۇرىنى تۇرغۇزۇپ، كۈرەش داۋامىدا دۆلەتنىڭ ئىززەت - ھۆرمىتى ۋە يادرولۇق مەنپەئىتىنى قوغداپ، دۆلىتىمىزنىڭ تەرەققىيات بىلەن بىخەتەرلىك تەشەببۇسكارلىق ھوقۇقىنى مەھكەم ئىگىلىدى.
ئاشلىق بىخەتەرلىكى دۆلەتنى ئىدارە قىلىشتىكى بىرىنچى دەرىجىلىك چوڭ ئىش.
2022 - يىلى 4 - ئايدا، باش شۇجى شى جىنپىڭ خەينەندە تەكشۈرۈشتە بولغاندا، تۇنجى بېكەتتە سەنيا شەھىرىنىڭ ياجوۋۋەن ئۇرۇقچىلىق تەجرىبىخانىسىغا كېلىپ، «جۇڭگولۇقلارنىڭ تاماق قاچىسىنى ئۆز قولىمىزدا مەھكەم تۇتۇش ئۈچۈن، جەزمەن ئۇرۇقلۇقنى ئۆز قولىمىزدا چىڭ تۇتۇشىمىز كېرەك» دەپ كۆرسەتتى.ئېنېرگىيە بىخەتەرلىكىنى دۆلەتنىڭ ئىقتىساد، جەمئىيەت تەرەققىياتىغا مۇناسىۋەتلىك ئومۇملۇق خاراكتېرلىك، ئىستراتېگىيە خاراكتېرلىك مەسىلە قىلىپ، «مەۋقەنى دۆلىتىمىزنىڭ ئېنېرگىيە بايلىقى ئۈستۈنلۈكىگە قويۇپ، ئاۋۋال ئورنىتىپ ئاندىن بىكار قىلىش، ئومۇميۈزلۈك پىلانلاشتا چىڭ تۇرۇش كېرەك، ئەنئەنىۋى ئېنېرگىيەنى تەدرىجىي چېكىندۈرۈشنى جەزمەن يېڭى ئېنېرگىيەنىڭ بىخەتەر، ئىشەنچلىك سەپلىمىسى ئاساسىدا تەسىس قىلىش كېرەك» دەپ تەكىتلىدى؛
پەن - تېخنىكىدا ئۆزىگە تايىنىش، ئۆزىنى قۇدرەت تاپتۇرۇشتا چىڭ تۇرۇپ، «پەن - تېخنىكا جان تومۇرىنى ئۆز قولىمىزدا مەھكەم ئىگىلەپ، پەن - تېخنىكىدا ئۆزىگە تايىنىش، ئۆزىنى قۇدرەت تاپتۇرۇش جەھەتتە تېخىمۇ زور ئىلگىرىلەشلەرنى قولغا كەلتۈرۈپ، دۆلىتىمىز تەرەققىياتىنىڭ مۇستەقىل بولۇشى، ئۆزىگە ئۆزى ئىگە بولۇشى، بىخەتەر بولۇشىنى ئۈزلۈكسىز ئۆستۈرۈش كېرەك» دەپ تەلەپ قىلدى؛
يېڭى دەۋردىكى ئارمىيەنى ئىختىساسلىقلار ئارقىلىق قۇدرەت تاپتۇرۇش ئىستراتېگىيەسى، ئارمىيەنى پەن - تېخنىكا ئارقىلىق قۇدرەت تاپتۇرۇش ئىستراتېگىيەسىنى چوڭقۇر يولغا قويۇپ، ئۇرۇش قىلالايدىغان، غەلىبىلىك ئۇرۇش قىلالايدىغان بولۇشتىن ئىبارەت ئارمىيەنى قۇدرەت تاپتۇرۇشنىڭ مۇھىم نۇقتىسىنى مەھكەم ئىگىلەپ، دۆلەت مۇداپىئەسى ۋە ئارمىيە ئىسلاھاتىنى سىجىل چوڭقۇرلاشتۇردى؛
...
بەش يىلدا، دۆلىتىمىزنىڭ ئاشلىق، ئېنېرگىيە، كەسىپ، دۆلەت مۇداپىئەسى قاتارلىق جەھەتلەردىكى بىخەتەرلىك ئاساسى يەنىمۇ مۇستەھكەملەندى، نۆۋەتتە جەمئىي 1 مىليارد مودىن ئارتۇق كۆلەمدە يۇقىرى ئۆلچەملىك ئېتىز بەرپا قىلىندى؛ دۇنيا بويىچە كۆلىمى ئەڭ چوڭ ئېلېكتىر ئېنېرگىيە ئۇل ئەسلىھە سىستېمىسى بەرپا قىلىنىپ، توك چىقىرىدىغان گېنېراتورلار سىغىمچانلىقى دۇنيادىكىنىڭ ئۈچتىن بىر قىسمىنى ئىگىلىدى؛ دۇنيا بويىچە كۆلىمى ئەڭ چوڭ، تۈرلىرى ئەڭ تولۇق، سىستېمىسى ئەڭ مۇكەممەل بولغان ياسىمىچىلىق سىستېمىسىغا ئىگە بولدى، تۈرلۈك خەۋپ - خەتەر ۋە خىرىسلارغا تاقابىل تۇرۇش غەيرىتى تېخىمۇ ئاشتى.
خەلقنى ھەممىدىن ئەلا بىلىش، خەلققە بەخت يارىتىش
− «پارتىيە ۋە ھۆكۈمەتنىڭ بارلىق خىزمىتى پۇقرالارنى تېخىمۇ بەختلىك تۇرمۇشقا ئېرىشتۈرۈشنى مەقسەت قىلىدۇ»
قويۇق ئىجادىيلىققا تولغان كوچا مەنزىرىسى بىلەن يۇرت سېغىنىشى كۈچلۈك بولغان كونا ئۇسلۇبتىكى ئىمارەتلەر ئەپچىللىك بىلەن يۇغۇرۇلۇپ، نەپىس ئەدەبىيات - سەنئەت تۈسىنى ئالغان ئۆزگىچە دۇكانلار بىلەن تولۇق يۈرۈشلەشكەن مۇلازىمەت ئەسلىھەلىرى بىر - بىرىنى گەۋدىلەندۈرۈپ تۇراتتى... چۇڭچىڭ شەھىرى جيۇلۇڭپو رايونىنىڭ شيېجياۋەن كوچا باشقارمىسى مىنجۇسۈن مەھەللىسى قاينام - تاشقىنلىق كەيپىيات ۋە بەخت تۇيغۇسىغا چۆمگەنىدى.
بۇ جاي ئىلگىرى يىراق - يېقىندا نامى تارالغان «كونا، ۋەيرانە، كىچىك» مەھەللە ئىدى، شەھەرنى يېڭىلاش ئارقىلىق، كېپىنەكسىمان ئۆزگىرىپ، ئەنئەنىۋىلىك بىلەن زامانىۋىلىق يۇغۇرۇلغان يېڭى ماكانغا ئايلاندى.
2024 - يىلى 4 - ئايدا، باش شۇجى شى جىنپىڭ چۇڭچىڭدا تەكشۈرۈشتە بولغاندا مىنجۇسۈن مەھەللىسىگە كەلدى، ئۇ چوڭقۇر مەنىلىك قىلىپ مۇنداق دېدى: «جۇڭگوچە زامانىۋىلاشتۇرۇشتا خەلق تۇرمۇشى ھەممىدىن مۇھىم. پارتىيە ۋە ھۆكۈمەتنىڭ بارلىق خىزمىتى پۇقرالارنى تېخىمۇ بەختلىك تۇرمۇشقا ئېرىشتۈرۈشنى مەقسەت قىلىدۇ».
خەلق باش شۇجى شى جىنپىڭنىڭ قەلبىدە ئىنتايىن مۇھىم ئورۇندا تۇرىدۇ.
بەش يىل جەريانىدا، يولداش شى جىنپىڭ يادرولۇقىدىكى پارتىيە مەركىزىي كومىتېتى ئەڭ كەڭ خەلقنىڭ تۈپ مەنپەئىتىنى ياخشى ئىشقا ئاشۇرۇش، ياخشى قوغداش، ياخشى تەرەققىي قىلدۇرۇشنى تەرەققىياتنىڭ مەۋقەسى ۋە مەقسىتى قىلىشتا چىڭ تۇرۇپ، خەلق ئاممىسىنىڭ ئېرىشىش تۇيغۇسى، بەخت تۇيغۇسى، بىخەتەرلىك تۇيغۇسىنى ئۈزلۈكسىز كۈچەيتىپ، ئادەمنىڭ ئەتراپلىق يېتىلىشى ۋە جەمئىيەتنىڭ ئومۇميۈزلۈك تەرەققىياتىنى ئىلگىرى سۈردى.
شەھەر زامانىۋىلاشتۇرۇشتىكى مۇھىم ۋاسىتە بولۇپ، خەلقنىڭ گۈزەل تۇرمۇشقا بولغان ئىنتىلىشىنى زىممىگە ئالغان.
2025 - يىلى 7 - ئايدا، مەركەز شەھەر خىزمىتى يىغىنى ئۆتكۈزۈلدى، باش شۇجى شى جىنپىڭ يىغىنغا قاتناشتى ھەم مۇھىم سۆز قىلدى. بۇ قېتىمقى يىغىندا «زامانىۋىلاشقان خەلقنىڭ شەھىرى»نى قۇرۇشنىڭ ھازىرقى ۋە بۇنىڭدىن كېيىنكى بىر مەزگىلدىكى شەھەر خىزمىتى نىشانى ئىكەنلىكى ئايدىڭلاشتۇرۇلدى.
«14 - بەش يىل» مەزگىلىدە، يولداش شى جىنپىڭ يادرولۇقىدىكى پارتىيە مەركىزىي كومىتېتى خەلقنى مەركەز قىلغان تەرەققىيات ئىدىيەسىدە چىڭ تۇرۇپ، پۇقرالارنىڭ ئەتراپىدىكى ئىشلارنى چىڭ كۆزلەپ، ھەربىر ئىشنى ئەمەلىي ئىشلىدى، ئىنچىكە ئىشلىدى، ياخشى ئىشلىدى.
ئىشقا ئورۇنلىشىش ئەڭ ئاساسىي خەلق تۇرمۇشى.
2024 - يىلى 5 - ئاينىڭ 27 - كۈنى، جۇڭگو كوممۇنىستىك پارتىيەسى مەركىزىي كومىتېتى سىياسىي بىيۇروسى يۇقىرى سۈپەتلىك تولۇق ئىشقا ئورۇنلاشتۇرۇشنى ئىلگىرى سۈرۈش توغرىسىدا 14 - قېتىملىق كوللېكتىپ ئۆگىنىش قىلدى. باش شۇجى شى جىنپىڭ مۇنداق تەكىتلىدى: ھەر دەرىجىلىك پارتىيە كومىتېتى ۋە ھۆكۈمەت ئىشقا ئورۇنلاشتۇرۇشنى خەلق تۇرمۇشىدىكى بىرىنچى دەرىجىلىك چوڭ ئىش سۈپىتىدە تۇتۇپ، تەشكىلىي رەھبەرلىكنى كۈچەيتىپ، تۈزۈم - مېخانىزمنى تاكامۇللاشتۇرۇپ، خىزمەت بىرىكمە كۈچىنى ئاشۇرۇشى كېرەك.
شۇ يىلى 9 - ئايدا، «جۇڭگو كوممۇنىستىك پارتىيەسى مەركىزىي كومىتېتى، گوۋۇيۈەننىڭ ئىشقا ئورۇنلاشتۇرۇشنى ئالدىنقى ئورۇنغا قويۇش ئىستراتېگىيەسىنى يولغا قويۇپ، يۇقىرى سۈپەتلىك تولۇق ئىشقا ئورۇنلاشتۇرۇشنى ئىلگىرى سۈرۈش توغرىسىدىكى پىكرى» ئېلان قىلىنىپ، يۇقىرى سۈپەتلىك تولۇق ئىشقا ئورۇنلاشتۇرۇشنى ئىلگىرى سۈرۈش مەركەز قاتلىمىدا يۇقىرى قاتلامدىن لايىھەلەندى.
«14 - بەش يىل»دىن بۇيان، ھەر يىلى شەھەر - بازارلاردا يېڭىدىن كۆپەيگەن ئىشقا ئورۇنلاشقانلار مۇقىم 12 مىليون كىشىدىن ئاشتى. ئاھالىلەر كىرىمىنىڭ ئېشىشى بىلەن ئىقتىسادنىڭ ئېشىشى ئاساسەن ماس قەدەمدە بولۇپ، شەھەر بىلەن يېزىلارنىڭ كىرىمىدىكى نىسپىي پەرق يەنىمۇ كىچىكلىدى.
ياشانغانلار كۈتۈنەلەيدىغان بولۇش، بالىلار يەسلىگە كىرەلەيدىغان بولۇش، ئاغرىقلار داۋالىنالايدىغان بولۇش يۈز مىليونلىغان ئائىلىگە تەسىر كۆرسىتىدىغان خەلق تۇرمۇشىدىكى كۆڭۈل بۆلىدىغان مەسىلە.
2023 - يىلى باھار بايرىمى ھارپىسىدا، باش شۇجى شى جىنپىڭ سىنلىق ئۇلىنىش ئارقىلىق ئاساسىي قاتلامدىكى كادىرلار، ئاممىنى يوقلىغاندا ۋە ئۇلاردىن ھال سورىغاندا مۇنداق تەكىتلىدى: ياشانغانلار كۈتۈنۈش ئىشلىرى ۋە ياشانغانلار كۈتۈنۈش كەسپىنى زور كۈچ بىلەن راۋاجلاندۇرۇش كېرەك، «بولۇپمۇ ئالاھىدە قىيىنچىلىقى بار، تۆۋەن تۇرمۇش كاپالىتى ئالىدىغان، چوڭ ياشلىق، ئىقتىدارىدىن قالغان ياشانغانلارنى تولۇق كاپالەتلەندۈرۈشنى كۈچەيتىش كېرەك».
«14 - بەش يىل»دىن بۇيان، ئىقتىسادىي تەرەققىيات، پەن - تېخنىكا تەرەققىيات نەتىجىلىرى ھەقىقىي تۈردە ئاممىنىڭ ئېرىشىش تۇيغۇسى ۋە بەخت تۇيغۇسىغا ئايلاندۇرۇلدى. دۆلىتىمىز دۇنيا بويىچە كۆلىمى ئەڭ چوڭ بولغان مائارىپ سىستېمىسى، ئىجتىمائىي كاپالەت سىستېمىسى، داۋالاش - ساقلىق ساقلاش سىستېمىسى بەرپا قىلدى، مەجبۇرىيەت مائارىپىنىڭ مۇستەھكەملىنىش نىسبىتى ۋە ئاساسىي ياشانغاندا كۈتۈنۈش سۇغۇرتىسى، ئاساسىي داۋالىنىش سۇغۇرتىسى بويىچە سۇغۇرتىغا قاتنىشىش نىسبىتى ％95تىن يۇقىرى بولدى.
يېزا - كەنتلەرنى ئومۇميۈزلۈك گۈللەندۈرۈش جۇڭگوچە زامانىۋىلاشتۇرۇش قۇرۇلۇشى ئومۇملۇقىغا مۇناسىۋەتلىك. بەخت يولىدا بىرىمۇ كەم بولسا بولمايدۇ.
يۈلۇڭ قارلىق تېغى ئېتىكىدىكى يۈننەن لىجياڭ زامانىۋى گۈل - گىياھ كەسىپ باغچىسىدا رەڭگارەڭ گۈللەر بەس - بەستە پورەكلەپ ئېچىلغانىدى.
2025 - يىلى 3 - ئايدا، باش شۇجى شى جىنپىڭ يۈننەن لىجياڭ زامانىۋى گۈل - گىياھ كەسىپ باغچىسىغا كېلىپ تەكشۈرۈشتە بولدى. سورت، باھادىن تارتىپ ئىشلەمچىلىك كىرىمىگىچە... باش شۇجى تەپسىلىي كۆردى، كونكرېت سورىدى.«سىلەر بۇ كەسىپنى ناھايىتى گۈللەندۈرۈپسىلەر، زامانىۋى يېزا ئىگىلىكىنىڭ تەرەققىيات يۆنىلىشىگە ئۇيغۇن بوپتۇ. تۇرمۇشىڭلارنىڭ خۇددى گۈلگە ئوخشاش گۈزەل بولۇشىغا تىلەكداشمەن!» باش شۇجى شى جىنپىڭنىڭ سۆزى كۆپچىلىككە تېخىمۇ كۈچلۈك ئىشەنچ ۋە غەيرەت بېغىشلىدى.
تاغ - دەريالارنى كېزىپ، كەنتلەرگە، ئائىلىلەرگە كىردى، بەش يىلدىن بۇيان، باش شۇجى شى جىنپىڭ نامراتلىقتىن قۇتۇلدۇرۇش ئۆتكىلىگە ھۇجۇم قىلىش نەتىجىلىرىنى مۇستەھكەملەش، كېڭەيتىشنى يېزا - كەنتلەرنى گۈللەندۈرۈش بىلەن ئۈنۈملۈك جىپسىلاشتۇرۇشنى ئىستراتېگىيەلىك يۈكسەكلىكتە تۇرۇپ بىرتۇتاش پىلانلاپ، ئىلمىي ئالغا سىلجىتتى، يېزا ئىگىلىكىنى تېخىمۇ كۈچەيتىش، يېزىلارنى تېخىمۇ گۈزەللەشتۈرۈش، دېھقانلارنى تېخىمۇ بېيىتىشنى قانداق ئىشقا ئاشۇرۇشنى چۆرىدەپ چوڭقۇر تەكشۈرۈپ تەتقىق قىلدى.
بەش يىلدىن بۇيان، دۆلىتىمىزنىڭ يىللىق ئاشلىق ھوسۇلى ئۇدا مۇقىم ھالدا 1 تىرىليون 300 مىليارد جىڭدىن ئاشتى، 2024 - يىلى تۇنجى قېتىم 1 تىرىليون 400 مىليارد جىڭلىق يېڭى سەۋىيەگە يەتتى.
نامراتلىقتىن قۇتۇلدۇرۇش ئۆتكىلىگە ھۇجۇم قىلىش نەتىجىلىرى سىجىل مۇستەھكەملەندى ۋە كېڭەيتىلدى. نامراتلىقتىن قۇتۇلغان نوپۇسنىڭ ئىشلەمچىلىك بىلەن ئىشقا ئورۇنلىشىش كۆلىمى ئۇدا تۆت يىل مۇقىم ھالدا 30 مىليون ئادەمدىن يۇقىرى بولدى، نامراتلىقتىن قۇتۇلغان ناھىيەلەردە يېزا ئاھالىسىنىڭ ئىلكىدىكى ئوتتۇرىچە كىرىمنىڭ ئېشىش سۈرئىتى ئۇدا تۆت يىل مەملىكەت بويىچە يېزا ئاھالىسى كىرىمىنىڭ ئېشىش سۈرئىتىدىن تېز بولدى.
شىزاڭ دىڭرى ناھىيەسىدە، ئاپەتتىن كېيىنكى قايتا قۇرۇش خىزمىتى تېز ئالغا سىلجىتىلماقتا، يېڭى تۇرالغۇلار تەدرىجىي پۈتۈشكە باشلىدى، بالىلار خۇشال ھالدا يۈگۈرۈشۈپ ئويناۋاتاتتى. بۇ جاينىڭ يېرىم يىل ئىلگىرىلا بىر مەيدان قاتتىق يەر تەۋرەش ئاپىتىگە ئۇچرىغانلىقىنى تەسەۋۋۇر قىلىش ناھايىتى تەس ئىدى.
2025 - يىلى 1 - ئاينىڭ 7 - كۈنى، دېڭىز يۈزىدىن ئېگىزلىكى 4000 مېتىردىن ئاشىدىغان دىڭرى ناھىيەسىدە 6.8 بال يەر تەۋرىدى. باش شۇجى شى جىنپىڭ مۇھىم يوليورۇق بېرىپ مۇنداق تەكىتلىدى: ئادەم ئىزدەش، قۇتقۇزۇشنى پۈتۈن كۈچ بىلەن قانات يايدۇرۇپ، يارىلانغانلارنى پۈتۈن كۈچ بىلەن قۇتقۇزۇپ - داۋالاپ، ئادەم ئۆلۈش - يارىلىنىشنى ئەڭ زور دەرىجىدە ئازايتىش كېرەك.
خەلقنى ھەممىدىن ئەلا بىلدى، ھاياتلىقنى ھەممىدىن ئەلا بىلدى. بەش يىلدىن بۇيان، يولداش شى جىنپىڭ يادرولۇقىدىكى پارتىيە مەركىزىي كومىتېتى باشتىن - ئاخىر خەلقنى مەركەز قىلىشنى دۆلەتنى ئىدارە قىلىشنىڭ پۈتكۈل جەريانىغا سىڭدۈرۈپ، كەلكۈن بىلەن ئېلىشىپ، قۇرغاقچىلىققا تاقابىل تۇرۇپ، يۇقۇمغا قارشى جەڭ قىلىپ، خەلق تۇرمۇشى تۆۋەن چېكىنى چىڭ ساقلاپ، مۇستەھكەملەپ، تەرەققىيات داۋامىدا خەلق تۇرمۇشىنى كاپالەتلەندۈرۈش ۋە ياخشىلاشتا چىڭ تۇردى.
شەھەرلەردىن يېزا - كەنتلەرگىچە، شەھەر - يېزىلارنى يۇغۇرما تەرەققىي قىلدۇرۇش جۇڭگوچە زامانىۋىلاشتۇرۇشنىڭ مۇقەررەر تەلىپى، خەلقنىڭ گۈزەل تۇرمۇشقا بولغان ئىنتىلىشىنى قاندۇرۇش، ئورتاق بېيىشنى ئىلگىرى سۈرۈشنىڭ ئىچكى تەلىپى.
«شەھەردە بىر ئائىلىسى بولۇش» شەھەرگە كىرىپ ئىشلەۋاتقان كۆپلىگەن قۇرغۇچىلارنىڭ ئارزۇسى.
ئامانلىق ساقلاش خىزمىتى بىلەن شۇغۇللىنىدىغان جاڭ سۇڭۋېي بىر كۈنلۈك ئالدىراش خىزمىتىنى ئاخىرلاشتۇرۇپ، ئۆزىنىڭ كىچىك ئائىلىسى − شاڭخەي شەھىرى مىنخاڭ رايونىغا جايلاشقان يېڭى دەۋر شەھەر قۇرغۇچىلىرى، باشقۇرغۇچىلىرى ئائىلىسىگە قايتىپ كەلدى. ئۇ تۇرۇۋاتقان تۆت كىشىلىك ياتاقنىڭ مۇھىتى رەتلىك، پاكىز بولۇپ، ئاشخانا، مۇنچا، ئائىلە ئېلېكتىر سايمانلىرى تولۇق ئىدى.
2023 - يىلى 11 - ئايدا، باش شۇجى شى جىنپىڭ شاڭخەيدە تەكشۈرۈشتە بولغان مەزگىلدە، سىرتتىن كەلگەن نوپۇس بىرقەدەر كۆپ نىسبەتنى ئىگىلەيدىغان مىنخاڭ رايونىغا ئالايىتەن بېرىپ، يېڭى دەۋر شەھەر قۇرغۇچىلىرى، باشقۇرغۇچىلىرى ئائىلىسىگە كىرىپ تەكشۈرۈپ تەتقىق قىلدى. ئايرىلىدىغان چاغدا، چۆرىدىشىپ كەلگەن مەھەللە ئاھالىلىرىگە قاراپ، باش شۇجى شى جىنپىڭ مۇنداق تەكىتلىدى: «شەھەر يۈكسەكلىككە ئىگە بولۇپلا قالماي، تېخىمۇ مۇھىمى ئىللىقلىققا تولغان بولۇشى كېرەك. بىزنىڭ سوتسىيالىزمىمىز ئورتاق بېيىش يولىدا مېڭىشى كېرەك».
شەھەر - يېزىلارنىڭ يۇغۇرما تەرەققىياتىنى كۆزلىدى، باش شۇجى شى جىنپىڭ تەكشۈرۈشتە بولۇش جەريانىدا كۆپ قېتىم ئاساسىي قاتلامغا چوڭقۇر چۆكۈپ تەكشۈرۈپ تەتقىق قىلدى، كۆپ قېتىم مۇھىم يوليورۇق بەردى.
پارتىيە 20 - نۆۋەتلىك مەركىزىي كومىتېتى 3 - ئومۇمىي يىغىنىنىڭ «قارار»ىدا شەھەر - يېزىلارنىڭ يۇغۇرما تەرەققىيات تۈزۈلمە - مېخانىزمىنى مۇكەممەللەشتۈرۈش توغرىسىدا ئورۇنلاشتۇرما قىلىندى، يېڭىچە شەھەر - بازارلاشتۇرۇش ئىستراتېگىيەسى بەش يىللىق ھەرىكەت پىلانى جايىدا ئەمەلىيلەشتۈرۈلۈپ ۋە يولغا قويۇلۇپ، ناھىيە رايونى ئىقتىسادى زورايتىلىپ، ئاساسىي ئاممىۋى مۇلازىمەت سىستېمىسى تاكامۇللاشتۇرۇلۇپ، نامراتلىقتىن قۇتۇلدۇرۇش ئۆتكىلىگە ھۇجۇم قىلىش نەتىجىلىرى مۇستەھكەملىنىپ، كېڭەيتىلىپ، كۆلەملىك قايتا نامراتلىشىپ كېتىشنىڭ قەتئىي ئالدى ئېلىندى.
بەش يىلدىن بۇيان، دۆلىتىمىز يېڭىچە شەھەر - بازارلاشتۇرۇشنى ئالغا سىلجىتىش تۈزۈلمە - مېخانىزمىنى ئۈزلۈكسىز تاكامۇللاشتۇردى: يېزا ئىگىلىك يۆتكەلمە نوپۇسىنىڭ شەھەر ئاھالىسىگە ئايلىنىشىنى تەرتىپلىك ئالغا سىلجىتىپ، نوپۇس تۈزۈمى ئىسلاھاتىنى چوڭقۇرلاشتۇردى؛ 2024 - يىلىنىڭ ئاخىرىدا دائىم تۇرۇشلۇق نوپۇسنىڭ شەھەر - بازارلىشىش نىسبىتى ％67كە يەتتى، مەجبۇرىيەت مائارىپى باسقۇچىدا شەھەرگە كىرىپ ئىشلەۋاتقانلارنىڭ بىللە كەلگەن پەرزەنتلىرىنىڭ ھۆكۈمەت باشقۇرۇشىدىكى مەكتەپلەردە ئوقۇش ياكى ھۆكۈمەت سېتىۋالغان ئوقۇغۇچى ئورنىدىن بەھرىمەن بولۇش نىسبىتى ％97كە يەتتى.«دۆلەتنى ئىدارە قىلىش يولى خەلقنى بېيىتىشتىن باشلىنىدۇ.» ئورتاق بېيىش سوتسىيالىزمنىڭ ماھىيەتلىك تەلىپى، خەلق ئاممىسىنىڭ ئورتاق ئارزۇسى.
«14 - بەش يىل»لىق يىرىك پىلان توغرىسىدىكى تەكلىپتە «پۈتكۈل خەلقنىڭ ئورتاق بېيىشىدا تېخىمۇ روشەن بولغان ماھىيەتلىك ئىلگىرىلەشنى قولغا كەلتۈرۈش» ئوتتۇرىغا قويۇلۇپ، «ئورتاق بېيىشقا پۇختا تۈرتكە بولۇش» گەۋدىلىك تەكىتلىنىپ، بىر قاتار مۇھىم تەلەپلەر ۋە مۇھىم تەدبىرلەر ئوتتۇرىغا قويۇلدى.ئورتاق بېيىشقا پۇختا تۈرتكە بولۇش «14 - بەش يىل» مەزگىلىدىكى پارتىيە ۋە دۆلەت خىزمىتىنىڭ مۇھىم نۇقتىسى بولۇپلا قالماي، يەنە پارتىيەمىزنىڭ دۆلەتنى ئىدارە قىلىشتىكى مەۋقەسى ۋە مەقسىتى.
باش شۇجى شى جىنپىڭ مۇنداق تەكىتلىدى: «پۈتكۈل خەلقنىڭ ئورتاق بېيىشىنى ئىلگىرى سۈرۈش بىر تۈرلۈك ئۇزاق مەزگىللىك ۋەزىپە، شۇنداقلا بىر تۈرلۈك رېئال ۋەزىپە، جەزمەن ئۇنى تېخىمۇ مۇھىم ئورۇنغا قويۇپ، پۇختا، ئەستايىدىل بولۇپ، بوشاشماي كۈرەش قىلىپ، بۇ نىشانغا قاراپ تېخىمۇ پائال نەتىجە يارىتىش ئۈچۈن تىرىشىش كېرەك».
تەنتەنىلىك ۋەدە بەردى، ئىرادىدىن قايتمىدى. خەلقنى مەركەز قىلىشتا باشتىن - ئاخىر چىڭ تۇرۇپ، ھەممىدە خەلقنى كۆزلەپ، ھەممىدە خەلققە تاياندى، 1 مىليارد 400 مىليوندىن ئارتۇق جۇڭگو خەلقى ئورتاق كۈرەش قىلىش داۋامىدا ئىسلاھات، تەرەققىيات نەتىجىلىرىدىن ئورتاق بەھرىلەندى.قەلبىگە ئۇلۇغۋار ئىرادىنى پۈككەندىلا، قاتمۇقات قىيىنچىلىقلارنى يېڭىپ نىشانغا يەتكىلى بولىدۇ.
بۇ يىل 10 - ئايدا، پارتىيە 20 - نۆۋەتلىك مەركىزىي كومىتېتى 4 - ئومۇمىي يىغىنى بېيجىڭدا ئېچىلىپ، خەلق ئىگىلىكى ۋە ئىجتىمائىي تەرەققىياتنىڭ 15 - بەش يىللىق يىرىك پىلانىنى تۈزۈش توغرىسىدىكى تەكلىپ مۇھاكىمە قىلىنىدۇ.
قۇدرەتلىك دۆلەت قۇرۇش، مىللەتنى گۈللەندۈرۈش ئۇلۇغ ئىشلىرىنى چىڭ كۆزلەپ، سوتسىيالىستىك زامانىۋىلاشتۇرۇش نىشانىنى ئاساسىي جەھەتتىن ئىشقا ئاشۇرۇشنى زىچ چۆرىدەپ، يولداش شى جىنپىڭ يادرولۇقىدىكى پارتىيە مەركىزىي كومىتېتىنىڭ كۈچلۈك رەھبەرلىكىدە، بىز مۇقەررەر «14 - بەش يىل»لىق يىرىك پىلاندىكى نىشان - ۋەزىپىلەرنى مۇۋەپپەقىيەتلىك تاماملاپ، «15 - بەش يىل» مەزگىلىدىكى ئىقتىساد، جەمئىيەت تەرەققىياتىنى ئىلمىي پىلانلاپ، يۇقىرى سۈپەتلىك تەرەققىياتنىڭ يېڭى پەللىگە كۆتۈرۈلۈشىگە تۈرتكە بولۇپ، جۇڭگوچە زامانىۋىلاشتۇرۇشنىڭ يېڭى سەھىپىسىنى ئۈزلۈكسىز پۈتۈپ چىقىمىز.
(مۇخبىرلار جاۋ چاۋ، ئەن بېي، چى جۇڭشى، ۋېي يۈكۇن)
(شىنخۇا ئاگېنتلىقى، بېيجىڭ، 8 - ئاينىڭ 5 - كۈنى تېلېگراممىسى)