ساۋما قىلىپ تولۇق مەزمۇنىنى كۆرۈڭ
شىنخۇا ئاگېنتلىقى، بېيجىڭ، 7 - ئاينىڭ 28 - كۈنىدىكى تېلېگراممىسىغا ئاساسلانغان يېقىندا، جۇڭگو كوممۇنىستىك پارتىيەسى مەركىزىي كومىتېتى بەنگۇڭتىڭى، گوۋۇيۈەن بەنگۇڭتىڭى «بالا بېقىش ياردەم پۇلى تۈزۈمىنى يولغا قويۇش لايىھەسى» (تۆۋەندە قىسقارتىلىپ «لايىھە» دېيىلدى)نى بېسىپ تارقاتتى ھەم ئۇقتۇرۇش چىقىرىپ، ھەرقايسى جايلار، ھەرقايسى تارماقلاردىن ئەمەلىيەتكە بىرلەشتۈرۈپ ئەستايىدىل ئىزچىللاشتۇرۇش، ئەمەلىيلەشتۈرۈشنى تەلەپ قىلدى.
«لايىھە»دە مۇنداق ئوتتۇرىغا قويۇلدى: 2025 - يىلى 1 - ئاينىڭ 1 - كۈنىدىن باشلاپ، قانۇن - نىزاملاردىكى بەلگىلىمىلەرگە ئۇيغۇن تۇغۇلغان ئۈچ ياشتىن تۆۋەن بوۋاقلار، بالىلارغا ئۈچ ياشقا توشقىچە ياردەم پۇلى تارقىتىلىپ بېرىلىدۇ.
بالا بېقىش ياردەم پۇلى يىل بويىچە تارقىتىلىدۇ، ھازىرقى باسقۇچتا دۆلەتنىڭ ئاساسىي ئۆلچىمى ھەربىر بالىغا يىلىغا 3600 يۈەن بولىدۇ. بۇنىڭ ئىچىدە، 2025 - يىلى 1 - ئاينىڭ 1 - كۈنىدىن بۇرۇن تۇغۇلغان، ئۈچ ياشقا توشمىغان بوۋاقلار، بالىلارغا ياردەم پۇلى بېرىشكە تېگىشلىك ئاي سانى بويىچە سۇندۇرۇپ ھېسابلاپ ياردەم پۇلى بېرىلىدۇ. بالا بېقىش ياردەم پۇلى تۈزۈمىدىكى بەلگىلىمە بويىچە تارقىتىلغان بالا بېقىش ياردەم پۇلىدىن شەخسىي تاپاۋەت بېجى كەچۈرۈم قىلىنىدۇ. ئەڭ تۆۋەن تۇرمۇش كاپالىتى ئوبيېكتى، ئالاھىدە قىيىنچىلىقى بارلار قاتارلىق قۇتقۇزۇش - ياردەم بېرىش ئوبيېكتلىرىنى بېكىتكەندە، بالا بېقىش ياردەم پۇلى ئائىلە ياكى شەخسنىڭ كىرىمىگە كىرگۈزۈلمەيدۇ.
بالا بېقىش ياردەم پۇلىنى بوۋاقلار، بالىلارنىڭ ئاتا - ئانىسىدىن بىر تەرەپ ياكى باشقا ۋەسىيلىرى بەلگىلىمە بويىچە بوۋاقلار، بالىلارنىڭ نوپۇسى تۇرۇشلۇق جايدا ئىلتىماس قىلىپ ئالىدۇ.
مەركەز مالىيەسى 2025 - يىلىدىن باشلاپ ئورتاق مالىيە ئىش ھوقۇقى يۆتكىمە چىقىم تۈرى بولغان «بالا بېقىش ياردەم پۇلى ياردەم مەبلىغى»نى تەسىس قىلىدۇ.