گوۋۇيۈەن ئاخبارات ئىشخانىسىنىڭ ئاخبارات ئېلان قىلىش يىغىنىدا بالا بېقىش ياردەم پۇلى لايىھەسى يېشىپ چۈشەندۈرۈلدى

ھەربىر بالىغا يىلىغا 3600 يۈەن، مەركەز مالىيەسىنىڭ خامچوتى تەخمىنەن 90 مىليارد يۈەن −

گوۋۇيۈەن ئاخبارات ئىشخانىسىنىڭ ئاخبارات ئېلان قىلىش يىغىنىدا بالا بېقىش ياردەم پۇلى لايىھەسى يېشىپ چۈشەندۈرۈلدى

□شىنخۇا ئاگېنتلىقى مۇخبىرلىرى لى خېڭ، دۇڭ رۇيفېڭ، شېن چېڭ

يېقىندا، جۇڭگو كوممۇنىستىك پارتىيەسى مەركىزىي كومىتېتى بەنگۇڭتىڭى، گوۋۇيۈەن بەنگۇڭتىڭى «بالا بېقىش ياردەم پۇلى تۈزۈمىنى يولغا قويۇش لايىھەسى»نى بېسىپ تارقىتىپ، 2025 - يىلى 1 - ئاينىڭ 1 - كۈنىدىن باشلاپ، مەيلى تۇنجى بالا، ئىككىنچى بالا، ئۈچىنچى بالا بولسۇن، ئۈچ ياشقا توشقۇچە ھەر يىلى بىردەك 3600 يۈەن ياردەم پۇلى بېرىلىدىغانلىقىنى ئايدىڭلاشتۇردى. بۇ سىياسەت يېڭى جۇڭگو قۇرۇلغاندىن بۇيانقى تۇنجى قېتىملىق كەڭ دائىرىدە، ئومۇمىي مەنپەئەتدارلىق شەكلىدە، بىۋاسىتە ئاممىغا تارقىتىلىدىغان خەلق تۇرمۇشى كاپالىتى نەق پۇل ياردەم پۇلى ھېسابلىنىدۇ.

گوۋۇيۈەن ئاخبارات ئىشخانىسى 7 - ئاينىڭ 30 - كۈنى ئۆتكۈزگەن ئاخبارات ئېلان قىلىش يىغىنىدا، ئالاقىدار تارماقلارنىڭ مەسئۇللىرى ئامما كۆڭۈل بۆلۈۋاتقان قىزىق نۇقتىلارغا نوپۇزلۇق جاۋاب قايتۇردى.

ياردەم پۇلىنى قانداق ئالىدۇ؟ 8 - ئاينىڭ ئاخىرى بالا بېقىش ياردەم پۇلىنى ئىلتىماس قىلىپ ئېلىش يوللىرى كەينى - كەينىدىن ئېچىۋېتىلىدۇ

بالا بېقىش ياردەم پۇلىنى قانداق ئىلتىماس قىلىپ ئېلىش ئامما ئەڭ كۆڭۈل بۆلۈۋاتقان مەسىلىلەرنىڭ بىرى.

دۆلەت سەھىيە - ساغلاملىق كومىتېتى نوپۇس - ئائىلە مەھكىمىسىنىڭ باشلىقى ۋاڭ خەيدۇڭ مۇنداق تونۇشتۇردى: نۆۋەتتە دۆلەت ۋە ھەرقايسى جايلار بالا بېقىش ياردەم پۇلى ئۇچۇرىنى باشقۇرۇش سىستېمىسى قۇرۇلۇشىنى تاماملىدى، ھازىر پۈتۈن جەريانلىق سىناق قىلىنىۋاتىدۇ. ھەرقايسى جايلار خىزمەت كۈچلىرىنى تەشكىللەپ ۋە سەپلەپ، ئاساسىي قاتلامدىكى خىزمەتچى خادىملارنى كەسپىي جەھەتتىن تەربىيەلەشنى قانات يايدۇردى. خىزمەت پىلانى بويىچە، ھەرقايسى جايلار 8 - ئاينىڭ ئاخىرى بالا بېقىش ياردەم پۇلىنى ئىلتىماس قىلىپ ئېلىش يوللىرىنى كەينى - كەينىدىن ئېچىۋېتىدۇ، 8 - ئاينىڭ 31 - كۈنىدىن بۇرۇن بالا بېقىش ياردەم پۇلىنى ئىلتىماس قىلىپ ئېلىش يوللىرىنى ئومۇميۈزلۈك ئېچىۋېتىدۇ.

بالا بېقىش ياردەم پۇلى قەيەردىن ئىلتىماس قىلىپ ئېلىنىدۇ؟ ۋاڭ خەيدۇڭ مۇنداق دېدى: ئاساسلىقى مەملىكەت بويىچە بىرلىككە كەلگەن بالا بېقىش ياردەم پۇلى ئۇچۇرىنى باشقۇرۇش سىستېمىسى ئارقىلىق ئىلتىماس قىلىپ ئېلىنىدۇ، ھەرقايسى جايلاردىكى ئۆلكە دەرىجىلىك مەمۇرىي ئىشلار مۇلازىمەت سۇپىسىغا تايىنىلىپ بالا بېقىش ياردەم پۇلىنى ئىلتىماس قىلىپ ئېلىش مەخسۇس رايونى تەسىس قىلىنىدۇ، شۇنىڭ بىلەن بىللە، جىفۇباۋ، ۋىيشىن قاتارلىق 3 - تەرەپ مۇلازىمەت سۇپىسىدا ئىلتىماس قىلىپ ئېلىش كۆزنىكى ئېچىلىدۇ. ئامما كۆپ خىل يوللار ئارقىلىق، يان تېلېفوندىن پايدىلىنىپ توردا قولاي بېجىرسە بولىدۇ، بالا بېقىش ياردەم پۇلىنى ئىلتىماس قىلىپ ئېلىشنى «ئۆيدىن چىقماي، بارماقتىلا چېكىپ، ئاسانلا بېجىرىش» ئىشقا ئاشۇرۇلىدۇ.

شۇنىڭ بىلەن بىللە، تور سىرتىدا بېجىرىش يولى ۋە ئادەملىك مۇلازىمەت ساقلاپ قېلىنىدۇ، ئالاھىدە سەۋەبلەر تۈپەيلىدىن توردا ئىلتىماس قىلىپ ئېلىشقا ئامالسىز قالغان ئامما بوۋاقلار ۋە بالىلارنىڭ نوپۇسى تۇرۇشلۇق جايدىكى يېزا - بازار، كوچا باشقارمىلىرىغا بېرىپ بېجىرسە بولىدۇ. ئۆزىنىڭ ئەمەلىي ئەھۋالىغا ئاساسەن، بېجىرىش يوللىرىنى ئۆز ئالدىغا تاللىسا بولىدۇ.

ئىلتىماس قىلىپ ئېلىشقا قانداق ماتېرىياللار كېتىدۇ؟ «ئىلتىماس قىلىپ ئېلىش ماتېرىياللىرى ئەڭ زور چەكتە ئىخچاملىنىدۇ.» ۋاڭ خەيدۇڭ مۇنداق دېدى: بالا بېقىش ياردەم پۇلى ئۇچۇرىنى باشقۇرۇش سىستېمىسى گۇڭئەن، خەلق ئىشلىرى، ئادەم كۈچى بايلىقى ۋە ئىجتىمائىي كاپالەت قاتارلىق تارماقلار بىلەن ئۇچۇردىن ئورتاق بەھرىمەن بولۇش مېخانىزمى ئورنىتىپ، چوڭ سانلىق مەلۇماتلارنى سېلىشتۇرۇپ تەكشۈرۈشنى ئىشقا ئاشۇرىدۇ، ئىلتىماس قىلىپ ئالىدىغان چاغدا پەقەت بوۋاقلار ۋە بالىلارنىڭ تۇغۇلغانلىق تېببىي ئىسپاتى، نوپۇس دەپتىرى قاتارلىق بوۋاقلار ۋە بالىلارنىڭ سالاھىيىتى ۋە بېقىش مۇناسىۋىتىنى ئىسپاتلايدىغان زۆرۈر ماتېرىياللارنى تاپشۇرسىلا بولىدۇ.

نېمە ئۈچۈن تۇنجى بالىنى قاپلايدۇ؟ تۇنجى بالىلىق ئائىلىلەر بېقىلىدىغان بالا بار ئائىلىلەرنىڭ ئاساسىي گەۋدىسى

بۇنىڭدىن ئىلگىرى، دۆلەت ئىچىدىكى بەزى جايلار بالا بېقىش ياردەم پۇلى تارقىتىش ئۈستىدە ئىزدەنگەن بولۇپ، كۆپىنچىسىدە ئىككىنچى بالا، ئۈچىنچى بالىغىلا قارىتىلغانىدى، بۇ قېتىم دۆلەتنىڭ بالا بېقىش ياردەم پۇلى تۈزۈمىدە تۇنجى بالىنىڭ ياردەم پۇلى دائىرىسىگە كىرگۈزۈلۈشى كىشىلەرنىڭ دىققىتىنى قوزغىدى. ۋاڭ خەيدۇڭ مۇنداق دېدى: بۇ تەڭشەشتە ئىككى تەرەپتىكى ئەھۋال كۆزدە تۇتۇلدى:

بىر تەرەپتىن، تۇنجى بالىلىق ئائىلىلەر بېقىلىدىغان بالا بار ئائىلىلەرنىڭ ئاساسىي گەۋدىسى. دۆلىتىمىزدە ھەر يىلى تۇغۇلغان نوپۇس ئىچىدە يېرىمىدىن كۆپرەكى تۇنجى بالا بولۇپ، تۇنجى بالىنى ياردەم پۇلى دائىرىسىگە كىرگۈزۈش بالا بېقىش ياردەم پۇلى تۈزۈمىنىڭ كەڭ قاپلىشىنى ئىشقا ئاشۇرۇپ، بېقىلىدىغان بالا بار ئائىلىلەرگە ئومۇميۈزلۈك نەپ يەتكۈزەلەيدۇ؛

يەنە بىر تەرەپتىن، پەرزەنتلىك بولۇش بىر ئائىلىدىكى چوڭ ئىش. تۇنجى بالىنى تۇغۇش ئائىلىنىڭ پەرزەنتلىك بولۇشىنىڭ باشلىنىش نۇقتىسى ۋە ئاساسى، شۇنداقلا ئالاھىدە قوللاشقا تېگىشلىك ئاچقۇچلۇق باسقۇچ. تۇنجى بالىغا بالا بېقىش ياردەم پۇلى تارقاتقاندا، ئائىلىنىڭ پەرزەنتلىك بولۇش تەسىراتىنى ياخشىلاپ، ئائىلىنىڭ بېقىش بېسىمىنى يېنىكلىتىدۇ، شۇنداقلا ئائىلىنىڭ يەنە پەرزەنتلىك بولۇشنى ئويلىشىشىغا پايدىلىق.

دۆلەت سەھىيە - ساغلاملىق كومىتېتىنىڭ مۇئاۋىن مۇدىرى گو يەنخۇڭ مۇنداق دېدى: بالا بېقىش ياردەم پۇلى تۇغۇت مەدىتى سىياسىتى سىستېمىسىنىڭ تەركىبىي قىسمى. يېقىنقى يىللاردىن بۇيان، دۆلەت تۇغۇت سۇغۇرتىسىنىڭ قاپلاش دائىرىسىنى كېڭەيتىش، تۇغۇت دەم ئېلىشىنى 158 كۈنگە ھەم ئۇنىڭدىن ئارتۇق ئۇزارتىش، ئاتا - ئانىلارنىڭ بالىلارنى بېقىش دەم ئېلىشىنى تەسىس قىلىش، ئومۇمىي مەنپەئەتدار ھاۋالىلىك بېقىش مۇلازىمىتى بىلەن تەمىنلەش سالمىقىنى زورايتىش قاتارلىق تەدبىرلەر ئارقىلىق، تۇغۇت مەدىتى سىياسىتى سىستېمىسىنى مۇكەممەللەشتۈرۈشنى تېزلىتىپ، پائال ئىلگىرىلەشنى قولغا كەلتۈردى.

تونۇشتۇرۇلۇشىچە، كېيىنكى قەدەمدە، دۆلەت سەھىيە - ساغلاملىق كومىتېتى ئالاقىدار تارماقلار بىلەن بىرلىكتە، ھازىر بار بولغان سىياسەتلەرنىڭ ئەمەلىيلىشىپ ئۈنۈم ھاسىل قىلىشىغا ھەقىقىي كاپالەتلىك قىلىدىكەن. شۇنىڭ بىلەن بىللە، ئالدىن كۆرەرلىك تەتقىقاتى ۋە سىياسەت زاپىسىنى كۈچەيتىپ، تۇغۇت مەدىتى سىياسىتى قورال ساندۇقىنى سىجىل تولۇقلاپ ۋە مۇكەممەللەشتۈرۈپ، ئائىلىلەرنىڭ تۇغۇت، بېقىش - تەربىيەلەش يۈكىنى يەنىمۇ يېنىكلىتىپ، تۇغۇت سۆيەر جەمئىيەت قۇرۇشقا تۈرتكە بولىدىكەن.

پۇل قەيەردىن كېلىدۇ؟ مەركەز مالىيەسى تەخمىنەن ％90نى ئۈستىگە ئالىدۇ

ئۇزاق مەزگىللىك خەلق تۇرمۇشى سىياسىتى بولۇش سۈپىتى بىلەن، بالا بېقىش ياردەم پۇلىنىڭ مۇقىم مالىيە كاپالىتى بولۇشى ئىنتايىن مۇھىم.

مالىيە مىنىستىرلىقى ئىجتىمائىي كاپالەت مەھكىمىسىنىڭ باشلىقى گو ياڭ مۇنداق دېدى: ئورۇنلاشتۇرما بويىچە، مەركەز مالىيەسى ئورتاق مالىيە ئىش ھوقۇقى يۆتكىمە چىقىم تۈرى «بالا بېقىش ياردەم پۇلى ياردەم مەبلىغى»نى تەسىس قىلىدۇ، بۇ يىل دەسلەپكى قەدەمدە 90 مىليارد يۈەن ئەتراپىدا خامچوت ئورۇنلاشتۇرىدۇ. دۆلەتنىڭ ئاساسىي ئۆلچەمدىكى ياردەم پۇلى تارقىتىشقا كېرەكلىك مەبلەغقە قارىتا مەركەز مالىيەسى بەلگىلىك نىسبەت بويىچە جايلارغا ياردەم پۇلى چۈشۈرۈپ بېرىدۇ، مەركەز ئومۇمىي جەھەتتىن تەخمىنەن ％90نى ئۈستىگە ئالىدۇ.

يېقىندا، مالىيە مىنىستىرلىقى يەنە دۆلەت سەھىيە - ساغلاملىق كومىتېتى بىلەن بىرلىكتە بالا بېقىش ياردەم پۇلى، ياردەم مەبلىغىنى باشقۇرۇش چارىسىنى بېسىپ تارقىتىپ، مەبلەغنى تەقسىملەپ ئىشلىتىش ۋە باشقۇرۇش، نازارەت قىلىشنىڭ كونكرېت تەلىپىنى ئايدىڭلاشتۇرۇپ، مەبلەغنى چۈشۈرۈش تەرتىپىنى ئىنچىكىلەشتۈرىدۇ ۋە قېلىپلاشتۇرىدۇ. ئىككى تارماق ياردەم مەبلىغىگە قارىتا پۈتۈن جەريانلىق خامچوت ئۈنۈمىنى باشقۇرۇشنى يولغا قويۇپ، ئۈنۈمنى نازارەت قىلىش - باشقۇرۇش ۋە ئۈنۈمنى باھالاشنى ياخشى ئىشلەپ، مالىيە مەبلىغىنى ياخشى باشقۇرۇش ۋە ياخشى ئىشلىتىشكە ھەقىقىي كاپالەتلىك قىلىدۇ.

لايىھەدە مۇنداق بەلگىلەندى: تۈزۈمدىكى بەلگىلىمە بويىچە تارقىتىلغان بالا بېقىش ياردەم پۇلىدىن شەخسىي تاپاۋەت بېجى كەچۈرۈم قىلىنىدۇ؛ ئەڭ تۆۋەن تۇرمۇش كاپالىتى ئوبيېكتى، ئالاھىدە قىيىنچىلىقى بارلار قاتارلىق قۇتقۇزۇش - ياردەم بېرىش ئوبيېكتلىرىنى بېكىتىشتە، بالا بېقىش ياردەم پۇلى ئائىلە ياكى شەخسنىڭ كىرىمىگە كىرگۈزۈلمەيدۇ. بۇنىڭدىن ئىلگىرى، دۆلەت ئۈچ ياشتىن تۆۋەن بوۋاقلار ۋە بالىلارنىڭ ھالىدىن خەۋەر ئېلىش بويىچە شەخسىي تاپاۋەت بېجىدىن مەخسۇس تۈردىكى قوشۇمچە ھەقنى چىقىرىۋېتىش سىياسىتىنى يولغا قويغان بولۇپ، چىقىرىۋېتىش ئۆلچىمى ھەربىر بالىنىڭ ھەر ئايدا 2000 يۈەن بولغان.

«بۇ سىياسەتلەر بالا بېقىش ياردەم پۇلى تۈزۈمىگە ماسلىشىپ، ئائىلىنىڭ تۇغۇت، بېقىش تەننەرخىنى تۆۋەنلىتىشتە رولىنى ئۇنىۋېرسال جارى قىلدۇرىدۇ» دېدى گو ياڭ.

(شىنخۇا ئاگېنتلىقى، بېيجىڭ، 7 - ئاينىڭ 30 - كۈنى تېلېگراممىسى)