− باش شۇجى شى جىنپىڭنىڭ مۇھىم يوليورۇقى «15 - بەش يىل»لىق يىرىك پىلاننى تۈزۈش خىزمىتىنى ياخشى ئىشلەش ئۈچۈن يۆنىلىشنى ئېنىق كۆرسىتىپ بەردى
□ شىنخۇا ئاگېنتلىقى مۇخبىرى
باش شۇجى شى جىنپىڭ يېقىندا تور ئەھلىنىڭ «15 - بەش يىل»لىق يىرىك پىلاننى تۈزۈش خىزمىتىگە قارىتا بەرگەن پىكىر - تەكلىپلىرىنى تەتقىق قىلىپ قوبۇل قىلىش توغرىسىدا مۇھىم يوليورۇق بېرىپ مۇنداق تەكىتلىدى: «كەڭ دائىرىدە خەلق رايىنى چوڭقۇر ئىگىلەپ، خەلقنىڭ ساداسىغا قۇلاق سېلىپ، خەلقنىڭ ئەقىل - پاراسىتىنى توپلاپ، جۇڭگوچە زامانىۋىلاشتۇرۇشنى ئالغا سىلجىتىشنىڭ قۇدرەتلىك بىرىكمە كۈچىنى مۇجەسسەملەپ، خەلقنىڭ گۈزەل تۇرمۇشقا بولغان ئىنتىلىشىنى ئۈزلۈكسىز ئىشقا ئاشۇرۇش كېرەك.» كۆپچىلىك مۇنداق بىلدۈردى: باش شۇجى شى جىنپىڭنىڭ مۇھىم يوليورۇقىنىڭ روھىنى چوڭقۇر ئىزچىللاشتۇرۇپ، ئەمەلىيلەشتۈرۈپ، بىر نىيەتتە ئىتتىپاقلىشىپ، ھەقىقىي تۇتۇپ ئەمەلىي ئىشلەپ، «15 - بەش يىل»لىق تەرەققىيات يېڭى مەنزىرىسىنى ئورتاق سىزىپ چىقىشىمىز كېرەك.
بۇ يىل 5 - ئاينىڭ 20 - كۈنىدىن 6 - ئاينىڭ 20 - كۈنىگىچە، «15 - بەش يىل»لىق يىرىك پىلاننى تۈزۈش خىزمىتىدە توردا پىكىر ئېلىش پائالىيىتى قانات يايدۇرۇلۇپ، تور ئەھلىنىڭ جەمئىي 3 مىليون 113 مىڭ پارچىدىن ئارتۇق پىكىر - تەكلىپى تاپشۇرۇۋېلىنىپ، «15 - بەش يىل»لىق يىرىك پىلاننى تۈزۈش پايدىلىق پايدىلىنىش ماتېرىيالى بىلەن تەمىنلەندى.
باش شۇجى شى جىنپىڭ مۇھىم يوليورۇقىدا مۇنداق كۆرسەتتى: «<15 - بەش يىل>لىق يىرىك پىلاننى تۈزۈش خىزمىتىگە توردا پىكىر ئېلىش پائالىيىتىنىڭ قاتنىشىش دەرىجىسى يۇقىرى، قاپلاش دائىرىسى كەڭ بولۇپ، پۈتۈن جەريانلىق خەلق دېموكراتىيەسىنىڭ بىر قېتىملىق جانلىق ئەمەلىيىتى بولدى».
بۇ ھەقتە، چىڭخۇا داشۆ جۇڭگو تەرەققىيات يىرىك پىلانى تەتقىقات ئورنىنىڭ دائىمىي مۇئاۋىن باشلىقى دۇڭ يۈ چوڭقۇر تەسىراتقا ئىگە. «بۇ قېتىمقى توردا پىكىر ئېلىش پائالىيىتىدە كادىرلار، ئامما ئەمەلىيەتتىن ئۆتكۈزۈش داۋامىدا ياراتقان يېڭى تەجرىبىلەرنى تولۇق قوبۇل قىلىش مەقسەت قىلىنغان بولۇپ، خەلقنى مەركەز قىلغان قىممەت يۈزلىنىشى، خەلقنى تېخىمۇ ياخشى تۇرمۇشقا ئېرىشتۈرۈشتىن ئىبارەت تەرەققىيات ئىنتىلىشى نامايان قىلىندى» دېدى دۇڭ يۈ.
بۇ قېتىمقى توردا پىكىر ئېلىش پائالىيىتىگە يۈننەن ئۆلكىسى خېچىڭ ناھىيەلىك 2 - ئوتتۇرا مەكتەپنىڭ مۇدىرى ياڭ يوۋسۇڭ پائال قاتنىشىپ، «يېزا - كەنت مائارىپىنى رەقەملەشتۈرۈش ئەسلىھەلىرىدىكى كەمتۈكلۈكلەرنى تولۇقلاش» «بىللە كۆچۈپ كەلگەن پەرزەنتلەرنىڭ يېقىن ئەتراپتا ئوقۇش سىياسىتىنى ئەلالاشتۇرۇش» قاتارلىق تەكلىپلەرنى ئوتتۇرىغا قويدى. «باش شۇجى شى جىنپىڭنىڭ مۇھىم يوليورۇقى مېنى ھەسسىلەپ ئىلھاملاندۇردى. مەن داۋاملىق ئەمەلىي خىزمەتنى چىقىش قىلىپ، بالىلار يولۇققان مەسىلىلەر، ئوقۇتۇش جەريانىدا ئويلىغان تەكلىپلەرنى ۋاقتىدا ئىنكاس قىلىپ، مائارىپ كۈچلۈك دۆلىتى قۇرۇلۇشى ئۈچۈن ئۆزۈمنىڭ بىر كىشىلىك كۈچۈمنى قوشىمەن».
بۇ يىل كىرگەندىن بۇيان، گۇاڭدۇڭ خۇيتيەن ئاۋىياتسىيە - ئالەم قاتنىشى پەن - تېخنىكا چەكلىك شىركىتى دىققەتنى نۇقتىلىق ساھە ۋە ئاچقۇچلۇق ھالقىلاردا كۈچەپ يېڭىلىق يارىتىشقا مەركەزلەشتۈرۈپ، كۆپ تۈرلۈك تېخنىكىلىق قىيىن مەسىلىلەرنى ھەل قىلدى. باش شۇجى شى جىنپىڭنىڭ مۇھىم يوليورۇقى شىركەتنىڭ قۇرغۇچىسى جاۋ دېلىنى چوڭقۇر ئىلھاملاندۇردى: «ئۇچار ئاپتوموبىل كەلگۈسى كەسىپلەر ئىچىدىكى مۇھىم مۇسابىقە يولى. يېقىندا ئېچىلغان گۇاڭدۇڭ ئۆلكىسىنىڭ <15 - بەش يىل>لىق يىرىك پىلاننى تۈزۈش خىزمىتى بويىچە پۇقراۋى كارخانىلار سۆھبەت يىغىنىدا، بىز تۆۋەن بوشلۇق ئىقتىسادىنىڭ تەرەققىياتىغا قارىتا، كارخانىلارنىڭ ئەمەلىيىتىگە بىرلەشتۈرۈپ بەزى تەكلىپلەرنى ئوتتۇرىغا قويدۇق، ئالاقىدار تارماقلار پائال ئىنكاس قايتۇرۇپ، كەسىپنىڭ كەلگۈسى تەرەققىياتىغا بولغان ئىشەنچىمىزنى چىڭىتتى».
بەش يىللىق يىرىك پىلاننى تۈزۈش دۆلەت ئىگىلىكى ۋە خەلق تۇرمۇشىغا مۇناسىۋەتلىك. كەڭ تور ئەھلى ئوتتۇرىغا قويغان نۇرغۇن قىممەتلىك پىكىر - تەكلىپلەرگە قارىتا، باش شۇجى شى جىنپىڭ «ئالاقىدار تارماقلار ئەستايىدىل تەتقىق قىلىپ قوبۇل قىلىشى كېرەك» دەپ ئېنىق تەلەپ قىلدى.
«پارتىيە مەركىزىي كومىتېتىنىڭ بىرتۇتاش رەھبەرلىكىدە، پۈتۈن مەملىكەت خەلقىنىڭ ئەقىل - پاراسىتى ۋە كۈچىنى مەركەزلەشتۈرۈپ، بەش يىللىق يىرىك پىلاننى تۈزۈپ يولغا قويۇش بىزنىڭ سىياسىي ئەۋزەللىكىمىز. بىز باش شۇجى شى جىنپىڭنىڭ مۇھىم يوليورۇقىنىڭ روھىنى چوڭقۇر ئۆگىنىپ، ئىزچىللاشتۇرۇپ، <15 - بەش يىل>لىق يىرىك پىلاننى تۈزۈش جەريانىدا، ئىشىكنى ئېچىۋېتىپ تەدبىر سوراش، كۆپچىلىكنىڭ ئەقىل - پاراسىتىنى جارى قىلدۇرۇشتا چىڭ تۇرۇپ، كۆپ خىل شەكىل، كۆپ خىل يول ئارقىلىق كەڭ دائىرىدە پىكىر - تەكلىپلەرنى ئاڭلاپ، تىرىشىپ جەمئىيەتنىڭ ئارزۇسى، ئاممىنىڭ ئەقىل - پاراسىتى، مۇتەخەسسىسلەرنىڭ پىكرى، ئاساسىي قاتلامنىڭ تەجرىبىسىنى يىرىك پىلانغا تولۇق قوبۇل قىلىپ، يىرىك پىلاننىڭ ئىلمىيلىكى ۋە مەشغۇلاتچانلىقىنى ئۈزلۈكسىز كۈچەيتىمىز» دېدى دۆلەت تەرەققىيات ۋە ئىسلاھات كومىتېتى تەرەققىيات ئىستراتېگىيەسى ۋە يىرىك پىلان مەھكىمىسىنىڭ مۇئاۋىن باشلىقى پېڭ شىچېڭ.
ئەنخۇي ئۆلكىلىك پەن - تېخنىكا نازارىتى پارتىيە گۇرۇپپىسىنىڭ شۇجىسى ۋۇ جىنسۇڭ باش شۇجى شى جىنپىڭنىڭ مۇھىم يوليورۇقىنى ئۆگەنگەندىن كېيىن، مەسئۇلىيىتىنىڭ ئېغىرلىقىنى چوڭقۇر ھېس قىلدى. «بىز دۆلەتنىڭ ئېھتىياجى، ئەنخۇينىڭ ئىقتىدارىدا چىڭ تۇرۇپ، تور ئەھلىنىڭ توغرا ۋە ئېنىق چۈشەنچىلىرىنى كەڭ دائىرىدە قوبۇل قىلىپ، پۈتۈن ئۆلكىنىڭ <15 - بەش يىل>لىق پەن - تېخنىكىدا يېڭىلىق يارىتىش يىرىك پىلانىنى يۇقىرى سۈپەتلىك تۈزۈپ، <دەرەخ> پەلەككە تاقاشقان، <چاتقال> ساغلام ئۆسكەن، <كۆچەت> بۈك - باراقسان ئاينىغان يېڭىلىق يارىتىش ئېكولوگىيەسىنى شەكىللەندۈرۈشكە تۈرتكە بولىمىز» دېدى ۋۇ جىنسۇڭ.
يېقىندا، شاڭخەي شەھەرلىك تۇرالغۇ ۋە شەھەر - يېزا قۇرۇلۇشى كومىتېتى ئالاقىدار تارماقلار بىلەن ھەمكارلىشىپ، خەلق رايىنى كەڭ دائىرىدە توپلاپ، «ئىشىكنى ئېچىۋېتىپ پىلان تۈزۈش»تە چىڭ تۇرۇپ، شاڭخەينىڭ تۇرالغۇ ۋە شەھەر - يېزا قۇرۇلۇشىنى باشقۇرۇش ساھەسىنىڭ يېڭى يىرىك پىلانىنى تۈزۈشنى تېزلەتتى.
«بۇ قېتىمقى توردا پىكىر ئېلىش پائالىيىتىدە، كەڭ تور ئەھلى دىققەتنى تۇرالغۇ كاپالىتىگە مەركەزلەشتۈرۈپ، قىممىتى بار نۇرغۇن پىكىر - تەكلىپنى ئوتتۇرىغا قويدى. بىز پائال قوبۇل قىلىپ، خەلق ئاممىسىنىڭ تۇرالغۇغا بولغان كۆپ خىللاشقان، كۆپ مەنبەلەشكەن ئېھتىياجىنى ئۈزلۈكسىز قاندۇرۇپ، خەلقنىڭ ئەقىل - پاراسىتىنى ھەقىقىي تۈردە ئىدارە قىلىش ئۈنۈمىگە ئايلاندۇرىمىز» دېدى شاڭخەي شەھەرلىك تۇرالغۇ ۋە شەھەر - يېزا قۇرۇلۇشى كومىتېتىنىڭ مۇدىرى ۋاڭ جېن.
ئىچكى موڭغۇل كۆكخوت شەھىرى سەيخەن رايونىنىڭ شەندەن مەھەللىسى ئىشخانىسىدا، مەھەللە مەسئۇلى خۇ شەنيۈەن دائىرىگە مەسئۇل خادىم بىلەن ئاھالىلەرنىڭ باش قېتىنچىلىقىنى ھەل قىلىش توغرىسىدا مەسلىھەتلىشىۋاتاتتى. «<15 - بەش يىل> مەزگىلىدىكى ئىقتىساد، جەمئىيەت تەرەققىياتىنى ياخشى پىلانلاشتا، تېگى - تەكتىدىن ئېيتقاندا ھەممە ئائىلىنى تېخىمۇ ياخشى تۇرمۇش كەچۈرۈش ئىمكانىيىتىگە ئېرىشتۈرۈش مەقسەت قىلىنغان. باش شۇجى شى جىنپىڭ: <خەلقنى مەركەز قىلىشتا باشتىن - ئاخىر چىڭ تۇرۇش كېرەك> دەپ تەكىتلىدى، بىز يەنىمۇ ئىلگىرىلىگەن ھالدا تور ئەھلىنىڭ پىكىر ئىنكاس قىلىش يوللىرىنى راۋانلاشتۇرۇپ، پۇقرالارنىڭ ئىلتىماس - تەلىپىنى تولۇق ئاڭلاپ ۋە قوبۇل قىلىپ، خەلق رايىنى توپلاشتا رەسمىيەتچىلىك قىلماسلىق، تەكلىپلەرنى بېجىرىشتە ئەپلەپ - سەپلەپ ئىش قىلماسلىق، سىياسەتنى ئەمەلىيلەشتۈرۈشتە ئەمەلىي ئۈنۈم ھاسىل قىلىشقا ھەقىقىي كاپالەتلىك قىلىمىز» دېدى خۇ شەنيۈەن.
«باش شۇجى: <كەڭ دائىرىدە خەلق رايىنى چوڭقۇر ئىگىلەپ، خەلقنىڭ ساداسىغا قۇلاق سېلىپ، خەلقنىڭ ئەقىل - پاراسىتىنى توپلاش كېرەك> دەپ كۆرسەتتى، بۇ بىزنىڭ يېزا - كەنتلەرنى ئومۇميۈزلۈك گۈللەندۈرۈشنى پىلانلىشىمىز ئۈچۈن يۆنىلىش ۋە مۇھىم نۇقتىنى ئېنىق كۆرسىتىپ بەردى. بىز داۋاملىق تۈردە ئائىلىلەرگە كىرىپ سىياسەتنى چۈشەندۈرۈپ، كىرىمىنى سوراپ، ئېھتىياجىنى تېپىپ چىقىپ، تۈرلۈك چارە - ئاماللار ئارقىلىق يېزا ئىگىلىكىنىڭ ئۈنۈمىنى ئاشۇرۇش، يېزىلارنىڭ ھاياتىي كۈچىنى ئاشۇرۇش، دېھقانلارنىڭ كىرىمىنى ئاشۇرۇشقا تۈرتكە بولۇپ، يېزا - كەنتلەرنى ئومۇميۈزلۈك گۈللەندۈرۈشنى ئالغا سىلجىتىشنىڭ قۇدرەتلىك بىرىكمە كۈچنى مۇجەسسەملەيمىز» دېدى گۇيجوۋ ئۆلكىسى تۇڭرېن شەھىرى يەنخې تۇجيازۇ ئاپتونوم ناھىيەسى شازى كوچا باشقارمىسى جىنلۇڭ كەنتى پارتىيە ياچېيكىسىنىڭ شۇجىسى جاڭ جېڭرۇڭ.
فۇجيەن ئۆلكىسى نىڭدې شەھەرلىك پارتىيە كومىتېتى دائىمىي كومىتېتىنىڭ ئەزاسى، تەشكىلات بۆلۈمىنىڭ باشلىقى چېن خۇي مۇنداق بىلدۈردى: «باش شۇجى شى جىنپىڭ <خەلقنىڭ گۈزەل تۇرمۇشقا بولغان ئىنتىلىشىنى ئۈزلۈكسىز ئىشقا ئاشۇرۇش>نى تەلەپ قىلدى، بىز خەلققە بەخت يارىتىشنى تۈپ قىممەت يۈزلىنىشى قىلىپ، <تۆتتە ئاساسىي قاتلامغا بېرىش> تۈزۈمىنى ئومۇميۈزلۈك ئەمەلىيلەشتۈرۈپ، يېڭى دەۋردىكى پارتىيەنىڭ ئاممىۋى لۇشيەنىدە ياخشى مېڭىپ، پارتىيە قۇرۇلۇشى خىزمىتى ئالاقە نۇقتىسى تۈزۈمىنى پۇختا، ئىنچىكە ئەمەلىيلەشتۈرۈپ، ئاممىنىڭ پىكىر - تەكلىپلىرىنى ئەستايىدىل ئاڭلاپ، ئامما ئالدىراۋاتقان، قىينىلىۋاتقان، غەم قىلىۋاتقان، ئارزۇ قىلىۋاتقان مەسىلىلەرنى كۈچەپ ھەل قىلىپ، تەرەققىيات نەتىجىلىرىدىن بارلىق خەلقنى تېخىمۇ ياخشى، تېخىمۇ ئادىل مەنپەئەتلەندۈرىمىز».
(شىنخۇا ئاگېنتلىقى، بېيجىڭ، 8 - ئاينىڭ 4 - كۈنى تېلېگراممىسى)