شىنخۇا ئاگېنتلىقى، بېيجىڭ، 4 - ئاينىڭ 25 - كۈنى تېلېگراممىسى 4 - ئاينىڭ 25 - كۈنى، دۆلەت رەئىسى شى جىنپىڭ يېشىل تۇمشۇقنىڭ زۇڭتۇڭى نېۋېس بىلەن ئۆزئارا تەبرىك تېلېگراممىسى ئەۋەتىپ، ئىككى دۆلەت دىپلوماتىك مۇناسىۋەت ئورناتقانلىقىنىڭ 50 يىللىقىنى تەبرىكلىدى.
شى جىنپىڭ مۇنداق كۆرسەتتى: جۇڭگو بىلەن يېشىل تۇمشۇق ئەنئەنىۋى دوستلار بولۇپ، ئىككى دۆلەت دوستلۇقى ئۇزاق تارىخىي جەرياندا تېخىمۇ ھاياتىي كۈچكە تولدى. يېرىم ئەسىردىن بۇيان، ئىككى تەرەپ بىر - بىرىنىڭ يادرولۇق مەنپەئىتىگە ئالاقىدار ۋە كۆڭۈل بۆلىدىغان مۇھىم مەسىلىلەردە بىر - بىرىنى چۈشىنىپ ۋە قوللاپ، تەرەققىيات ۋە خەلق تۇرمۇشى ساھەسىدە مول ئۈنۈملۈك ھەمكارلىقنى قانات يايدۇرۇپ، چوڭ - كىچىك دۆلەتلەر ئۆزئارا ھۆرمەتلەش، دوستانە ھەمكارلىشىش ئۈلگىسىنى تىكلىدى. مەن جۇڭگو - يېشىل تۇمشۇق مۇناسىۋىتىنىڭ تەرەققىياتىغا يۈكسەك ئەھمىيەت بېرىمەن، زۇڭتۇڭ نېۋېس بىلەن بىرلىكتە تىرىشىپ، ئىككى دۆلەت دىپلوماتىك مۇناسىۋەت ئورناتقانلىقىنىڭ 50 يىللىقىنى پۇرسەت بىلىپ، ئەنئەنىۋى دوستلۇقنى داۋاملاشتۇرۇپ، ئەمەلىي ھەمكارلىقنى چوڭقۇرلاشتۇرۇپ، كۆپ تەرەپلىك ھەمكارلىشىشنى كۈچەيتىپ، جۇڭگو - يېشىل تۇمشۇق ئىستراتېگىيەلىك ھەمراھلىق مۇناسىۋىتىنىڭ ماھىيەتلىك مەزمۇنىنى ئۈزلۈكسىز بېيىتىپ، ئىككى دۆلەت خەلقىگە تېخىمۇ ياخشى بەخت يارىتىشنى خالايمەن.
نېۋېس مۇنداق بىلدۈردى: يېشىل تۇمشۇق تەرەپ ئىككى دۆلەتنىڭ يېرىم ئەسىردىن بۇيانقى دوستانە ھەمكارلىقىنى يۈكسەك ئالقىشلايدۇ، جۇڭگونىڭ يېشىل تۇمشۇقنىڭ ئىمكانىيەتلىك سىجىل تەرەققىياتى ئۈچۈن قوشقان قىممەتلىك تۆھپىسىگە رەھمەت ئېيتىدۇ. يېشىل تۇمشۇق تەرەپ داۋاملىق جۇڭگو تەرەپ بىلەن بىرلىكتە، ئىككى دۆلەت دىپلوماتىك مۇناسىۋەت ئورناتقانلىقىنىڭ 50 يىللىقىنى پۇرسەت بىلىپ، سىياسىي جەھەتتە ئۆزئارا ئىشىنىشنى مۇستەھكەملەپ، ئۆزئارا مەنپەئەت يەتكۈزۈش ئاساسىدىكى ھەمكارلىقنى چوڭقۇرلاشتۇرۇپ، ئىككى دۆلەت خەلقىگە ئۈزلۈكسىز بەخت يارىتىشنى خالايدۇ.